PERSPETIVA IGREJA NIAN RELACIONA HO CAUSA SIRA CORRUPÇÃO NO OINSÁ HAMETIN INTEGRIDADE BA PREVENE NO COMBATE CORRUPÇÃO IHA TIMOR-LESTE
Dom Virgílio Cardeal do Carmo da Silva, SDB
(Texto husi discurso nebe hato’o iha loron mundial anti-corrupção nian iha tinan 2023)
Introdução
Tópico nebé comissão organizadora conferência nacional ba comemora loron mundial anti-corrupção nian fo mai ha’u atu partilha mak: PERSPETIVA IGREJA RELACIONA HO CAUSA SIRA CORRUPÇÃO NO OINSÁ HAMETIN INTEGRIDADE BA PREVENE NO COMBATE CORRUPÇÃO IHA TIMOR LESTE.
Em geral, elaboração temática ida ne’e sei fahe ba parte tolu: ba dahuluk nian, mak ko’alia kona-ba perspetiva bíblica kona-ba corrupção, hafoin apresenta Igreja nia hanoin relasiona ho causa sira corrupção nian no iha parte datoluk nian mak sei apresenta dalan ka proposta balun atu hametin integridade ba prevene no combate corrupção iha ita nia rain.
- Perspetiva bíblica kona-ba corrupção
Iha horizonte bíblico pratica corrupção nian, considerado nu’udar hahalok pecado nian, ho nune’e, Antigo Testamento condena hahalok nebé corrupto tamba estraga relacionamento ema ho ema no ema ho Na’i Maromak. Tuir perspetiva Testamento tuan nian, sira nebé corrupto halo buat nebé abomináveis no la buka bem comum (Sal 13,1). Sira adora fali ídolos sira nebé estraga (corrompe) sira nia moris (Sab 14,12), desordens sexuais sira hatudu sinal corrupção fuan nian (Sab 14,26), hahalok corrupção lori ba hahalok negativo sira seluk, mak hanesan: Assassínio, na’ok, bosok, deslealdade, pessoa revoltosa no enganosa (Sab 14,25) . Iha âmbito jurídico nian, condena maka’as mos hahalok juízes sira nebé aceita presentes sira hodi nakfilak processo justiça nian sai fali lahan bisnis, atu defende de’it ema riku sira nia causa, hodi hanehan ema kiak sira (cf. 1Sam 8.3, Mi 7.3, Dt 25.1). Profeta Isaias critica maka’as hahalok corrupção lideres sira povo Israel nian hodi dehan: “Seus líderes são rebeldes e cúmplices de ladrões. Todos estão ansiosos por presentes e receber gorjetas. Não fazem justiça ao órfão e a causa da viúva não chega até eles” (Is 1:21.23). Pratica corrupção iha ne’e, ligado ho aceita presentes sira nebé ema fo atu sira bele taka ibun hasoru injustiça no hahalok discriminação nian ba feto faluk no oan kiak sira. Biblista italiano ida comenta nune’e: “Quem aceita a corrupção para satisfazer as suas ambições, vaidade, sonhos de glória e riqueza, procede a uma progressiva anestesia da sua consciência, num processo irreversível de prostituição que o leva ao aniquilamento total da sua existência”. Pratica corrupção ne’e la’o iha dinâmica ida, hahú ho aceita corrupção, lori ba progressiva anestesia da consciência, hafoin lori ba traição no harahun ema nia existência rasik.
Iha Novo Testamento, hahalok corrupção cosidera nu’udar hahalok sala ka pecado nian; salan nebé lori ema ba mate tamba nia fragilidade (cfr. At 13,34-36). São Paulo ko’alia kona-ba cativas companhias sira nebé harahun (corrompe) costume ka toman di’ak iha comunidade (1Cor 9,25). São Pedro iha nia carta explica: Luxúria katak hakarak (desejo) isin nian nebé domina ema nia fuan mak sai nu’udar causa husi corrupção (2Pd 2,12). Novo Testamento enfatiza katak buat aat hotu ema ne’e reside ka hela iha ema nia fuan. Ida ne’e ita bele haré iha relato São Marcos nian, nebé apresenta Na’i Jesus nia hanorin, katak: O que sai do homem é que o torna impuro. Pois do interior do coração dos homens vêm os maus pensamentos, as imoralidades sexuais, os roubos, os homicídios, os adultérios, as cobiças, as maldades, o engano, a devassidão, a inveja, a calúnia, a arrogância e a insensatez. Todos esses males vêm de dentro e tornam o homem impuro” (Mc 7,20-23). Iha fuan nebé corrupto mak roubo (na’ok) sai tiha fali toman ida. Ema hahú lakon sentido de culpa, katak la sente tan ona sala wainhira na’ok no halo corrupção.
