Dom Leandro Maria Alves
Bispo Diocese Baucau
Homilia iha Missa encerramento ba evento Peregrinação Nacional Nossa Senhora Aitara
Soibada, 14 Outubro 2023
Maluk peregrinos sira hotu mak Cristo hadomi,
Ita halibur hamutuk iha santuário de Nossa Senhora de Aitara ne’e hodi hahi ita nia Inan Virgem, Kristo nia Inan no ita nia Inan mos. Ita halibur iha ne’e tan ita iha confiança boot teb-tebes ba ita nia Inan no ita iha ne’e tan ita conscienete ba ita nia Inan nia intercessão ba Jesus mai ita. Tan ne’e ita agradece ba Maromak hamutuk ho ita ninia Inan Aitara. Ohin ita hamutuk iha ne’e atu comemora mos vigésimo primeiro existência do santuário Nacional Nossa Senhora de Aitara ida ne’e.
Ksolok boot tebes ita bele halibur malu hamutuk iha Santuario Nacional ida ne’e hodi expressa mos ita ida-idak ninia devoção ba ita nia Inan Maria.
Maluk peregrino sira, ita mai hamutuk iha santuário ida ne’e tan ita consciente katak ita iha Inan ida, ita iha Mãe ida nebe hamutuk hela deit ho ita. Presença permanente, acompanhamento ita ninia Inan iha ita nia moris ne’e fo ksolok mai ita. Ita nia Inan sempre buka ho maneira oi-oin atu haksolok ninia oan sira. Primeira leitura ohin nian ita rona dehan: “Sião nia oan feto sira, haksolok ba! Povo Israel sira, haksolok hakilar ba! Jerusalem nia oan feto sira, haksolok ho neon no laran ba!”.
Ita hotu iha ne’e haksolok ba, haksolok tamba Maria ita nia Inan ne’e hatudu mai ita katak Ninia fuan ne’e sai subar fatin no dalan ba Maromak. Maria ne’e dalan lais ida ba Maromak tan Jesus rasik mak kria dalan ne’e, Jesus mai iha mundo ne’e liu husi Maria no ho ida ne’e, Jesus hakarak hanorin mos ita hotu katak liu husi dalan ida ne’e ka liu husi Maria ita sei too lalais iha Maromak. Neduni keta baruk atu reza terço lor-loron. Ita nia terço lor-loron nian hatudu ita nia moris hamutuk ho tabernáculo Nai nian ne’e. Maria nudar Maromak nia tabernáculo, horik fatin Nai nian. Nia presença iha ita nia le’et hatudu mos presença Maromak nian. Segunda Leitura dehan: ema ida nebe hein hela iha trono haraik futar lian dehan: “Ne’e Maromak Nia uma fatin atu hela iha ema sira le’et”.
Tan ne’e mak Maluk peregrino sira, iha segunda leitura ita rona livro Apocalipse haktuir Joao dehan Hau hare lalehan foun ida no rai foun ida. Lalehan no rai foun ne’e Maromak hahu ou começa husi ema ida-idak; começa husi ita ida-idak nebe mak loke ita nia an ba Maromak. Exemplo los nian mak Hanesan ita nia Inan Virgem Maria; Nia loke nia an ba Maromak, kolabora ho Maromak no Maromak hahu mundo foun ida liu husi nia.
Iha Evangelho ita rona Maria hatudu katak ida nebe bele halo trasformação ne’e Maromak; mak Kristo. Ita ema precisa rona no halo tuir saida mak Nia haruka. Tan ema nebe mak rona Jesus no halo tuir buat nebe nia haruka sei hetan transformação. Maria dehan: “Imi halo buat nebe Nia haruka ba imi!”. Halo tuir deit, lalika atu husu buat oi-oin. Ida ne’e mandamento, perintah Maria nian. Basta halo tuir no milagre acontece. Ida ne’e mak segredo nebe ita precisa hatene wainhira ita tua ksolok nian laiha ona, tua paz nian, isin diak, harmonia no necessidade sira seluk nian. Buka hakbesik an ba Maria.
Maria hanesan inan, iha sensibilidade inan ida nian ba nia oan sira nia necessidade. Nia rasik mak sei husu ba Jesus hodi ita nia naran mesmo que ita la husu nia atu ajuda ita. Iha parte seluk ita mos bele dehan katak ho Maria nia lia fuan: “Imi halo buat nebe Nia haruka ba imi”; Nia hanorin ita katak atu tuir Jesus tenke iha fiar ba Jesus. Maria haruka ita atu fiar iha Kristo. Tan Ida ne’e duni mak Maria nia hahalok. No ho hahalok fiar nian ida ne’e mak Maromak hahi Maria no Maria sai modelo fiar nian ba ema hotu.
Maluk peregrino sira hotu, ohin loron iha ita nia rain, acontece buat oi-oin. Ohin loron iha ita nia rain, iha seitas oi-oin. Ohin loron iha ita nia rai ema barak, lidere sira mos preocupa ho situação ba hahalok a’at barak nebe mak acontece; ema baku malu, tuda malu, oho malu, oho-an, tara-an, soe bebe no seluk tan. Hahalok sira ne’e halo ita hotu sente laran triste tebes no halo ita mos questiona konaba ita sarani, ema fiar nain ninia influencia iha sociedade ne’e oinsa? Hahalok sira hanesan temi iha leten ne’e mos hatudu oinsa mak ita rona ba Jesus ne’e iha ka lae? Maluk sira, hanesan sarani, fiar nain ida, hasoru seitas barak nebe mak tama ona iha ita nia rain, ita precisa hamrik metin iha ita nia fiar no barani atu hateten katak hau ne’e ema sarani católico. Hanesan sarani, ita mos buka atu rona Jesus, se ita rona duni Jesus, sei laiha violência, sei laiha abortu, soe bebe, oho malu, tuda malu. Maibe iha deit mak moris hakmatek, domin no paz. Maria, ita nia inan, haruka ita atu rona Jesus. Neduni maluk sira, mai ita hotu iha momento ida ne’e no iha fatin sagrada ida ne’e atu loke ita nia tilun fuan nian hodi bele rona Jesus iha ita nia moris lor-loron nian.
Maria; Maromak nia oan feto no Maromak nia oan nia Inan no ita nia Inan harohan ba Maromak mai ita no ba povo Timor-Leste.