PAPEL IGREJA CATÓLICA IHA TIMOR-LESTE BA CONSOLIDAÇÃO DAME, DEMOCRACIA NO FRATERNIDADE HUMANA

PAPEL IGREJA CATÓLICA IHA TIMOR LESTE BA CONSOLIDAÇÃO DAME, DEMOCRACIA NO FRATERNIDADE HUMANA

Dom Virgílio Cardeal do Carmo da Silva, SDB

Saudação

• Excelentíssimo Sr. Presidente da República Dr. Jose Ramos Horta.
• Sua Excelência Reverendíssima Monsenhor Marco Sprizzi, Representante da Santa Sé em Timor-Leste
• Sua Excelência o Sr. Dr. José Agostinho, Presidente da CNE
• Excelências dirigentes e representantes dos partidos políticos
• Ilustres Senhores e Senhoras
• E queridos estudantes

Cristo nia dame hela ho imi!

 

Introdução

Liafuan dahuluk nebe husi Cristo moris hi’as hato’o ba nia apostolo sira mak ne’e: Dame horik ho imi! Dame mak liafuan murak mean no presente kmanek liu nebe Cristo moris hi’as haraik ba nia emar sira. Cristo manan ona mate, Nia manan ita ema nia ta’uk, fragilidade, solidão, depressão, nia manan mos odio, vingança, tortura, no violência hotu. Oras ne’e no ba nafatin Cristo mak ita nia dame, iha cruz tutun nia reconcilia ona ita ho Maromak no harahun ona moru fahe malu nian tan odio no vingança hotu (cf Ef 2, 15-16). Nia hamate ona ahi inimizade no divisão nian, nia hatun ona sentimento superioridade no despreza ema nian, hodi fo fatin ba dialogo, comunhão no dame iha ema nia leet. Oras nee no ba nafatin Cristo bolu ita hotu atu sai badaen nain dame nian, nudar nia tenik nanis ona: “Rahun diak ba badain nain sira dame nian, basa ema sei hanaran sira Maromak oan”. (Mt 5,9) Tan ita pertence ba Aman ida deit iha Lalehan mak halo ita hotu considera malu nudar maun-alin no bin-feton. Maun alin no bin feton nebe hamahon an iha mahon ida deit, iha knuk ida hanesan la soi atu foti liman no kroat hodi cria inimizade no funu hasoru malu. Ba ida ne’e Santo Padre Francisco fo hanoin katak: “Na realidade, toda a guerra se revela um fratricídio que destrói o próprio projeto de fraternidade, inscrito na vocação da família humana”.[i]

Conteúdo

1. Educação ba Dame

Tuir compreensão bíblica iha terminologia tolu atu hateten kona ba dame: (shalom iha lian hebraico, eiréne iha lian Grego no pax iha lian Latina. Terminologia tolu nee engloba mensagem hotu dame nian nebe fundamenta iha Jesus Cristo nia pessoa. Liafuan Shalom iha Antigo Testamento significa bênção, proteção, saúde, prosperidade, bem-estar integral no relação harmoniosa entre ema ho Maromak. Liafuan eirene fali refere ba condição no tempo husi ausência funu nian, no liafuan pax refere ba pacto ida nebe halo entre imperador ho nia povo atu moris iha dame nia laran, babain romano sira hanaran pax augusta ka pax romana.

• Luta hasoru desafio primordial: agressividade.

Buat nebe sai desafio ba hari dame mak wainhira ema halo tuir deit nia instinto animalesco nebe agressivo no violento. Infelizmente agressividade no violência hola parte iha bagagem genética ema nian nebe bele mosu iha qualquer tempo, enquanto ema la controla tan ona nia emoção. Iha nee mak ema age ka halo tuir nia natureza animal nian, nebe uza agressão nudar instinto necessário ida atu buka ka hadau aihan no nudar meio ida atu defende an. Ita nia especie (ema) desenvolve instinto ida nee ho forma violenta antes de domesticação animal sira no cultivação plantação sira, ema moris hodi luta no hadau malu ba aihan, moris nudar caçadores no coletores, hodi luta ba nia sobrevivência. Perante instinto animalesco ida nee educação mak bele transforma ema husi agressividade ba iha moris ida nebe pacifica no harmónica entre familia humana no ho natureza.[ii]