Sagrada Escritura uza liafuan aramaico mamon; katak, patrimônio ruma, nebé bele refere ba osan ka denaro, bele mos refere ba posses (rikusoin) sira. Mamon bele troca fali Na’i Maromak nia fatin iha ema nia fuan; tamba iha ema nia-an nakonu ho ambição ba osan, rikusoin, no posição. No ba ida ne’e, biblista ida comenta nune’e: “Para aqueles que escolhem mamon, o interesse, a ganância, o desejo de possuir tornam-se a norma suprema a partir da qual submetem toda verdade, toda moral…” Wainhira ema monu ona ba sedução mamon nian, nia sei halo buat hotu atu bele atinge nia interesse, nia ganância, nia hakarak sira atu acumula no possui osan, rikusoin, posição ruma, prestígio no privilegio ruma. No atu labele monu ba sedução mamon nian, mak Na’i Jesus hanorin: Ninguém pode servir a dois senhores; porque ou há de odiar um e amar o outro, ou se dedicará a um e desprezará o outro. Não podeis servir a Deus e a Mamon. (Mt. 6,24; no Lc. 16,13). Wainhira ema hatene serbi Maromak lori ema ba hadomi maun-alin sira, hatene fahe buat nebé nia iha ho kiak no necessitados no marginalizados sira; maibé, se ema hili atu serbi mamon, nia sei buka atu halibur rikusoin hotu ba nia-an de’it, la iha tan caridade no solidariedade ho nia maluk sira nebé mak terus no kiak.
Na’i Jesus Kristu nia hanorin nebé hafanun netik ita nia consciência atu luta no combate hasoru pratica corrupção mak ne’e: “Quem é fiel no pouco, também é fiel no muito, e quem é desonesto no pouco, também é desonesto no muito” (Lc. 16,10). Iha kna’ar hotu função publica nian, liafuan ida ne’e tenke sai princípio moral ida atu regula comportamentos dirigentes no funcionário sira iha sira nia responsabilidade ba res publica. Corrupção acontece tamba falta de sinceridade, falta de honestidade, la iha transparência iha gestão orçamental, la iha fidelidade ba iha compromisso serviço nian, no ikus mai trai confiança ba responsabilidade ruma nebe ema ida assume. Perante hahalok corrupção nian, ligado ho traição ba confiança nian, Donald Cressey, criminólogo no aman husi teoria “triângulo da fraude”, hateten nune’e: “As pessoas traem a confiança que foi depositada nelas quando se deparam com um problema financeiro que não pode ser compartilhado com outras pessoas”. Nia argumenta, katak traição da confiança ida ne’e bele mai husi pressão ruma, hafoin tamba iha deficiência controlo financeiro nian, fo oportunidade atu ema bele bosok no ikus mai buka halo racionalização ba nia ato cometido ka halo auto justificação do defraudador. No iha campo moral ida ne’e, katak pecado ida bolu tan pecado sira seluk.
- Problema corrupção tuir hanoin ka hanorin sira Magistério nian.
Iha tinan 1987, Papa João Paulo II critica maka’as hahalok corrupção iha nia encíclica Solicitudo rei socialis ka solicitudo social da Igreja. Iha encíclica refere denuncia hahalok corrupção nebé praticado iha instituição publica relaciona ho alocação orçamental nebé la’os ba beneficio povo nian; maibé, hariku fali individuo ka grupo balun. Iha encíclica hakerek nune’e: “Enormes somas de dinheiro, que poderiam e deveriam ser destinadas a incrementar o desenvolvimento dos povos, ao contrário, são utilizadas para o enriquecimento de indivíduos ou grupos”. Hafoin iha tinan 1991 liu husi documento Centésimos annus, Papa João Paulo II dala ida tan ko’alia kona-ba problema corrupção, hodi dehan: “Dala barak mak exigências sira nebé mai husi sociedade nian mak governantes sira la examina didi’ak tuir critérios justiça no moralidade; maibé, tuir fali força eleitoral ka financeira nian husi grupos ka partidos sira nebé apoia malu. Hafoin iha Compêndio Doutrina Social Igreja Católica nian, mosu fila fali questão refere, iha numero 411 no 412, ko’alia kona-ba “corrupção politica” nu’udar traição ba princípios morais no ba normas justiça nian.
