Reportagem konaba Sínodo Bispo sira nian

husi Frei Joel Casimiro Pinto, OFM

Participante Sínodo Bispo sira nian iha Roma

Roma, 18 Outubro 2023

Sínodo bispo sira nian konaba Sinodalidade Igreja nian, iha Aula Paulo VI, hahú husi loron 4-29 Outubro 2023. Antes participante sira ba tuir retiro preparação, sei participa iha oração eucumenica iha sabadao, 29 setembro 2023. Oração ne’e hetan mos participação husi Patriarca Bartolomeo Istanbul, Ortodosso, lideres Igrejas Luteranas, Anglicanas, Coptas, no Igreja sira seluk tan. Grupo nebé responsabiliza ba cerimonia mak joven foin sa’e sira ho sira ninia estilo rasik. Iha mos apresentação husi grupo musica, coral, drama no anima mos husi grupo oração ecumenica Taize.

Santo Padre iha ninia reflexão sublinha fila fali liafuan hirak ne’e, katak oração ecumenica ne’e atu reza hamutuk ho lidere Igreja nian sira no sarani sira hotu ba Sinodo Bispo sira nia  konaba sinodalidade nebé sei realiza iha loron 3 – 29 outubro 2023 ne’e. Santo Padre sublina katak Sínodo ne’e significa katak la’o hamutuk (walking together) hodi reflete konaba Igreja nia moris. Papa dehan: “Sínodo ne’e la’os parlamento; la’os atu halo discussão no ikus mai hodi hetan voto maioria. Sínodo ida ne’e mak fahe experiencia fiar nian husi continente ida ba continente ida seluk. Tan ne’e xave maki da ne’e: tur hamutuk ho rona malu. Rona tiha sei halo discernimento hamutuk. Espirito Santo mak sai hanesan protagonista Sínodo nian”. Santo Padre sublina liu tan condição necessario ba oinsa bele rona mak silêncio. Tan ne’e, “Silêncio sai hanesan condição dahuluk. Silêncio nu’udar caminho essencial ba unidade cristã nian; fundamento ba oração. Husi ne’e ecumenismo hahu”. Silência nu’udar oração nebé fo dalan atu ita hakuak graça unidade nian nebé Jesus Cristo rasik hakarak no la’os la’o tuir dalan nebé ita mak hakarak”.

Hafoin participa tiha oração ecumenica iha Praça São Pedro, participante sira ho camioneta ba Domus Fraterna, Sacrofanno, Roma hodi continua retiro loron tolu iha neba.

Membro sinodo sira hetan preparação liu husi Retiro loron tolu, husi loron 29 setembro to’o 3 outubro, nebé prega husi Pe. Tymothy Peter Radcliffe, OP no reflexão husi Madre Angelina Maria, OSB. Padre Radcliffe, OP, ajuda participante sira atu bele tama kle’an liu ba Sinodo ho tema-tema sira nebé importante hanesan “Expetação sira nebé contra esperança; Igreja nu’udar uma no familia; amizade no desafios sira; Liafuan nebé cura no transforma; Autoridade”.

Hafoin retiro, dia 3 outubro 2023 kalan, participante sira fila fali ba Roma centro ho hahú Sinodo ho missa abertura ao mesmo tempo solenidade S. Francisco de Assís nian iha Praça São Pedro, Roma. Tuku 10h00, horas Europa Central, membro sira tama ba Aula Paulo VI hodi continua rona explicação konaba uza tecnologia durante Synodo ne’e.

Loron 4 outubro 2023, horas 16h00, Santo Padre Francisco loke oficialmente no solenemente Synodo Igreja sinodal. Hafoin ida ne’e, Segretario Geral ba Synodo, Sua Eminencia Card. Mario Grech no Relator Geral Sua Eminencia Card. Hollerich, SI, hato’o relatorio konaba processo sinodal nebé la’o ona iha nivel paroquia, diocese, nacional no nivel continente.

Loron 5 outubro 2023, loke hó oração no reflexão husi Madre Maria Angelina, OSB, nafatin hanesan introdução hodi hakat tama ba encontro no discussão sira ha Sínodo ho maneira participante sira tur iha meja redonda (kabuar); completo ho Tablet cada ema ida hodi bele acesso ba registo presença nian; acesso documento sira no mos reserva ba intervenção sira.  Participante sira hamutuk ema 350.

Oração hahú nian hotu, Segretario Geral Emenencia Mario Grech hahú ho introdução; hafoin Pe. Timothy Radcliffe fo intervenção contribuição teologica ba tema A nebé sei koalia konaba experiencia kada Igreja local; nivel continente sira hasoru malu iha Sinodo no ninia klala’ok oinsa? Hafoin ida ne’e, iha partilha experiencia husi Cardeal, Bispo, Nailulik no Leigo ida husi Uni Emirat Arab (Abu Dabhi).

Iha parte lokoraik, tuku 16h00, hahú ho Conversação iha Espirito katak partilha ou fahe experiencia tuir grupo nebé participante ida-ida hola parte ona iha meja redonda ne’e. Discussão grupo termina iha horas 19.30.

Loron 6 outubro dader nu’udar loron Congregação Geral nian. Iha loron ida ohin, Santo Padre participa durante loron tomak hodi rona mos apresentação husi grupo 40 no intervenção geral husi participante sira kada minuto 3. Tan ne’e, participante sira nebé hakarak halo intervenção tenke prepara testo ba minuto tolu nia laran.

Iha loron ida ohin ne’e, relatori kada grupo foka liu konaba experiência procesu consulta no ambiente nebé Igreja hasoru durante etapa dahuluk consulta nian. Maioria husi conferência sira bispo nian hato’o agradecimento ba Santo Padre ba consulta nebé dudu hala’o iha diocese sira hotu. Concerteza sei iha falhanço oi-oin, tanba Covid-19 no mos seluk-seluk tan, liu-liu sociedade nebé secularizada ona pretende la halo, maibe mos balun consege realiza no buat hotu la’o ho diak. Agradece ba Maromak.

Apresentação iha Congregação Geral nian termina iha horas 19.15.

Loron 7 dader, hahú ho oração Laudes hamutuk. Oração hotu, grupo hotu-hotu hahú fila fali sira nia discussão hodi hatama fila hanoin ruma nebé sira rona husi maluk participante sira seluk nia intervenção. No iha horas 12.00 entrega texto nebé hadi’a ona ba Segretario Geral Sinodo nian.

Sabado lokoraik no Domingo nu’udar loron ferias ba participante sira.