• Dame nee processo ida

Educação mak sei determina orientação pacifica husi comunidade sira no crescimento harmoniosa ema nian. Dame iha sentido ida nee katak processo ida nebe continua halo, iha acontecimento histórico sira, ema buka atu discerne no orienta nia án. Ba ema fiar nain sira, atu harii no hametin dame nia buka nafatin simu roman husi ação pacificadora Maromak nian iha situação hotu.

Existe dimensão rua dame nian: ida pessoal no ida seluk social. Dame iha dimensão pessoal katak harmonia entre componente sira hotu individuo ida nian (física, biológica, psíquica no espiritual). Dame iha dimensão social fali katak harmonia entre estrutura hotu iha socieade. Dimensão rua nee completa malu, ida precisa ida seluk no bele mos ida hahoris ida seluk. Husi nee mak ita bele compreende Mahatma Gandhi nia liafuan nebe dehan: “ema nebe la iha dame ho nia an rasik, nia sei funu hasoru mundo tomak”. Problema fundamental husi ema nebe associal, la hatene colabora, nakonu ho conflito, odio, vingança no violento iha liafuan no hahalok bele mai husi fuan ida nebe la iha dame ho án rasik. Hahalok no liafuan husi fuan nebe violento no conflituoso ema ida nian reflete fuan ida nebe nakonu ho rancor. Ho nunee, necessário atu halo uluk dame ka reconcilia uluk lai ho an rasik, atu bele hatene moris iha dame ho ema seluk.

Badaen nain dame nian mak ema sira nebe moris ona iha dame dimensão pessoal nian ho nunee conduz sira hodi fo influencia positiva no pacifica ba sociedade. Comunidade nebe sai ona construtores da paz mak grupo social solida no harmónica. Atu hatur princípio ida nebe solido dame nian mak precisa duni dimensão spiritual nudar dimensão ida aas liu atu garante paz individual no paz social. Ida nee processo ida ba maturidade compreensão kona ba dame, no atu too iha maturidade ida nunee, ba ema cristão sira hatur nafatin Jesus Cristo nudar shalom,  eirene no iha Cristo mak pacto hotu dame nian simu nia forca.

Atu dame bele consolida metin iha ita ema nia moris mak componente rua iha sociedade (adultos no foinsae sira) hatur opçao fundamental nebe claro kona ba dame. Ema adulto sira precisa hafoun lor-loron iha sira nia compromisso ba dame. Ema nebe mak hili lao tuir dalan dame nian tenke tau atençao ba mudanças necessarias sira, no hatur nia espírito iha parâmetro foun sira lor-loron nian, tamba instintos primordiais sira agressividade no egoísmo nian wainhira la controla ho diak bele cria desequilíbrio ba harmonia social. Ba foinsae sira, iha sira nia estado nebe sei flexivel, sira buka halo conversão ida definitiva hodi soe tiha hahalok violência nian atu moris nudar badaen nain dame nian. Iha kedas ona juventude, nia hatene hatur ona opção fundamental dame nian, atu nee sai princípio da vida ida nebe conduz atu iha relação nebe pacifica iha nia relação ho ema seluk. Husi nee mak ita bele hari paz ida nebe solida iha sociedade. Ho nunee, ita bele hare katak invocação dame nian nebe mai husi ema tenke interpreta ho maneira coerente iha moris no dom dame nian nebe mai husi leten husu atu ema hatene simu no rai metin. No dalan nebe ema sei lao tuir mak educação ba dame, liu husi dalan educação nian deit mak dame bele hari metin iha rai.[iii] Igreja católica husi tempo ba tempo serviço makaas ba edificação no consolidação paz iha familia humana. Husi encíclica Pacem in Terris, Papa Joao XXIII nian nebe fo sai iha tinan 1963, too iha encíclica Papa Francisco nian Fratelli Tutti, hatudu duni Igreja nia esforço constante atu educa ema hodi consolida dame no fraternidade humana.

