Reflexão Dominical
Domingo V Quaresma Tinan B
17 de março de 2024
I Leitura: Jer 31,31-34
Sal. Resp.: 50 (51), 3-4.12-13.14-15
II Leitura: Heb 5,7-9
Evangelho: Jo 12,20-33
Domingo ikus tempo Quaresma nian nudar tútun eh auge (puncak) husi ita nia percurso no espiritualidade quaresmal. Lia-menon central husi liturgia Maromak nia futar Lia-fuan mak atu fiar na’in penitente ida bele hetann “FUAN FOUN (um coração novo)”. Ho roman leitura dahuluk nian, foti husi livro profeta Jeremias, ita rona kona ba “ALIANÇA FOUN IDA” nebe Maromak halo ho nia povo. Missão profeta Jeremias nian mak atu haklaken liu-liu kona ba “restauração da aliança” entre Maromak ho Nia povo, maibé Aliança ida ne’e la hatúr ona iha “observância exterior” ba Maromak nia Ukun-fuan sira nebe fo ba povo liu husi profeta Moisés iha Sinai. Aliança foun nebé Maromak halo ho nia povo mak“metànoia eh mudança fuan-laran nian”. Tuir texto nebé ita lee eh rona, Maromak expressa momós nia intenção no objectivo husi Aliança Foun: “Há’u sei hatúr hau Nia Lei iha imi nia fuan-laran, no Hau sei hakerek iha imi nia fuan; no Hau sei sai imi nia Maromak no sira sei sai Hau nia povo” (Jer 31,33). Atu bele cumprende razão husi estabelecimente Aliança Foun ne’e, ita precisa halo leitura ida kona ba qualidade de relacionamento entre povo Israel ho Maromak. Maromak fiel nafatin, maibé povo desobediente no infiel. Ita compara karik, iha tempo êxodo nian, Israel oan sira, no sira be tuir mai harí duni Aliança ida ho Maromak, maibé qualidade husi povo nia hahalok mak, nakonu ho INFIDELIDADE no halo Maromak la haksolok. Oras ne’e, diferente ho tempo êxodo nian, povo harí fali sira nia relação ho Maromak iha fidelidade ba Maromak nia futar Lia-fuan. Ne’e hotu tanba acção Maromak nian nebe halo povo ne’e haklean eh interioriza Ninia Ukun-fuan sira iha sira nia fuan-laran. Katak, oras ne’e, relação Aliança Foun nian, hatúr iha qualidade povo nian atu acolhe eh simu Maromak nia futar Lia-fuan iha sira nia fuan-laran hodi moris tuir. Se iha passado, Aliança entre Maromak ho povo Israel, hakerek iha fatuk (Decálogo eh Ukun-Fuan sanulu), oras ne’e Lei eh Ukun-Fuan Maromak nian kuda, hakerek no moris iha povo nia fuan laran. Consequência husi Aliança foun nee mak, iha parte ida, mosu relação foun ida entre Maromak ho povo iha qualidade ida nebe genuina no kle’na liu; no iha parte seluk, sinal ema ida pertence ba Maromak mak nia iha capacidade atu HADOMI Maromak nia Ukun-fuan. Maibé keta haluha, “Fuan foun nee”, mai de’it husi Maromak, katak ema nia esforço no kbiit mesak de’it sei la consegue alcança “Fuan foun”. Hanesan profeta Jeremias hateten: “Há’u sei fo ba sira fuan foun ida nebe bele fiel mai Ha’u” (Jer 24,7). Nune’e mos iha parte seluk profeta Ezequiel haklaken: “Há’u fo ba imi fuan foun ida” (Ez 36,26). Ho reflexão kmanek no murak ne’e, ita cumpreende katak, percurso quaresmal nia objectivo mak atu bele alcança FUAN FOUN, maibe, ita tenki husu ba Maromak, hanesan iha Salmo 51,10 hateten: “Halo fuan moos ida mai há’u ba, Oh Maromak, hafoun fali iha há’u espírito ida nebé metin”.
Ho roman Evangelho nian, ita reflete katak, Jesus Cristo rasik mak “plenitude” husi “Aliança Foun”, ao mesmo tempo, “plenitude da Lei” nebé dala ikus no ba nafatin (cf. Gal 4,4; Heb 7,22; 8, 6-7. 13; Mt 26,27-28;) iha Nia auto-sacrifício Páscoa nian (cf. Heb 9,16-20). Iha duni Jesus nia Terus, Mate no Moris-hi’as mak ita hetan dalan atu hetan “FUAN FOUN” hodi sai “CRIATURA FOUN” Maromak nian.