REFLEXÃO SEXTA-FEIRA SANTA
PAIXÃO DO SENHOR – NA’I NIA TERUS
29 de março de 2024
I Leitura: Is 52,13-53,12
Salmo: Sal 30 (31),2.6.12-13.15-16.17.25
II Leitura: Heb 4,14-16; 5,7-9
Evangelho: Jo 18,1-19,42
Fatin barak iha Timor, celebração Sexta-feira Santa ita sarani sira nian, significa luto tanba Jesus Mate. Nune’e, ema barak halo via sacra hatais metan, la’o ain-tanan atu sente mos Jesus nia terus; iha igreja balu, iha knananuk “sidón” eh “lelir mate” no tuir mai sarani sira halo procissão hodi acompanha Jesus morto” ba rate. Iha parte balu, tuir tradição nebe la hatene nia hún mai husi nebé, até atu cumprimenta malu eh fo de’it “bom dia” ba malu mos labele.
Wainhira ita reflete didi’ak sentido husi celebração Sexta-feira Santa, ita sei descobre dimensão importante no kle’an liu husi Jesus nia mate, ne’e mak “DOMIN LOLOS MAROMAK NIAN LIU HUSI NIA OAN MANE JESUS CRISTO NIA FUTAR RAN BE SULI IHA CRUZ BA SALVAÇÃO HUMANIDADE NO MUNDO TOMAK NIAN”. Iha mistério Jesus nia saran-An to’o mate iha Cruz, ita contempla domin ida be sasukat laek, domin lolós Maromak nian nebé nakfilak mai ita nu’udar salvação liu husi “Cristo, Bibi-Oan Páscoa be ema oho” (cf. 1Cor 5,7). Nune’e, celebração Sexta-feira Santa tengki sai momento ida espiritual nian, nebe fiar-na’in ida-idak sei husik fali Jesus nia futa Lia-fuan koalia ba ida-idak nia fuan laran: “Jerusalém nia oan feto sira, keta tanis tanba Há’u, maibe tanba imi rasik no tambá imi oan sira” (Lc 23,28; cf. IX Estação Via Sacra).
Leitura dahuluk husi livro Profeta Isaias nian koalia kona ba “Maromak nia ATAN”. Liafuan “atan eh servo” (iha hebraico ’ebed) mosu dala 21 iha Deutero-Isaias eh “Livro Consolação nian” (Is 40- 55) ho significado oi-oin: ema sira be fiel (os fieis), profeta sira, Segundo Isaias no liu-liu refere ba Israel rasik. Iha episódio ohin Is 52,13-53,12 apresenta poema dahát eh ikus kona ba “Maromak nia Atan”. Poema eh knananuk “Maromak nia Atan terus na’in ne’e importante tebes atu cumpreende “figura Jesus, Messias nian hanesan Atan Terus na’in be saran-An ba mate iha nonók eh silêncio laran tan ema barak nia di’ak”.
Iha leitura dahuluk, autor sagrado haklaken katak, Maromak nia Atan nee (anónimo ka naran la temi), mak ema inocente ida nebe simu terus oi-oin. Maske nune’e, ikus mai “Nia la moe lerek, tan Nia manán tan Maromak hamutuk ho Nia”. Poema ne’e fahe ba parte tolu: primeiro, introdução ida (52,13- 15), tuir mai corpo central eh conteudo principal (53,1-10), no ikus liu liafuan taka eh epílogo (53,11- 12). Iha parte dahuluk eh introdução, Maromak rasik mak koalia hodi dehan katak: “Atan ne’e sei la mate”. Pelo contrário, maske hasoru terus no todan oi-oin, nia sei simu hahí: “Haré ba, hau atan sei hetan sucesso, ema sei hahí hana’i tebes nia” (v. 13). Iha parte central, apresenta “razão tansa atan ne’e terus”. Autor haktuir katak, atan ne’e terus tanba “ita nia salan”: “Nia hasán ita moras sira iha nia An, carrega ita nia terus sira”. Ita haree nia hanesan leproso ida, nebe Na’i hakanek no hamoe. Maibe, ita crime sira mak hakanek Nia, ita hahalok aat sira mak estraga Nia. Castigo be soi ba ita, monu fali ba Nia, IHA NIA KANEK SIRA ITA HETAN DI’AK” (Is 53,4-5). Buat hirak ne’e hotu, Atan ne’e simu ho voluntário eh hakarak rasik (cf. Is 53,10). Iha epílogo, Maromak haklaken dala ida tan kona ba “glorificação atan terus na’in” nee nian. Katak ho nia terus nudar ema inocente ida, nia lori di’ak no kmanek ba ema wa’in. Hodi obedece eh halo tuir Maromak nia hakarak, atan be terus no mate nee lori redenção eh kasu-salan ema maksalak wa’in nian (cf. Is 53,12-13).