2. Igreja Católica nia papel ba hametin dame no fraternidade humana.

Vocação no missão Igreja Católica nian atu sai badaen nain dame nain hodi hametin dame, domin no fraternidade humana, no ida nee fundamenta iha Jesus Cristo nia pessoa no nia hanorin sira. Igreja continua haklaken no habelar cultura dame nian iha nia missão. Santo Padre sira husi tempo ida ba tempo seluk, hakat liu período histórico-político nebe la hanesan, sira nafatin koalia no bolu ema atu moris iha dame hodi hadook an husi conflito oi-oin nebe bele acontece tamba arrogância no tendência agressiva ema nian.

Wainhira atu mosu dadaun tenção política entre Cuba ho América iha tinan 1963, Papa João XXIII fo sai nia encíclica Pacem in terris bolu atenção ba liderança mundial sira atu hamoris dame laos funu iha ema nia leet. Santo Padre hateten iha inicio husi nia enciclica katak: “A paz na terra, anseio profundo de todos os homens de todos os tempos, não se pode estabelecer nem consolidar senão no pleno respeito da ordem instituída por Deus”.[iv] Hafoin Papa Paulo VI iha tinan 1969, iha celebração 3º dia mundial da paz, nia fo mensagem kona ba papel Igreja nian atu harii dame, hodi dehan: “… é Nossa missão repetir a palavra «Paz», no meio dos homens em luta uns contra os outros. É Nossa missão recordar aos mesmos homens que são irmãos. É Nossa missão ensinar, ainda, a todos esses homens, a amarem-se, a reconciliarem-se e a educarem-se para a Paz. Manifestamos, por isso, o Nosso aplauso, o Nosso apoio e a Nossa esperança a todos aqueles que se tornam promotores desta pedagogia da Paz”.[v] No iha Papa Joao Paulo II nia tempo, nia mos hatoo mensagem lubuk ida kona ba dame, no iha mensagem ida, nia fo hanoin ba foinsae sira hodi dehan: “Jovens, sede construtores da paz! Vocês são operadores pleno neste grande trabalho comum. Resista aos confortos que o fazem dormir na triste mediocridade e à violência estéril com que certos adultos, que não estão em paz consigo mesmos, às vezes querem explorá-lo”.[vi] Iha tinan 2006, Papa Bento XVI, iha nia mensagem ida kona ba dame hodi celebra dia mundial paz nian iha tinan neba, nia dehan: “O tema de reflexão deste ano — «Na verdade, a paz» — exprime esta convicção: sempre que o homem se deixa iluminar pelo esplendor da verdade, empreende quase naturalmente o caminho da paz.[vii]  No Papa Francisco iha nia primeira mensagem ba loron mundial paz nian, nia dehan: “Na realidade, a fraternidade é uma dimensão essencial do homem, sendo ele um ser relacional. A consciência viva desta dimensão relacional leva-nos a ver e tratar cada pessoa como uma verdadeira irmã e um verdadeiro irmão; sem tal consciência, torna-se impossível a construção duma sociedade justa, duma paz firme e duradoura”.[viii] No iha parte conclusiva husi mensagem paz ne’e Papa apela ba política sira hodi dehan: “O necessário realismo da política e da economia não pode reduzir-se a um tecnicismo sem ideal, que ignora a dimensão transcendente do homem. Quando falta esta abertura a Deus, toda a atividade humana se torna mais pobre, e as pessoas são reduzidas a objeto passível de exploração. Somente se a política e a economia aceitarem mover-se no amplo espaço assegurado por esta abertura Àquele que ama todo o homem e mulher, é que conseguirão estruturar-se com base num verdadeiro espírito de caridade fraterna e poderão ser instrumento eficaz de desenvolvimento humano integral e de paz.”[ix] Husi mensagem rua nee ita hare katak Santo Padre atual nia preocupação ba fraternidade humana hola parte iha nia programa hotu pontificado nian, no ida nee sai forte liu tan ho nia encíclica Fratelli Tutti nebe fo sai ba mundo tomak iha tinan 2020. Atu Fraternidade humana labele sai deit nudar slogan mamuk ida, precisa duni componente hotu sociedade nian atu serviço hamutuk, moris iha solidariedade no unidade. No Igreja nia esforço constante atu educa nafatin ba cultura dame nian tamba kaer metin nia principio katak atu sai guardião da vida, hodi defende dignidade da pessoa humana, bem comum da família humana, no direito fundamental sira ema nian.

