Reflexão Dominical – Domingo XXIX tempo Baibain – Tinan A

Leitura sira iha Domingo ba dala ruanulu resin sia tempo baibain, tinan A nian acentua tema importante ida kona ba Maromak nia ukun no kbiit nebé boot no aas liu kbiit hotu-hotu iha realidade no história povo Israel no humanidade nian. Kbiit, domin no aliança Maromak nian metin no fiel nafatin ba Nia povo iha tempo hotu-hotu história nian. Povo Israel sai povo eleito Maromak nian tan aliança nebé Maromak halo ona ho Abraão, Isaac no Jacob (Patriárcas). Hahú kedas husi aliança ho Abraão, Maromak promete atu fo bênção wain naresin ba Abraão no nia geração sira ba nafatin (cf. Gen 12,2-3). Maromak cumpri nia promessa ne’e iha história tomak Povo Israel nian (cf. Ex. 3,6-9). Buat nebé Maromak husu ba povo Israel mak, atu povo ida ne’e labele iha Maromak seluk. Israel nia Maromak mak Maromak ida mesak: Maromak Patriarca sira nian no Maromak libertador povo Israel husi rai Egipto (cf. Deut 6,4-9). Leitura sira Domingo nee nian, lori ita atu tama oitoan hodi buka no descobre Maromak iha povo Israel nia história.

Ita lee karik, história povo Israel nian nakonu ho momento naruk sira terus nian. Por exemplo, povo Israel terus nudar atan iha rai Egipto (+/-sec. XII a.c.), terus exílio nian iha rai Babilónia (587 – 538 a.c.), terus tan exílio persiano (538 – 333 a.c.) no iha tempo Jesus nian rai Israel hetan ocupação husi império bot Romano (63 a.c. – 4d.c.).

Iha situação todan no moruk sira hanesan ne’e, tendência boot rua mak mosu hasoru povo Israel: primeiro, ukun na’in boot pagão nian obriga povo Israel atu husik nia identidade cultural no religiosa; segundo, povo Israel lakon memória eh haluhan ninia identidade rasik nudar povo eleito.

Iha leitura dahuluk nebé ita rona, koalia kona ba história povo Israel nian iha período exílio nian iha rai Persia (538-333 a.c.). Wainhira império Persia conquista tiha império Babilónia iha tinan 539 a.c., liurai boot ida naran Ciro II mak ukun. Povo Israel nebé antes exilado iha rai Babilónia, oras ne’e hakruuk ba ukun império Persia nian. Interessante, iha época ne’e, mosu liurai di’ak ida, Ciro II nebe hasai decreto ida naran “édito de Ciro”, nebé nia conteúdo principal mak: “promove liberdade no tolerância religioso ba povo hotu nebé nia ukun. Liurai Ciro II haruka mos Israelita sira atu harí fali sira nia templo iha Jerusalém. Ho política foun ne’e, exilado sira iha Babilónia hetan liberdade atu fila fali ba sira nia rain moris fatin. Deutero-Isaias (autor anónimo husi livro Profeta Isaias 40-55), encoraja povo Israel atu fila fali ba sira rain Israel. Fila fali ba rai Israel, ita bele contempla nudar êxodo foun ida husi moris atan nian ba liberdade (uma passagem da escravidão à liberdade), hanesan uluk Povo Israel sai husi rai Egipto ba Terra Prometida ho mata-dalan Moisés nian. Figura liurai Ciro II nian importante iha contexto histórico ne’e, tanba nia ukun nebé diak, Profeta hanaran “o ungido, maske nia liurai pagão no estrangeiro. Iha circunstância ne’e hotu, ponto principal ba ita nia reflexão mak: “Maromak nebé promete ne’e, fiel (cf. Heb 10,23). Maromak usa dalan oi-oin atu salva nia povo (cf. Heb 1,1) atu afirma nafatin katak: “Tan Há’u atan Jacob no Israel, nebé Há’u hili ona, Há’u bolu ó naran, Hau halo ó naran boot, maske ó la hatene Há’u. Há’u mak Na’i, laiha tan seluk; Há’u mesak de’it Maromak” (Is 45,4-5).

