Vida empresarial husi perspetiva Uma Creda Católica nian (Discurso)

Partilha
    
 
   

Vida empresarial haré husi perspetiva Uma Kreda Católica nian

Vocação ho missão

Dom Virgílio Cardeal do Carmo da Silva, SDB

(Discurso dirige ba empresários sira)

Introdução

Ha’u hahú discurso ida ne’e hodi cita mensagem murak husi Santo Padre Francisco iha nia Exortação Apostólica Evangelii Gaudium. Mensagem ne’e dedica especialmente ba sira hotu nebé iha vocação ba vida empresarial. Santo Padre dehan: “A vocação dum empresário é uma nobre tarefa, desde que se deixe interpelar por um sentido mais amplo da vida; isto permite-lhe servir verdadeiramente o bem comum com o seu esforço por multiplicar e tornar os bens deste mundo mais acessíveis a todos. (Evangelii Gaudium, Papa Francesco. No.203).

Ba ita-boot sira hotu nebé oras ne’e hala’o vida empresarial, importante tebes atu tau iha consciência, katak vida ida ne’e vocação no missão ida nebé nobre, liu husi ita-boot sira nia esforço bele contribui ba desenvolvimento integral ema nian. Ida ne’e katak, respeita ema nia dignidade, serviço ba bem comum no considera empresa nu’udar comunidade humana. No atu vida comunitária iha empresa laran bele la’o ho di’ak precisa considera princípios éticos sira, mak hanesan: Principio dignidade da pessoa humana, principio de solidariedade, principio de subsidiariedade no principio de reciprocidade.

Iha linguagem empresarial nian, ita bele haré hetan ligação semântica entre liafuan: Empresa, empresário, empregado (trabalhador) no emprego (trabalho). Iha empresa nia laran, empresário mak ida nebé sai nu’udar proprietário no doador do emprego (trabalho), no empregado (trabalhador) mak ida nebé usufrui oportunidade emprego nian. Empresa ida nia sucesso depende ba iha dinâmica reciprocidade relacional nebé cria entre empresário (líder empresarial) ho nia empregados sira. Wainhira relação ida ne’e consegue cria mak empresa la’os de’it sai fatin ba atividade nebé ho fins lucrativos no produtivos, maibé liu-liu sai espaço nebé garante prosperidade, sustentabilidade no produtividade.

Atu hakle’an reflexão kona-ba Santa Kreda nia contribuição do pensamento ba mundo empresarial, ha’u sei fahe apresentação ida ne’e ba parte tolu, mak hanesan:

  • Vocação ba vida empresarial tuir roman Sagrada Escritura nian,
  • Vocação ba vida empresarial tuir Santa Kreda nia hanorin sira no
  • Vocação líder empresarial refletida iha documento Concelho Pontifício Justiça e Paz.
  1. Vocação ba vida empresarial tuir roman Sagrada Escritura

Fundamento husi hanorin sira hotu Santa Kreda nian mak Sagrada Escritura. Iha Sagrada Escritura ita haré Maromak nia liafuan nebé ko’alia ho linguagem ema nian nebé hanorin kona-ba salvação integral ema nian, hahú kedas husi criaçao, revelação, incarnação no redenção. Na’i Maromak tama iha ema nia história concretamente liu husi Pessão Na’i Jesus Kristu nian iha mundo. No Na’i Jesus Kristu nia hanorin sira transmitida fielmente husi Colegio dos Apóstolos, hafoin Padres da Igreja sira simu tutan hanorin sira, interpreta no desenvolve tuir necessidade doutrinal nian, no Magisterio da Igreja Católica preserva no conserva hanorin sira hotu no interpreta tuir condição atual nebé Igreja iha época ida-idak hasoru. Santo Padre hamutuk ho Bispo sira, iha espirito sinodalidade nian, la’o hamutuk hodi buka fo solução ba fenómenos problemas atuais sira nebé ligado ho ema nia moris no ema nia fiar ba Na’i Maromak.

Wainhira ita lê Sagrada Escritura, aparentemente la existe temática especial ida nebé ligado direta ho vocação ba vida empresarial, maibé temática ne’e bele desenvolve liu husi halo leitura interpretativa ida ba Na’i Maromak nia liafuan no hanorin sira iha Antigo Testamento no iha Novo Testamento.

