Reflexão ba festa Batismo Na’i Jesus nian
7 janeiro 2024
I Leitura : Is 42,1-4.6-7
Sal. Resp. : Sal 28 (29)
II Leitura : At 10,34-38
Evangelho : Mc 1,7-11
Hafoin ita celebra tiha solenidade Epifania Na’i nian, liturgia domingo ohin, celebra festa Batismo Jesus nian. Liturgia boot nee taka tempo Natal nian no lori ita tama ba vida pública ministério Jesus nian. Batismo sai nudar hahalok eh evento dahuluk vida pública Jesus nian. Evangelista sira acentua no descreve Jesus nia batismo nudar facto importante ida molok hahú Nia vida pública (cf. Mt 3,13-17; Mc 1,7-11; Lc 3,21-22; Jo 1,26-28). Ita rona iha Evangelho São Marcos haktuir katak, Aman Maromak rasik mak apresenta Jesus ba público no fo sai kona ba identidade Jesus nian: Husi Lalehan lian ida dehan: “Ó, Há’u nia Oan doben, iha Ó, Há’u tau ona Há’u nia ksolok tomak” (Mc 1,11). Apresentação pública Jesus nian marca mos ho Espírito Santo nia presença, sinal comunhão Santíssima Trindade nian. Ne’e katak, iha Jesus nia humanidade eh Jesus nia An, Santíssima Trindade horik ba, no hamutuk iha Jesus, haraik salvação ba ita ema no ba mundo. Maromak nebé houri hahú kedas halo universo no halo ita ema: “Ita halo ema ba tuir ita ilas no tanesan” (Gen 1,26). Nudar Maromak, Jesus la precisa purificação ba Nia sala. Tanba Jesus sala laek. Iha carta ba Hebreu sira hateten: “…Nia ida be, hanesan ita, simu babeur iha buat hotu, maibé sala laek” (Heb 4,15). São Paulo mos hateten: “Maromak halo Nia nebé la hatene sala, sala tanba ita, atu iha Nia, ita bele sai justiça Maromak nian” (2Cor 5,21). Justiça iha contexto São Paulo nian nee significa fidelidade Maromak nian. Jesus nia batismo hato’o lia menon importante lima ba ita: ida, kona ba autoridade lolós Jesus Cristo nian tuir São João Batista nia lia haklaken:” Tuir há’u, sei to’o mai Ida nebé maka’as liu há’u. Há’u la soi atu hakru’uk hodi kore nia sandalhas talin. Há’u sarani imi ho wé, maibé Nia sei sarani imi ho Espírito Santo” (Mc 1,7-8). Expressão João Batista nian ne’e, fo tada Jesus nudar Messias, Cristo, Maksoin mundo nian nebé Israel oan sira hein namanas hela (cf. Is 9,5-6; 11,2). Nian nebé iha Evangelho São Marcos iha autoridade atu duni sai satanás no harí Reino Maromak nian (cf. Mc 1,21-28; 5,1-20; 7,24-30; 9,14-28). Rua, Jesus nia batismo hatudu “Lalehan nebé nakloke fali” ba humanidade:” Wainhira Nia sai husi wé, ema haré kedas “Lalehan nakloke…” (Mc 1,10). Ida ne’e mak realidade foun nebe fo fali esperança mai ita. Iha Bíblia expressão simbólico no espiritual “Lalehan nakloke” representa comunicação directa no especial entre Maromak ho ema, significa possibilidade ba ita ema atu haré Maromak nia kbiit no milagre sira. Representa mos experiência ema fiar na’in, Maromak nia belun sira nebé tan fiar no laran metin, Maromak hatudu nia An no Nia kbiit ba sira hodi conforta no salva sira (cf. Is 63,19; Dan 7,13; Gn 28,12.17At 7,56; 10,11; Apoc 4,1; 19,11; Jo 1,50-51). Tolu, Jesus nia batismo hodi tama iha wé, hakru’uk iha João Batista nia ain, maske Nia sala laek, hatudu Jesus nia solidariedade ho ita ema maksalak sira, atu hatudu dalan haraik-an nian. Ita rona iha início evangelho nian, São João Batista rasik mak dehan: “Há’u la soi atu hakru’uk hodi kore Nia sandalhas talin” (v.7), maibé, pelo contrário, Jesus rasik mak hakru’uk ba João Batista, hatudu exemplo hahalok haraik-An lolós nian. Ne’e katak, batismo nee hahalok ida haraik-an nian. Conversão eh hakribi sala hodi simu batismo nee, hahalok ema haraik-an nian. Ita fiar na’in nebé simu batismo, ita sai ema haraik-an ba nati tuir hahalok Jesus Cristo nian. No ita tengki haraik-an duni ba Maromak nia perdão no graça salvação tanba ita mesak ema maksalak. Haat, “no Espírito hanesan manu falur ida”. Simbologia bíblica nee lori ita ba Gen 1,2 wainhira Maromak halo mundo:”Maromak nia Espírito hamahan (semo, pairava) iha wé sira fohon”. Katak, Espírito ida be tún ba Jesus nee mak Ida nebe fo moris ba criação no fo iis ba moris ema nian. Espírito nee duni mak oras ne’e mai hafoun, transforma, cura no soi hikas buat hotu no rai tomak iha Jesus Cristo. Lima, kona ba “lian ida husi lalehan”. Iha Sagrada Escritura, Maromak nia lian nudar Dalan, Lia-loos no Moris ba ema. Iha Maromak nia futar Liafuan nebé haklaken sai kona ba identidade Jesus nian: “Ó, Há’u nia Oan doben, iha Ó, Há’u tau ona Há’u nia ksolok tomak” (Mc 1,11) hatudu katak Jesus nee duni mak Dalan, Lia-loos no Moris (cf. Jo 14,6), “Verbo Encarnado” (Jo 1,1) Maromak nian.
Iha roman festa boot ne’e, Santa Igreja convida ita fiar na’in sira atu hola fali consciência kona ba riku-soin boot nebé Maromak haraik mai ita ida-idak liu husi Sacramento Batismo. Sacramento nebe halo ita tama no hola parte iha comunhão ho Santíssima Trindade. Katak, ita ida-idak nudar ema fiar na’in nebé simu ona batismo, sei buka haka’as-an atu bele hafoun-an fali nudar “Maromak nia oan doben” iha dalan santidade nian, ba nati tuir Jesus Cristo, ita nia Dalan, Lia-loos no Moris, nebé halo An ki’ik nudar “Atan terus na’in” atu loke fali dalan no odamatan Lalehan nian mai ita.