Iha exortação apostólica Evangelii gaudium, Papa Francisco critica hahalok corrupção nian nebé lori ba desequilíbrio no desigualdade iha sociedade nia moris, liu liu relaciona ho rendimentos. Papa dehan: “Os rendimentos de alguns [que] crescem exponencialmente e os da maioria [que] estão cada vez mais distantes do bem-estar desta feliz minoria”, no Santo Padre considera ida nee nudar: “uma corrupção ramificada e uma evasão fiscal egoísta, que assumiram dimensões globais”. Critica ida ne’e refere substancialmente ba contexto política neoliberal nian nebé fo espaço ba competição iha mercadoria livre, nebé sei facilida de’it lucro nebé boot husi companhia no empresa boot sira no sira rendimento boot, no nação ki’ik no kiak sira continua moris iha pobreza nia laran.
Iha discurso recente ida nebé Santo Padre Francisco halo iha Parlamento Italia nian, hodi descreve causa husi corrupção nian, Santo Padre dehan: “Atu compreende kona-ba problema corrupção, ponto de partida hahú husi ema nia fuan, hafoin iha nia relações no iha nia vínculos sira. Dala ruma ema labele halo vigília ida nebé suficiente perante abismo corrupção nian, hodi husik ema nia-an monu ba tentações sira oportunismo nian, engano no fraude, bele lori ba situação perigosa, katak lakohi atu simu correção husi ema seluk. Wainhira ita taka-an iha auto-suficiencia, hafoin lori ba iha autossatisfação, no ikus ema bele iha pretensão ida, katak nia mak sai norma ba buat hotu. Politica ida nebé desviada, katak buka fali interesse partidária nian em vez interesse comum, bele hatudu mos sinal hahalok corrupção nian. No to’o iha ne’e, ita la rona tan ona voz consciência nian, banaliza hahalok pecado nian, confunde entre lialos no lia-bosok, no aproveita papel responsabilidade publica nian hodi pratica corrupção.
Husi ne’e ita haré, katak Igreja nia posição luta hasoru hahalok ka prática corrupção ne’e inspirado uluk knanain husi Na’i Maromak nia futar-Liafuan, iha kedas ona Testamento Tuan mai to’o Testamento Foun, considera hahalok corrupção nu’udar pecado, tamba corrompe relação ema ho Na’i Maromak no maun-alin sira. Hafoin husi tempo ba tempo, Igreja continua ko’alia hodi defende ema kbiit-laek no kiak sira no condena hahalok corrupção no injustiça social nian. Igreja continua ko’alia hodi promove dignidade ema nian, justiça social no desenvovimento integral ema nian liu husi documentos sira Magistério nian, Compendio Doutrina Social da Igreja Católica no Compendio Catecismo da Igreja Católica. Igreja sei la nonok no continua usa nia voz profética atu ko’alia hasoru domínio poder maligno nian nebé infiltra iha sociedade nia moris.
- Dalan atu hametin integridade ba prevene no combate corrupção iha Timor-Leste.
Igreja enquanto mãe no mestra, nia presença iha mundo, hala’o nia dupla missão katak nu’udar inan, nia continua hako’ak oan sira hotu nebé professa fiar iha Na’i Jesus Cristo, no nu’udar mestra nia buka nafatin atu hanorin ka educa oan sira atu keta la’o sala dalan iha moris sarani nian, no ba sira nebé comete erro ka pecado educa no bolu sira ba conversão fuan no hahalok nian. Igreja usa nia pedagogia atu corrige hodi lori fali ba dalan loos, dalan reconciliação ho Cristo no Nia Igreja. Caminho educativo ida nebé respeita ema nia liberdade, hafoin hein ho domin oan sira nia conversão hanesan haktuir iha parábola Pai Misericordioso iha Evangelho São Lucas 15, 11-32.