Iha leitura daruak, aborda temática nebe autor koalia ona iha Heb 3,1-5,10, kona ba “Cristo nia sacerdócio”, “Jesus mak Amu-lulik boot laran-sadi’a”. Iha versículo sira ohin nian (Heb 4,14-16; 5,7-9), hanesan homilia ida, koalia katak: “Jesus, nudar Amu-lulik boot, misericordioso eh laran-sadi’a na’in nebé ita merece atu fiar eh tau laran metin ba. Nu’udar Amu-lulik boot, Jesus sai nudar exemplo kona ba obediência ba Aman Maromak: “Maske Nia Maromak Oan, Nia apreende tiha atu halo tuir hodi Nia terus” (Heb 5,8). Fo An tomak ba Maromak nia vontade nee mak afirma perfeição Jesus nian. Ho romak leitura daruak ne’e, ita hetan dalan ba “perfeição” katak “santidade”, liu husi obediência ka entrega-an total ba Maromak.
Iha Evangelho, haklaken kona ba Passio Christi (Jesus nia terus eh Paixão do Senhor). La natón ba ita atu reflete rikusoin hotu Maromak nia futar Lia-fuan nian be realiza-an perfeitamente iha “Jesus Cristo rasik nu’udar PLENITUDE DA REVELAÇÃO”. Pontos balu deit ita bele reflete. Wainhira ita confronta narrativa evangelista São João nian ho Sinopticos (Mateus, Marcos no Lucas), ita sei hetan detalhos barak nebe hatudu diferença história nain nebe Sinopticos la haktuir: ema romanos sira nebe hola parte wainhira kaer Jesus, cena iha sacerdote Hana nia oin, episódio kona ba túnica, presença Jesus nia Inan ho escolante be “Jesus hadomi eh discípulo amado” iha cruz hun, diman be sona borus Jesus nia sorin. Parte nebe significativo liu mak, São João nia apresentação kona ba Jesus nia terus no mate la reflete imagem “Maromak nia Atan terus na’in” iha Is 52,13-53,12 (Poema dahát Maromak nia atan nian). Figura Jesus nian mosu hanesan ida nebé simu glória, ho autoridade tan Nia rasik hatene katak “Hatene katak buat hotu la’o tuir ona…” (Jo 19,28). Ba São João, Jesus nia terus eh Passio Christi, la’os “humilhação” maibé “glorificação”. Hasa’e-An iha cruz, Jesus la hatudu katak mate manán Nia, maibe Nia mak manán mate nu’udar LIURAI TRIUNFANTE NO GLORIOSO: “Aman, oras to’o ona! Hatudu Ita Oan nia glória, atu Oan hatudu fali Ita nia glória” (Jo 17,1-2). Liurai ida ne’e duni mak molok tama ba Jerusalém, simu unção iha rai Betánia (cf. Jo 12,1-3), hanesan LIURAI, Nia mate iha cruz: “Jesus Nazaré, Judeu sira nia LIURAI (cf. Jo 19,19), no hanesan LIURAI ema hakoi Nia (cf. Jo 19,39-41).
Ida ne’e duni mak “Matenek eh sabedoria Cruz Jesus nian”: “A linguagem da cruz é certamente loucura para os que se perdem mas, para os que se salvam, para nós, é força de Deus. Pois está escrito: Destruirei a sabedoria dos sábios e rejeitarei a inteligência dos inteligentes. Pois, já que o mundo, por meio da sua sabedoria, não reconheceu a Deus na sabedoria divina, aprouve a Deus salvar os que crêem, pela loucura da pregação. Enquanto os judeus pedem sinais e os gregos andam em busca da sabedoria, nós pregamos um Messias crucificado, escândalo para os judeus e loucura para os gentios. Mas, para os que são chamados, tanto judeus como gregos, Cristo é poder e sabedoria de Deus” (cf. Cor 1,17-25).