Iha Antigo Testamento, hahú kedas husi história criação nian iha Livro Génesis, ita bele haré ona fundamento husi vocação hotu-hotu iha vida trabalho humano nian. Iha Gen. 2, 15 dehan nunee: E tomou o Senhor Deus o homem, e o pôs no jardim do Éden para o lavrar e o guardar. Na’i Maromak tau ema iha jardim Eden atu serviço no atu sai guardião. Iha ne’e, Na’i Maromak fo ba ema primeiro nebé Nia cria (Adam) responsabilidade ida atu sai guardião ba criatura sira seluk nebé moris haleu nia. Ema nia vocação primário mak atu sai guardião da terra. Ida ne’e la’os katak nia atu uza iha monopólio domínio nian ba criatura sira seluk, maibé liu-liu atu participa iha obra creatiz Na’i Maromak nian, colabora ho Na’i Maromak ba salvaguarda criatura sira. (cfr. Enrico Chiavacci, Teologia Morale).

Ema realiza nia-an liu husi nia serviço no simu vocação atu hatene moris iha cultura do cuidado, katak tau matan, conserva no preserva rikusoin hotu rai ne’e nian atu bele iha nafatin husi geração ida ba geração seluk (Cfr. Pontificio Commissione Biblica, Che Cosa è l’uomo?).  Hala’o Serviço no sai guardião nu’udar atividade rua nebé la’o hamutuk, no colabora ho Na’i Maromak nia presença; ida ne’e haktuir iha livro Salmo nian, nebé dehan: Se o SENHOR não edificar a casa, em vão trabalham os que a edificam (trabalham); se o SENHOR não guardar a cidade, em vão vigia a sentinela(Salmo 127). Ida ne’e katak, sem colaboração ho Na’i Maromak, atividade humana hotu perde nia sentido; maibé, enquanto ho Na’i Maromak nia tulun atividade humana hotu sei produtivo no iha benéficio liu tan. (Cfr. Pontificio Commissione Biblica, Che Cosa è l’uomo?)

Iha Novo Testamento existe princípio moral ida nebé foti husi Jesus nia hanorin, nebé dehan:“A quem muito foi dado, muito será exigido; e a quem muito for confiado, muito será pedido” (Lc 12, 48). Princípio moral ida ne’e vale ba lideres empresariais cristãos sira iha exerce sira nia função nu’udar líder iha empresa, sira tenki consciente katak sira simu recursos (bens) barak ona no Na’i Maromak sei husu conta oinsá sira executa recursos hirak nebé sira iha ba bem estar família humana nian (Cfr. Conselho Pontifício Justiça e Paz, a vocação do líder empresarial).

  1. Vocação ba vida empresarial tuir hanorin Santa Kreda nian

Perante problema económico, social no política, Igreja Católica nia presença no posição mak atu defende dignidade ema nian, justiça social, no bem comum. Igreja nia hanorin sira kona-ba vida social, transmitida liu husi ciência Moral Social nebé sai nu’udar estudo sistemático nebé trata kona-ba vida social, política no económica tuir linha hanorin Igreja Católica nian. Iha mos Compendio Doutrina Social da Igreja Católica, nebé apresenta ba católicos sira hotu rai klaran kona-ba princípios hat (4) doutrina social Igreja nian; princípios hirak ne’e mak hanesan: Princípio dignidade da pessoa humana, princípio do bem comum, princípio da subsidiariedade no princípio da solidariedade.

Husi época ida ba época seluk, pontificados sira usa sira nia consciência critica, elabora questão social, política no económica ho método ver-julgar e agir, sira buka fo proposta concreta no princípios basilares nebé bele soluciona problema humana, no haré ba fenómeno mudança epocal nu’udar “sinais dos tempos”. Perante sinais dos tempos nebé humanidade hasoru, Igreja halo discernimento epocal hodi apresenta hanorin nebé folin tebes ba ema nia moris, ba desenvolvimento família humana nian nebé hatuur iha caridade no solidariedade humana.

Hahú husi Papa Leão XIII ho nia encíclica Rerum Novarum (1891) nebé trata de modo especial kona-ba “o mundo do trabalho humano”. Hafoin, Papa Paulo VI ho nia encíclica Populorum Progressio (1967), nebé trata kona-ba Igreja nia hanorin kona-ba desenvolvimento no solidariedade humana. No Papa João Paulo II ho nia encíclicas rua (2) marcante: Solicitudo Rei Socialis (1987) no Centessimus Annus (1991). Papa halo critica maka’as hasoru sistemas económicos no políticos nebé sacrifica ema nia dignidade ba interesse ideológicos no económicos nian.  Papa Bento XVI iha nia encíclicas sira, hanesan: Deus Caritas Est (2006),  Spe Salvi (2007), no Caritas in Veritate (2009). Iha parte balun husi encíclicas hirak ne’e, Papa Emérito maktoban apresenta mos nia pensamento económico, ba Papa Bento motor husi sociedade ne’e mak ema, la’os instrumentos nebe nia usa. Ho nune’e, bem estar ema nian mak condição sine qua nonba bem estar iha vida económica no politica. Papa Francisco iha nia exortação apostólica Evangelii Gaudium (2013), nia toca mos kona-ba vida económica no política, pontificado atual considera sira nebé hala’o vida política no vida empresarial nu’udar vocação no missão ida nebé nobre.

