Dom Leandro husu sarani sira atu hadomi moris liu husi hatudu hahalok nebé di’ak
(Missio Timor-Leste)
Média CET (10/10/2023) – Atu sai ema nebé hatene didi’ak ita nia aan hanesan ilas Maromak nian, buka atu hadomi moris ida ne’e. Basá, católico ida nebé loloos mak hatudu nia moris sarani liu husi hahalok nebé mak di’ak; hahalok ida nebé la abandona nia oan sira no hadomi malu nafatin iha moris família nian maski hasoru desafio oi-oin.
Bispo Diocese Baucau, Dom Leandro Maria Alves hato’o lia hirak ne’e durante iha nia discursso ba missa encerramento vizita ilas São João Paulo II iha Igreja Paróquia Cristo Rei Lautém, Terça-Feira (10/10) ne’e.
Dom Leandro acrescenta, ema hotu labele atu hasés aan husi desafio sira mundo ohin loron nian maibé, tenki hasoru ho dalan primeiro liu husi formação sira nebé mak tulun ita atu bele brani foti dalan ida nebé mak loos hodi hasoru desafio sira nebé ita hasoru.
“Ho vizita imagem sagrado sira (estatua) hanesan ne’e ajuda tebes ita hodi forma ita nia conciência maibé, fila-fali ba ita ida-idak atu loke ita nia aan hodi simu graça sira Na’i nian”, ténis Dom Leandro. No Bispo Baucau hatutan tan katak: “Liu-liu ba família sira, atu iha colaboração hodi haruka oan sira ba hola parte iha atividade sira hanesan ne’e, buat ida nebé ita bele dehan valór ida aas tebe-tebes ba sira no ba ki’ik oan sira hodi forma no prepara sira nia aan hodi bele hasoru desafio sira nebé maka agora mosu dau-daun iha ita nia sociedade”.
Tuir programa Missio Timor Leste nian, atividade visita ilas São João Paulo II nian depois de Paroquia Cristo Liurai Lautem, Diocese Baucau no continua ba visita Paroquia Atabae, Diocese Maliana.