Reflexão Dominical
Domingo V tempo Baibain Tinan B
4 de fevreiro de 2024
I Leitura: Jb 7,1-4.6-7
Sal. Resp: 146 (147)
II Leitura: 1 Cor 9,16-19.22-23
Evangelho: Mc 1,29-39
Terus eh sofrimento, nudar realidade ida nebe labele haketak malu husi ita ema nia moris. Dala barak wainhira mosu eh hasoru terus, susar no todan sira moris nian, ita ema baibain husu, tansa realidade moruk sira mosu hanesan laloran boot tasi nian hodi perturba netik ita ema nia dalan atu bele moris iha ksolok no dame nia laran? Dala barak mos ita husu, Maromak nee laran diak no domin na’in karik, tansa Nia husik Nia oan sira terus? Nunee, concerteza, ita ema obrigado atu hakmatek oitoan hodi husu: Sentido husi moris nee mak saída loos? sentido husi sofrimento iha ita ema nia moris iha rai nee mak ida nebe loos? Maromak iha nebé los, wainhira ita terus? Liturgia domingo dalima tempo baibain nian, reflete kona ba temática boot nee.
Leitura dahuluk foti husi livro Job, livro importante ida husi literatura sapiencial Israel nian nebe hakerek hela iha Bíblia, haktuir kona ba experiência Israelita oan ida nebe justo, moris loos, piedoso, ema diak (bom), generoso iha Maromak nia futar oin no maun alin sira oin, nia ema ida nebe “hamtauk Maromak mos iha nia moris tomak, maibé Maromak koko nia fiar ho dalan oi-oin nebe todan, hanesan hamate hotu nia oan sira, halakon eh hamamuk hotu nia riku soin sira, hadook nia belun sira husi nian, hasusar nia estabilidade saúde rasik, até ameaça nia moris interior rasik. Perante realidade moruk nebe mosu mai troca malu, Job hanorin ita atu metin nafatin iha fiar ba Maromak.
Wainhira ita lee capítulos dahuluk sira livro Job nian, introduz mai ita kona ba mentalidade religiosa- tradicional israelita nian nebe fiar iha dogma da retribuição. Iha catequese tradicional Israelita nian hanorin katak: Maromak selu eh recompensa ho buat diak ba ema diak sira tan sira nia hahalok diak no castigo ema aat sira. No ida nee mak lógica husi justiça Maromak nian iha mentalidade israelita nian iha tempo neba. Wainhira ita lee hodi acompanha didiak personagem Job nian, “Job era um homem íntegro e recto, que temia a Deus e se deviava do mal” (Jb 1,1). Nunee, ita husu, Maromak iha razão atu castiga nia ka lae? Portanto, dogma tradicional kona ba lei da retribuição nee, com certeza labele aplica ba ema inocente ida hanesan Job: “um homem íntegro e recto, que temia a Deus e se deviava do mal”. Então, pergunta nebe ita bele coloca mak nee: tansa ema fiar nain ba Maromak, ema inocente ida hanesan Job mos terus iha moris nee? Job, liu husi nia experiência, nia corrige doutrina tradicional israelita nian nebe projecta sala imagem lolos Maromak nian. Nunee, liu husi experiência dramática Job nian nebe naruk, ita rona katak, dalan loos liu atu hatene razão no sentido husi ita nia existência, sentido husi sofrimento do inocente mak: koalia ho Maromak rasik “husi oin ba oin” – “face a face”. Job hanorin ita atu buka Maromak iha momento difícil sira nebe ita la compreende sentido lolos moris nian no razão husi sofrimento sira moris nee nian. Experiência Job nian hatudu katak, Maromak nee kbiit tomak nain (omnipotente), dala ruma incompreensível tuir ita ema nia lógica, maske nunee, Maromak nee Aman domin na’in ba Nia criatura ida-idak. Job ikus mai descobre nia posição iha Maromak nia oin: nu’udar “criatura folin laek ida”, nebe la dura ba beibein (finitude), no nudar criatura kiik ida, ninia matenek la to’o atu hatene no compreendo hotu mistério boot sira plano Maromak nian. Nunee, ita ema laiha direito atu tesi-lia eh julga Maromak tuir ita ema nia lógica humana. Ita ema nia posição ho Maromak la hanesan: ita ema, criatura no Maromak, Criador. Ita ema, finito, no Maromak, infinito. Nunee, perante realidade hirak nee hotu, ikus mai, Job decide, atu hatuur nia an hanesan criatura, hodi simu no entrega-an totalmente iha Maromak nia futar liman, sem lakon confiança no fiar iha Maromak nudar Aman laran luak no domin na’in.
