REFLEXÃO IV DOMINGO TEMPO PÁSCOA
Tinan B
21 de abril de 2024
I Leitura: Act 4,8-12
Salmo: 117 (118)
II Leitura: 1 Jo 3,1-2
Evangelho: Jo 10,11-18
Liturgia domingo dahát tempo Páscoa nian apresenta Jesus Cristo nudar Bibi-Atan Di’ak. Iha duni contexto domingo ne’e mak Kreda dedica domingo ne’e hodi reza ba vocação sira, atu ema fiar na’in hotu, iha dalan moris vocação nebé de’it, bele banati tuir Jesus Cristo nudar modelo Bibi-Atan Di’ak, tuir roman Evangelho João 10,11-18.
Evangelho nebé ita rona, apresenta iha linguagem metafórica (transferência do significado de uma palavra para outra). Katak, usa liafuan eh expressão ida, hodi representa eh designa qualidade husi buat ida seluk. Lianguagem metafórica ne’e han malu ho contexto moris povo Israel nian iha tempo nebá, dala barak ita rona iha narrativa bíblica hodi fo naroman ba ema nebe rona Maromak nia futar Lia-fuan. Iha linguagem metafórico, bibi sira mak ita ema no bibi atan diak mak Jesus Cristo, nebe fo Nia moris tan Nia bibi sira, Nia tau matan ba sira, Nia salva sira husi asu-fuik nia siak no Nia mos mak ida nebe ba buka bibi nebe lakon. Iha Evangelho, Jesus rasik mak apresenta-An nudar Bibi-Atan Di’ak. Nia hadomi Nia bibi sira hodi saran Nia moris tan Nia bibi sira. Fo moris eh saran moris mak significado husi verbo “hadomi” (amar). Domin ida sasukat laek, domin ida haluhan Nia-An rasik. Domin lolós bibi-atan ida nian, halo bibi sira tau laran metin eh confiança total iha nia.
Hanesan ita rona, Jo 10 apresenta catequese murak ida kona ba Bibi-Atan Di’ak. Evangelista usa metáfora ida nee hodi halo catequese ida kona ba Jesus nia missão: katak obra Messias nian mak atu saran Nia moris ba Nia bibi sira. Atu harí comunidade ida domin nian ida nebe unido, nebé Bibi-atan ho bibi sira hatene eh conhece malu no tau fiar eh confia malu. Relação domin comunidade Jesus Cristo nian nee, contempla relação domin lolós Jesus Cristo nian ho Aman Maromak rasik. Ikus liu, domin nebé Jesus Cristo haklaken ne’e “universal”, katak haraik no convite gratuito ba ema hotu-hotu.
Wainhira ita lee Sagrada Escritura, ita reflete katak, imagem kona ba bibi-atan diak nebe hato’o iha discurso simbólico Jesus nian hetan ona nia fundamento eh roman iha Antigo Testamento. Especialmente, Ezequiel 34 no Jer 23,1-8 sai nudar chave ba interpretação no compreensão metáfora “bibi-atan” no “bibi sira eh bibi-luhan (ovelhas, rebanho). Wainhira koalia kona ba povo Israel nebe moris iha exílio Babilónia nian, profeta Ezequiel denuncia líder sira Israel nian nebé mesak “ema aat”, “mata-dalan delek eh aat” eh “maus pastores ka bibi-atan aat”, nebe lori deit povo Israel ba dalan terus atan nian, injustiça no mate. Maibé, tuir mai, profeta Ezequiel mos haklaken katak, Maromak rasik mak sei mai hodi lori Nia povo; Maromak rasik mak sei guia nia bibi sira (rebanho) hodi haraik ba sira “Bibi- Atan di’ak ida” (Messias), nebé sei hasai povo nee husi fatin atan nian no haraik fali MORIS ba sira. Tan ne’e duni mak, iha mentalidade bíblica nian, expressão “Bibi-Atan Diak” ne’e, idêntico ho Maromak rasik” (cf. Sal 23) eh nu’udar “Israel nia Bibi-Atan” (Sal 80,1). Jesus nudar Bibi-Atan Di’ak, reflete Maromak nia identidade rasik. Ida nebe hadomi no saran Nia moris “to’o rohan” sem reserva (cf. Jo 13,1).
Husi roman liturgia domingo ohin nee, ita mos reflete kona ba ita nia relação ho Jesus Cristo modelo no ideal Bibi-Atan Di’ak, iha vocação moris eh knaar ida-idak nebe ita hala’o. Ita bele husu: Se iha há’u nia moris, hau tau fiar eh confia iha Jesus nudar hau nia Bibi-Atan Diak ida mesak ka lae, katak Jesus Cristo mak hau nia Bibi-Atan Diak ka lae? Se Jesus nia figura sai duni nudar inspiração ba ita ida- idak nia moris ka lae? Nudar inan-aman, nudar agentes pastorais, nudar na’i ulun povo nian, nudar líder político, hau “hatene saran moris” sem reserva eh incondicionalmente ba ema seluk ka lae? Eh hau buka aproveita deit hau nia serbisu, hau nia knaar, hau nia posição, povo nia confiança ba há’u nia diak no interesse pessoal de’it? Se hau serbisu maka’as atu bibi sira (povo) bele hetan du’ut matak, katak prosperiedade no felicidade lolós? (cf. Sal 23).
Tebes duni, wainhira ema fiar-na’in ida descobre nia vocação lolós, nia sei “saran nia moris ba ema seluk”, hanesan nia “Mestre no Na’i, Jesus Cristo, saran nia moris ba ema seluk”.