Ho nune’e, Igreja nia papel atu hametin integridade ba luta combate corrupção iha ita nia rain mak Igreja propõe princípios balun tuir mai ne’e:
- Princípio dahuluk nian mak obedece ba preceitos rua iha decálogo ka Ukun-fuan sanulu. Atu combate corrupção, ema sarani tenki hatene obedece ba 1º mandamento: Adorar somente a Deus e amá-lo sobre todas as coisas.Catecismo Igreja Católica explica, katak preceitos ida ne’e, além de proíbe ema ba hahalok idolatria nian, bandu mos atu keta comete pecado sira nebé iha relação ho poder, prazer, no osan. Iha ne’e, ita bele haré ona, katak corrupção acontece tamba ema hahú adora osan no poder hodi sai fali mamon nebé troka tiha Na’i Maromak nia fatin. Tamba ne’e, wainhira ema halo corrupção nia comete pecado; uluk knanain contra uluk Na’i Maromak nia Ukun-fuan ba dahuluk nian.
No ema sarani ida hala’o nia knaar iha função pública ka privada, buka atu obedece ba 7º mandamento nebé proíbe atu keta na’ok. Sétimo mandamento proíbe atu labele foti (na’ok) ka hadau injustamente ema seluk nia soin. Ida ne’e nu’udar chamada ida atu hatene respeita ema seluk nia propriedade. No ema precisa prática justiça no caridade iha gestão bens terrestres nian. Atu educa ema hatene buka bem comum, no respeita destinação universal dos bens no direito propriedade privada nian. Iha moris ema cristão nian, hatene hasa’e ba Na’i Maromak bens sira mundo nian liu husi halo prática caridade fraterna iha moris loro-loron nian (Cfr. Catecismo da Igreja Catolica 2401).
- Princípio daruak nian mak preceitos morais nebé iha relação ho propriedade. Iha preceitos morais rua nebé propõe husi moralista Enrico Chiavacci, princípios rua ne’e mak:
- Keta buka atu hariku naresin o nia-an ho bens terrenos; maibé, liu-liu buka hariku-an ho soin lalehan nian;
- Se o iha, no o iha liu, o iha atu fahe ho ema seluk nebé precisa.
Preceito ba dahuluk iha relação ho riqueza. “Non cercare di arrichirti: “Keta buka atu hariku o nia an”.
Tuir moralista Enrico Chiavacci, ema cristão ida nia opção fundamental ne’e mak Kristu, no único bem nebé nia deseja mak Na’i Maromak no nia reino. Ema sarani ida wainhira exerce nia knaar precisa hatene hatuur nia opção fundamental la’os iha sasán em termo de riqueza maibé iha Na’i Maromak. Osan no rikusoin ne’e la’os sai fali único fim desejável, maibé nia haré ida ne’e nu’udar meios; ho nune’e, nia precisa atu iha naton de’it ba nia necessidade moris nian. Nia hatene katak o fim de todo o esforço humano mak Na’i Maromak no nia reino. Wainhira Na’i Maromak hetan fatin iha cada esforço no projeto humano, halo ema hatene loke matan no fuan hodi sente no haré ema seluk nia necessidade. Tentação boot ba ema nebé buka hariku-an de’it, mak iha situação complexa ruma nia bele usa meios ilícitos oi-oin atu bele to’o iha nia desejo ba rikusoin. Nia bele sacrifica ema seluk no bele manipula sistema, atu conquista ideal nebé nia buka.