Iha contexto leitura dahuluk nian (cf. Jb 7,1-4. 6-7) nudar continuação diálogo entre Job ho nia belun na’in haat (cf. Jb 3,1-31,40) nebe nudar defensores husi teoligia tradicional/oficial israelita nian desafia Job nia fiar ho lei retribuição de Deus. Hatan ba nia belun dahuluk naran Elifaz husi Teman (Jb 4,1-5,27), Job hatan ba desafio teologia clássica nee hodi apresenta nia reflexão kona ba sentido husi moris nee rasik (cf. Jb 6,1-7,21). Job hanorin nia katak, primeiro, moris nee hanesan soldado ida nebe hala’o moris: nia tenki luta, hasoru riscos no ema nia hanoin nebe la hanesan; segundo, moris nee hanesan atan ida nebe halao moris. Atan nee simu condenação atu hasan serbisu todan maka’as, tortura no maus tratos (tempo descanso nian oitoan deit, hetan fatin mahon fo kmaan lalais deit ba nia moris); terceiro, moris nee hanesan trabalhador ida nebe ema la selu nia kolen, nebe condenado atu serbisu iha loro manas nia laran, hein atu ema fo netik doit metan ruma nudar recompensa ba nia kolen. Maske realidade tolu nee hanesan ida nebe todan liu husi ema nia moris, Job considera nia sofrimento sira todan liu fali experiencia moruk sira ema nian. Tanba nia sofrimento, além de, todan tebes, nunca husik nia descansa eh dada-iis netik iha biban oan ruma. Katak, sofrimento aperta no hanehan nia, kalan-loron, hodi halo nia kolen no terus liu fali dala sanulu, terus ema baibain nian. Hahalok Job nian, ikus mai, hafoin nia compara tiha nia sofrimento sira nebe todan hanesan realidade nebe aat liu, tuir mai iha v. 7, Job hakbesik- an hodi koalia ho Maromak rasik. Nia husu ba Maromak atu bele “hanoin-recorde” netik Nai nia atan oan nee, nebe moris hela iha terus laran. Texto liturgia ohin nian remata ho v. 7, maibe oração eh Job nia hamulak ba Maromak continua to’o fim husi capítulo 7,21. Job hanorin ita atu, iha realidade hotu nebe ita hasoru, biar todan no moruk oinsa ba mos, ita tengki brani sadere nafatin ba Maromak, hanesan criatura ba nia Criador, hanesan oan ida hakilar no halerik ba nia Aman. Tanba só Maromak, omnipotente deit mak hatene no bele revela sai segredo sira husi sentido moris ita ema nian no sentido husi sofrimento “ema diak no loos no hamtauk Maromak” ida nian. Iha Jb 1,21 hateten: “Hau sai mai molik husi hau inan, nunee hau sei fila fali molik. Nai haraik no na’i foti hikas fali. Hahí nafatin Na’i nia naran”.
Iha Evangelho, parte dahuluk Evangelho São Marcos nia apresenta Jesus nudar Messias nebe haklaken “Maromak nia Reino”. Ita rona katak Jesus tama iha Pedro no André nia uma tan nia banin feto moras hela. Escolante rua seluk, Tiago no João hamutuk mos ho Jesus. Hahalok Jesus nian nebe visita nia escolante nia uma nee, hatudu família foun nebe hola parte ba “Reino Maromak” nian tanba sira loke fuan hodi rona Maromak nia futar Lia-fuan. Iha Mc 3,35 Jesus hateten: “Ema hirak nebe halo tuir Maromak nia hakarak, sira mak Hau nia maun, Hau nia feton no Hau nia Inan.” Com certeza iha contexto nee, escolante no sira nia família nudar família foun Reino Maromak nian. Tuir mai ita bele reflete katak, ba ema hirak nebe hola parte iha família Jesus nian, Jesus oferece MORIS LOLOS. Passagem tolu nebe ita nota iha Jesus nia gesto de cura ba Pedro nia banin feto: primeiro, Jesus “hakbesik-An” ba ida nebe moras hela. Sinal, sinal katak missão principal Jesus nian mak atu kore ema husi terus sira mundo nian. Maromak nebe besik ba ema nebe terus hodi cura no salva sira. Segundo, Nia “halo hamriik” ema nebe moras hela ho Nia liman rasik. Sinal implícita kona ba convite ba moris-hias rasik. “halo hamriik” (grego: egeiro), aplica iha evangelho São Marcos iha contexto Jesus nia moris hias nian (cf. Mc 5,41; 6,14.16; 9,27; 12,26; 14,28; 16,6). Terceiro, “feto be moras nee, hahú serbí sira”. Sinal, efeito imediato husi ema hirak nebe simu moris no moris foun husi Jesus: pronto atu serbí maun alin sira. Tuir mai, ita rona kona ba continuação husi Jesus, Messias libertador nia ministério: cura ba ema moras, libertação ba ema hirak nebe demônio nia kbiit hanehan. Ita lee episódio nee ba oin tan karik, iha vv. 35-38 haktuir kona ba Jesus nebe buka fatin hakmatek ida hodi hamulak. Jesus hatudu katak, oração mak “kbiit” interior nebe acompanha Ninia knaar Messiânica.