Iha Evangelho, ita nia atenção ba kedas liafuan Jesus Cristo nian nebé dehan: “Fo ba Cesar buat nebé Cesar nian no fo ba Maromak buat nebé Maromak nian” (Mt 22,21). Versículos badak maibé forte lós ne’e, São Mateus coloca nudar prelúdio molok tama ba evento paixão Jesus nian. Hafoin ita rona tiha aiknanoik tolu nebe Jesus fo sai iha Domingo tolu tui-tuir malu (kona ba oan mane na’in rua; kona ba atan hein tua uvas nian nebé ema oho; no ikus liu kona ba han festa casamento nian eh banquete nupcial), oras ne’e mosu questão boot tolu kona ba Jesus ho nia adversário sira. Questão dahuluk mak ita rona iha Evangelho Domingo nee nian,kona ba tributo nebé habitante sira Judeia nian tengki fó ba império Romano. Dala ida tan, ita iha contexto histórico nebé ita bele dehan: “wainhira presença imperial estrangeira ida ukun povo Israel (wainhira sira iha sira rain rasik eh wainhira sira iha exílio nia laran), tendência eh risco boot liu mak, povo ne’e bele lakon sira nia IDENTIDADE religiosa no cultural. Povo Israel hanesan ita rona iha Evangelho, fahe-na ba grupo, partido eh ideologia oi-oin: Zelotes sira nudar grupo radical Israelita nebé rebeldes hasoru império Romano lakohi selu tributo ba Cesar; Herodiano sira, la halo caso buat ida kona ba regra ne’e. Sira hanesan grupo moderado tanba hetan benefício husi império Romano; Fariseu sira fali, nudar grandes observadores da Lei (TORAH), maske hakru’uk hodi selu taxa ba Império Romano, maibé sira nia laran la fó tanba sira hatene didiak sira nia história hanesan povo Israel, sira hatene sira nia identidade cultural no religiosa no liu tan ida ne’e, sira hein namanas Mesias ida nebé sei maia tu harahun ukun imperial nian no salva sira husi ocupação terrena no identitária. Iha duni contexto ida ne’e mak Fariseu sira hakbesik-na ba Jesus hodi husu: “Bele eh labele selu imposto ba César?” (Mt 22,17). Jesus, hanesan ita hatene, hatán ho pergunta retórica ida ba sira:”Ilas no hakerek ne’e sé nian?” (Mt 22,20).

Ba ita nia reflexão dominical ne’e, há’u hakarak acentua iha liafuan IMAGEM. Ba povo Israel, sá tan Fariseu sira, liafuan IMAGEM eh ILAS ne’e, liafuan importante no forte teb-tebes tanba lori sira hanoin fali kona ba liafuan Maromak nian wainhira halo EMA: “Ita halo EMA tuir ita ILAS no LALATAK (à nossa IMAGEM e SEMELHANÇA) (Gen 1,26-27). Consciências kona ba IMAGEM ida nebé mak importante liu: “Fo ba Cesar buat nebé Cesar nian no fo ba Maromak buat nebé Maromak nian” (Mt 22,21), halo ita descobre fali ita nia identidade nuudar Maromak oan, halo ita hakruuk liu-liu ba ukun Maromak nian, halo ita buka uluk mak Maromak nia Reino no nia justiça“Fo ba Cesar buat nebé Cesar nian no fo ba Maromak buat nebé Maromak nian” (Mt 22,21) (cf. Mt 6,33), no halo ita la hanoin rua-rua atu hili uluk Maromak ba ita nia moris que hakruuk ba ukun seluk mundo nian.

Pe. Natalino Gusmão Amaral