Concretamente ita bele haré iha problema de corrupção no furto ka na’ok. Tuir Chiavacci, corrupção la’os de’it ida nebé boot iha relação ho código penal; maibé, mos hahú opção moralmente la di’ak nebé ema ida halo ho objetivo (tujuan) atu hariku-an de’it bele sai forma ida husi idolatria osan nian; ho nune’e, lakon ona fidelidade ba Na’i Maromak. Nune’e mos, iha relação ho furto ka na’ok; na’ok atu hetan barak liu tan. Intenção dominante iha furto ne’e mak hakarak foti ema seluk nia sasán ka osan atu hariku-an. Maldade acontece iha ne’e wainhira esforço hariku-an, hodi halo kiak ema seluk. Ho nune’e, ita bele dehan, katak furto manifesta duplo egoísmo: Ida primeiro egoísmo perante Na’i Maromak, no ida segundo egoísmo perante o próximo ka maluk sira. Iha ne’e lori ema pecado no prática injustiça social. Ação imoral hanesan: Corrupção, furto ka na’ok iha relação direta ho oitavo mandamento nebé bandu atu keta na’ok, no indiretamente liga mos ho primeiro mandamento, wainhira ema halo osan, riqueza sai fali ídolo ka maromak falso. Atu keta monu ba iha tentação hariku-na de’it no idolatria nian, mak precisa prática preceito ida segundo nian nebé iha relação direta ho acção caridade no solidariedade humana.
Segundo Preceito: “se hai, hai per dare” Se o iha, iha atu hatene fo ka fahe”.
Preceito ne’e parte husi princípio ida katak, “se iha, no iha liu ka ultrapassa o nia necessidade. Ida ne’e hanorin o atu hatene fahe ho ema seluk nebé precisa”. Propriedade ne’e iha sentido wainhira lori ita hatene halo caridade ho ema seluk, hatene moris hodi buka justiça no reino Na’i Maromak nian. Desiquilibrio iha vida social nian mak wainhira ita iha ida riku liu tiha no iha ida seluk kiak rabat rai; ida ne’e bele acontece tamba sociedade moris ho lógica de acumular, katak halibur ba-an rasik de’it ka ba grupo de’it. Pobreza no miséria barak acontece iha mundo ne’e tamba fruto husi sociedade ida nebé moris hodi hanoin acumula buat hotu ba-an de’it no ba grupo de’it, hodi taka matan ba ema seluk nia situação terus, kiak no hamlaha. Ema Sarani precisa liu-liu hatene moris ho lógica de partilha ka fahe. Por mais que ema hatene moris hodi prática caridade, mundo sai justo liu, solidário, no fraterno liu tan.
- Princípio datolu nian mak mudança de paradigma político, econômico, social no educativo. Precisa halo paradigma foun nebé hatuur nia fundamento iha dignidade humana, virtude de solidariedade no caridade, justiça social no bem comum. Princípio ida ne’e ilumina husi Santo Padre Francisco nia hanoin atu combate problema corrupção nian. Santo Padre convida políticos sira atu halo paradigma foun ida hodi luta contra corrupção, paradigma nebé abrange componentes tolu: Politica, econômica no consciência civil. Iha aspecto politico nian, precisa duni hatuur justiça social nu’udar interesse comum husik hirak nebé hala’o iha governação nian. Iha aspeto econômico precisa duni corrige no hamoos tiha mecanismo no sistemas sira hotu nebé lori ema moris iha desigualdade no kiak iha fatin hotu. Iha aspeto social no educativo nian, precisa construí consciência civil foun ida. Consciência civil ne’e hatuur iha paradigma educativo ida nebé foun, nebé hanorin ema atu hatene moris iha vigilância ida constante ba nia hahalok no escolha loro-loron nian, conhece no identifica fenômenos sira hotu nebé bele lori ema ba halo corrupção, atu bele prevene antecipadamente, no ema hotu precisa duni serviço maka’as atu combate hasoru forma oi-oin prática corrupção nian, no iha ne’e katak família humana hatene cria relação ida nebé autentico, moris iha solidariedade no fraternidade.
Referencias:
-
Bíblia Sagrada
-
Compendio da Doutrina Social da Igreja Católica
https://www.vatican.va/roman_curia/pontifical_councils/justpeace/documents/rc_pc_justpeace_doc_20060526_compendio-dott-soc_po.html
-
Catecismo da Igreja Católica https://www.vatican.va/archive/cathechism_po/index_new/p3s2cap1_2083-2195_po.html
-
ENRICO CHIAVACCI, Teologia morale. Morale della vita economica, politica, di comunicazione (Vol. 3/2), Cittadella editrice, Assisi, 2008.
-
Non lasciamoci corrompere: l’intervento del biblista Alberto Maggi https://www.illibraio.it/news/saggistica/non-lasciamoci-corrompere-582095/