3. Democracia

Qualquer sistema hotu nebe ema cria tuir lolos serve atu garante ema nia moris no progresso integral ema nian. Sistema nee atu facilita dinâmica governativa nian atu serbi sociedade, labele sacrifica ema nia moris ba sistema ruma, ka ba ideologia ruma, ida nee acontece ona iha historia no husik hela tinta mean nebe nakonu ho ran ba humanidade. Ho nunee, sistema de governação democrática precisa hatur metin iha respeita ba direito sira ema nian, dignifica ema no uza atu atinge bem comum nebe integrado iha ema nia moris. Atu too iha nee, ita precisa compreensão ida nebe pleno kona ba ema, hodi cria processo sira hotu nebe constrói povo ida, liu fali atu hetan deit resultado imediato sira nebe mak produz deit política ida nebe fácil, rápida, efémera, maibe la too iha construção ba plenitude humana. Ba ida nee, teólogo no filosofo Romano Guardini comenta nunee: “O único modelo para avaliar com sucesso uma época é perguntar até que ponto se desenvolve nela e alcança uma autêntica razão de ser a plenitude da existência humana, de acordo com o caráter peculiar e as possibilidades da própria época”.[x] Historia mak sei julga decisão politica hotu nebe ita ema foti ba existência no sobrevivência humanidade nian. Sistema democracia hatur iha povo nia escolha no decisão, ho nunee, ema sira nebe harii partido no halibur malu iha partido, precisa kuda iha fuan katak sira iha neba atu serbi povo. Se hetan cadeira tambá simu confiança husi povo, atu representa povo no atu ukun hodi respeita povo nia moris no nia lian. Teólogo no jurista alemão ida naran Karl Schimdt iha nia obra teologia politica nia hakerek nunee:  “… o Estado se fundamenta como unidade política a partir da vinculação de dois princípios de formação, o princípio da identidade (do povo presente consigo mesmo como unidade política, quando, em virtude da própria consciência política e vontade nacional, tem aptidão para distinguir entre amigo e inimigo) e o princípio da representação, em virtude do qual a unidade política é representada pelo governo.[xi] Iha governação ida democrática princípio rua nee tenke lao hamutuk. Ho nunee, mak teólogo alemão naran Muller acrescenta: “Povo” não pode ser uma instância materializada; “povo” é, sobretudo, um processo que é configurado (e reconfigurado) através do tempo. É um conceito que envolve não só o conjunto de pessoas que habita um país, mas também as gerações passadas e futuras”. Povo laos deit mak geração atual, maibe povo mos mak geracao nebe liu ona no geração nebe sei tuir mai. Tamba qualquer decisão politica nebe geração atual halo precisa tau consideração ba geração nebe liu ona no geração tuir mai nia vivencia no sobrevivência.

Atu hatur metin princípio democrático iha sociedade Timorense precisa uluk knanain educa timor oan sira atu hatene considera malu nudar Timor-oan. Ita hanaran-an Timor-oan tambá ita sentimento de pertenço ba rai ida nee, ba família husi rai ida nee katak ita pertence ba inan ida nebe hakuak ita no Aman ida iha Lalehan nebe bali nafatin ita hotu. Ho ida nee mak halo ita hare malu nudar maun-alin no bin-feton. Wainhira ita moris iha domin maun-alin no bin-feton mak sei hamate rivalidade, competição, inimizade, tan deit partido, cor, raça, religião, nst.