Papa Francisco nia preocupação kona-ba questão política, social, económica no ambiental nia elabora sistematicamente iha nia encíclica rua (2): Laudato si (2015) no iha Fratelli Tutti (2020). Expressão famosa Papa Francisco nian nebé mak ita hasoru iha encíclica rua ne’e mak: “Buat hotu interligado ka interconectado”. Ho nune’e, ita ko’alia kona-ba questão política, económica no social la ses mos husi questão ambiental nebé dala barak liu sofre consequência husi sistemas políticas no económicas sira nebé hatuur demasiadamente interesse grupo balun ka ema balun nian de’it, hodi sacrifica ambiente no ema barak nia moris. Empresa sira ohin loron, fortemente influenciado husi poder económico capitalístico ho sistema económica neoliberalista caraterizado ho domínio mercadoria livre nian, sem intervenção direta husi estado. Possibilita empresa boot sira iha mundo atu aproveita lucro boot liu hodi hamate empresa ki’ik-oan sira.  Wainhira lucro mak sai único alvo ona, halo ema taka fuan ba ema seluk nia sofrimento; ida ne’e mak cria desigualdade iha vida social, hamosu desemprego no aumento número de pobreza iha nações sira terçeiro mundo nian, halo nação riku sira riku ba bebeik no nação kiak sira sai kiak ba bebeik. Husi Papado ida ba Papado seluk, iha época nebé la hanesan, hasoru fisionomia husi problema político, social, económica no ambiental nebé diferente. Igreja continua hatudu nia preocupação ba ema nia moris, ema nia dignidade no hanorin kona-ba compressão humana ida nebé mais integral.

Atu transforma mentalidade ema ohin loron, precisa muda paradigma tuan ba paradigma foun. Se paradigma tuan iha mundo económica fragmentada, nebé halo ema fo importância liu ba vida económica de’it iha relação ho mercado, produto no lucro de’it, hodi hamosu problemas sociais no existenciais sira iha tempo atual.  Oras ne’e, ita precisa duni halo paradigma foun nebé haré buat hotu ne’e interligado ka interconectado, abrange aspecto hotu ema nia moris; ho nune’e de’it mak bele mosu sistema política no económica foun nebé tane aas ema nia dignidade, liberdade no bem-estar ema nian. Iha paradigma foun ne’e mak ita bele compreende, katak vocação ba vida empresarial nu’udar missão ida nebé nobre tebes, no sira nebé sai proprietários ba empresas sira, lidera sira nia empresa ho fuan nebé nakonu ho domin no nakloke ba ema seluk nia necessidade. Cria campo trabalho nebé digno ba ema no fo salario nebé justo atu empregado (trabalhador) bele sustenta nia-an no nia família.

  1. Vocação líder empresarial refletida iha documento Concelho Pontifício Justiça e Paz.

Iha tinan 2013, Concelho Pontifício Justiça e Paz, consegue publica documento ida intitulado: “A vocação do líder empresarial, uma reflexão”. Documento ne’e nu’udar resultado husi debate ida nebé hala’o durante loron tolu nia laran iha Roma, hodi halibur ideias husi empresários/as sira, professores universitários no especialista sira iha assunto empresarial nian. Resultado husi encontro hamosu duni documento ida nebé sai mos nu’udar apoio educativo ida nebé ko’alia kona-ba “vocação” ema mane no feto nian iha mundo empresarial, concretamente iha instituição sira, mak hanesan: Cooperativas, corporações multinacionais, negócios familiares, negócios sociais, colaborações com/sem fins lucrativos. (Conselho Pontifício Justiça e Paz, a vocação do líder empresarial)

Iha documento refere, identifica fenómenos hat (4), nebé sai nu’udar “sinais dos tempos” nebé fo impacto ba vida negócio iha tempo ohin loron nian. Fenómenos atuais hat ne’e mak: Globalização, tecnologia das comunicações, Financeirização, no Mudanças Culturais.

