REFLEXÃO V DOMINGO TEMPO PÁSCOA
Tinan B
28 de abril de 2024
I Leitura : Act 9,26-31
Salmo: 21 (22)
II Leitura: 1 Jo 3,18-24
Evangelho: Jo 15,1-8
Iha domingo sira ikus tempo Páscoa nian, Evangelho apresenta discurso despedida Jesus nian ba Nia escolante sira (Jo 14-17). Discurso ida nebe nia focus mak relação domin lolós entre Jesus ho nia escoIante sira. Iha contexto narrativo ne’e, haktuir katak, Jesus iha kalan ikus nian molok Nia mate, Nia fo sai hela ba Nia escolante sira atu labele ta’uk hasoru moris nebe sei mai nu’udar sasain na’in lialós nian. Liturgia ohin nian oferece mai ita alegoria ida kona ba Jesus Cristo nudar Uvas hun lolos no nia Aman mak to’os na’in. Imagem ida ne’e importante teb-tebes iha Bíblia (cf. Sal 80,15-17), nebe fo tada kona ba relação domin lolós nian (cf. Is 5,1-10). Relação domin ida nebe simboliza domin fecundo Jesus nian ba Nia escolante sira, wainhira escolante sira hanesan uvas sanak, horik metin iha uvas hún atu bele fó fuan. Hanesan mos Jesus nia escolante sira, ita mos simu lia bolu atu fo fuan, wainhira ita horik metin iha Jesus Nia domin.
Expressão bíblica “horik iha Há’u” (“permanecer em Jesus”) mosu dala hitu (sete vezes) iha perícope evangelho domingo nee nian. Nune’e, convite atu “horik” eh “permanecer” iha Jesus expressa totalidade no perfeição escolante ida nia moris. Esolante ida tengki “horik” iha Cristo tanba iha Nia de’it mak suli mai ksolok no lia-lós lolós iha missão hotu escolante nian (cf. Sal 104,15), maske iha momento sira nebé todan, susar no terus laran. “Horik” iha Jesus no husik Nia futar Lia-fuan “horik” iha escolante ida nia moris significa, hahalok comunhão, dependência no confiança total iha Jesus Cristo nia futar Lia- fuan sira. Ne’e katak, ministério eh serviço pastoral escolante sira nian, só bele fo fuan wainhira nia kbiit hetan husi Jesus Cristo rasik nuudar ai uvas hún lolós.
Alegoria “ai uvas hú no sanak sira” iha nia base de interpretação nebe kle’an tebes iha Antigo Testamento, nunee mos iha universo religioso judaico nian, imagem ne’e iha nia sentido nebé kle’an tebes. Iha mensagem profeta sira nian, “ai uvas hún” no “to’os uvas” representa Povo Maromak nian. Bíblia apresenta Israel hanesan “ai uvas” nebe Maromak fokit sa’i husi rai Egipto hodi lori ba kuda iha Terra Prometida, nebé Maromak tau matan nafatin ho domin nebe boot (cf. Sal 80,9.15); Bíblia mos apresenta Israel hanesan “to’os uvas”, nebe Maromak rasik mak kuda no cuidado, nebe Maromak rasik he’i atu bele fó fuan wa’in naresin, maske to’o uvas ne’e produz deit mak fuan nebé moruk no la tuir Maromak nu’udar to’os na’in nia hakarak (cf. Is 5,1.7; Jr 2,21; Ez 17,5-10; 19,10-12; Os 10,1). Ne’e hatudu katak “ai uvas” no “to’os uvas” tuan eh Testamento Tuan nian la fó ksolok ba Maromak nia futar laran. Katak, Povo Israel nunca fó fuan diak tuir Maromak nia hakarak.
Oras ne’e, ho figura Messiánica, Jesus Cristo nian, nú’udar “perfeição” husi “uvas hún lolós” nebé fó fuan no nia ramos eh sanak sira mos fó fuan. Jesus rasik declara nia An nu’udar “ai uvas hún lolós”. Nudar “ai uvas hún lolós”, Nia mos halo nia “sanak sira” fo fuan. Iha figura Jesus Cristo no nia escolante sira nu’udar “ai uvas hún lolós” no “sanak sira” mak expressa POVO FOUN MAROMAK NIAN. Povo ida nebe Aman Maromak rasik mak nudar To’os na’in nebe continua tau matan ho domin ba Nia to’os uvas. Povo ida nebe simu graça wa’in naresin – “graça sobre graça” husi Jesus Cristo (cf. Jo 1,16) atu sai lolós Maromak oan (cf. Jo 1,12). Dinamismo husi relação perfeita ida ne’e bele acontece de’it wainhira escolante sira Jesus nian “horik” eh “fiel” nafatin ba Jesus Cristo nudar “ai uvas hún lolós”,
nudar “Na’i no Mestre” Nia futar Lia-fuan sira (cf. Jo 13,13-15). Katak, Jesus Nia futar Lia-fuan mak sai nudar centro husi escolante ida nia moris no missão.
Iha mundo no ita nia sociedade ida nebe namlele daudaun iha sentido moris nian, Jesus Cristo nia futar Lia-fuan de’it mak bele haroman fali ita nia ne’on hodi buka no descobre sentido lolós moris nian. Fenómeno boot sira husi mentalidade sociedade ohin loron nian mak, ema koko atu “horik” iha buat sira mundo nian (p. ex. osan, prazer, material, poder, etc) hodi la conta Na’i Maromak ho Reino Lalehan iha sira nia moris. Maibé, ikus mai, experiência hatudu katak, buat hirak mundo nee nian la garante ksolok lolós ba ema nia moris. Nune’e, importante atu ita loke laran hodi fila fali ba Maromak Nia futar Lia- fuan, loke ita nia fuan laran ba Espírito Santo nebe convida ita atu “horik” iha Jesus Cristo nia domin (cf. Heb 3,7-9).