Conclusão

Papel Igreja Católica iha Timor ba edificação dame, fraternidade humana no democracia. Igreja iha Timor ho espírito sinodalidade nian la’o hamutuk ho Igreja universal nia esforço constante atu harí no hametin dame ida nebe solida. Ida nee Igreja hatudu ona iha nia contribuição durante processo ba autodeterminação Timor nian. No ohin loron iha processo construção do estado a afirmação identidade povo no rai Timor nian, Amo Bispo sira hamutuk ho Nailulik sira, Missionario sira, religioso consagrado no consagrada sira hamutuk ho sarani diak sira continua contribui nafatin ba sociedade ida nebe pacifica no fraterno iha contexto pais democrático Timor Leste nian.

Reconhece katak empenho ba consolidação dame, fraternidade no democracia nee precisa hatur iha espirito de dialogo, iha colaboração mutua, iha unidade no solidariedade entre Igreja ho Estado Timorense, ho nunee Igreja apela ba sira hotu nebe concorre dadaun ba eleição geral ida nee, ba responsável partido sira hotu no ba ema hotu nebe halibur malu iha partido ruma, atu sai badaen nain dame nian, considera malu nudar maun-alin no bin-feton, hatur programa politica ida nebe buka bem comum timor oan hotu nian, educa povo atu moris iha espirito democrático, halo boot iha imi nia fuan espirito solidariedade nian hodi hamate competição no rivalidade nebe acontece ona iha passado no ita lakohi atu ida nee continua acontece iha geração sira tuir mai. Ita hirak nebe ohin loron iha nee ita deve ba sira nebe oras nee laiha ona, maibe ita mos sei responsabiliza ba sira geração ida nebe sei mai. Ita nia beiala sira hanorin ona ita atu hatene nahe biti boot hodi tur hamutuk atu koalia, atu hadia naksalak sira, atu halos dala terik sira, atu lao hamutuk kaer liman ba malu hodi lori timor ida nebe naroman ohin loron no aban bainrua.

Obrigado ba atenção.

[i] MENSAGEM DO SANTO PADRE FRANCISCO PARA A CELEBRAÇÃO DO DIA MUNDIAL DA PAZ, 1º DE JANEIRO DE 2020 «A PAZ COMO CAMINHO DE ESPERANÇA: DIÁLOGO, RECONCILIAÇÃO E CONVERSÃO ECOLÓGICA»

[ii] Cf. https://notedipastoralegiovanile.it/index.php?option=com_content&view=article&id=8335:lbeati-i-costruttori-di-pacer-mt-5-9&catid=109&Itemid=101

[iii] Cf.  EDUCARE ALLA PACE, COMMISSIONE GIUSTIZIA E PACE CEI (1998).

[iv] ENCICLICA PACEM IN TERRIS, PAPA JOAO XXII,  N.1.

[v] MENSAGEM DE SUA SANTIDADE, PAPA PAULO VI PARA A CELEBRAÇÃO DO III DIA MUNDIAL DA PAZ, 1 DE JANEIRO DE 1970, EDUCAR PARA A PAZ, ATRAVÉS DA RECONCILIAÇÃO).

[vi] (MESSAGGIO DEL SANTO PADRE GIOVANNI PAOLO II PER LA CELEBRAZIONE DELLA XII GIORNATA MONDIALE DELLA PACE 1° GENNAIO 1979 PER GIUNGERE ALLA PACE, EDUCARE ALLA PACE, N.12.

[vii] MENSAGEM DE SUA SANTIDADE BENTO XVI PARA A CELEBRAÇÃO DO DIA MUNDIAL DA PAZ, 1 DE JANEIRO DE 2006, NA VERDADE, A PAZ, N.3.

[viii] MENSAGEM DO SANTO PADRE FRANCISCO PARA A CELEBRAÇÃO DO XLVII DIA MUNDIAL DA PAZ, 1º DE JANEIRO DE 2014, FRATERNIDADE, FUNDAMENTO E CAMINHO PARA A PAZ.

[ix] Ibid.

[x] HTTPS://IHU.UNISINOS.BR/78-NOTICIAS/599178-PRINCIPIOS-PARA-UM-NOVO-ORDENAMENTO.

[xi] HTTPS://WWW12.SENADO.LEG.BR/RIL/EDICOES/47/185/RIL_V47_N185_P161.PDF.