  • Globalização lori oportunidade extraordinárias ba mundo negócio nian, maibé mos cria desvantagens sira, mak hanesan: Mosu desigualdade boot iha sociedade, deslocações económicas, homogeneidade cultural, no inabilidade governo nian atu regula fluxos financeiros sira.
  • Tecnologia comunicação possibilita conectividade, hamosu soluções foun no invenção foun sira, hamosu custo mercadoria ida nebé acessível, maibé ninia velocidade rápida no descontrolada cria excesso de informação no exige decisão ida nebé imediato.
  • “Financeirização” husi negócios sira iha escala mundial intensifica liu fali tendências ema nian atu mercantiliza finalidade husi serviço no maximiza riqueza no salario sira nebé hetan ho lalais no fácil; iha ne’e mak predatores lucro nian usa meios hotu atu bele hetan osan lalais no ho quantidade boot kedas.
  • Mudanças Culturais, ita moris daudaun iha época ida nebé tendencialmente individualística e utilitarista, halo ema hanoin-an no ba nia di’ak de’it, hodi haluha tiha ema seluk nia necessidade. Consequência husi mentalidade; ida ne’e mak mosu desequilíbrio económico, katak ema buka liu bem privado no la preocupa tan ho bem comum.

            Ba fenómenos hat “sinais dos tempos” nebé identificado ona, precisa duni líderes empresariais sira nebé hatene integra dons vida espiritual nian, virtudes sira e  princípios ético-sociais sira iha sira nia moris no sira nia serviço.  Atu sira bele ultrapassa moris ida nebé nakfahe -an tan de’it lucro no rikusoin. Concilio Vaticano II, descreve moris ida hafahe-an katak: Divorcio ka rotura ida entre fiar nebé professa no comportamento lor-loron nian. Lideres empresários cristãos precisa duni sai autentico no integrado; katak, nia fiar la’o hamutuk ho nia hahalok lor-loron nian nebé nia hatudu iha empresa laran ba nia empregados sira no mos ba nia sócios sira.  Empresários/as sira simu vocação no graça atu promove desenvolvimento integral husi sujeito hotu iha empresa laran. Iha ne’e mak vale princípio de solidariedade e de reciprocidade iha relação entre líderes empresariais, empregados no consumidores. Wainhira mosu relação nebé genuino tríplice relacional (empresario, empregado, no consumidor) mak empresa ne’e sei desenvolve-an no sei contribui duni ba bem-estar família humana nian.

Iha expressão Ingesa ida nebé dehan: “We are all the product of community, and learning to live with others is at the heart of our development” (The Bible Society of Malaysia; Identity: Identified). Lider ida la monu tun husi lalehan; maibé moris husi ema nia leet, aprende husi responsabilidade ki’ik-oan iha contexto familiar, hafoin ba to’o iha responsabilidade boot sira iha sociedade, iha mundo professional no serviço nian. Ba liderança empresarial ida, importante atu tau iha fuan katak aprende atu moris ho ema seluk mak sai fuan no chave ba desenvolvimento.

Conclusão

“A vocação do empresário é um chamamento humano e cristão genuíno”. Ho nune’e, líder empresarial ida realiza nia-an wainhira nia hatene moris ho maneira autêntica. Nia-an nu’udar ema no nu’udar sarani, hodi la hafahe nia fiar no comportamento lor-loron nian. Líderes empresariais sira hetan chamamento atu concretiza destinação universal dos bens  terrenos ba ema hotu, hodi hein ho fiar metin ba rikusoin boot liu lalehan nian. Lideres empresariais cristãos sira nebé autentico hatene promove bem comum, nebé fundamenta iha verdade, iha fidelidade ba compromissos sira, iha liberdade no iha criatividade.

Ikus liu, ha’u taka discurso ida ne’e ho liafuan husi primeira Carta São Joao nian, nebé dehan: “Filhinhos, não amemos com palavras nem com a lingua, mas com as obras e de verdade! (1Jo 3, 18).

Obrigado.

Fontes:

  1. Bíblia Sagrada
  2. Compendio da Doutrina Social da Igreja Católica
  3. https://www.vatican.va/roman_curia/pontifical_councils/justpeace/documents/rc_pc_justpeace_doc_20060526_compendio-dott-soc_po.html
  4. ENRICO CHIAVACCI, Teologia morale. Morale della vita economica, politica, di comunicazione (Vol. 3/2),  Cittadella editrice,  Assisi, 2008.
  5. Conselho Pontifício Justiça e Paz, A VOCAÇÃO DO LÍDER EMPRESARIAL, UMA REFLEXÃO; http://www.iustitiaetpax.va/content/dam/giustiziaepace/VBL/Vocation%20Portuguese%20Final.pdf
  6. The Bible Society of Malaysia; IDENTITY: IDENTIFIED, navigating the challenges of life, New Zealand, 2021.
  7. Pontificio Commissione Biblica, CHE COSA È L’UOMO? Un itinerario di antropologia biblica, Libreria editrice vaticana, citta del Vaticano, 2019.
error: Content is protected !!