Santo Padre Leão XIV sei hasoru malu ho membro Colégio Cardinalício ka Cardeal sira iha loron 26 no 27 fulan Junho antes festa São Pedro no São Paulo nian, kona ba Consistório Extraordinário nebé foco ba situação ohin loron igreija no mundo nian, atu buka paz, no implementação Sínodo nian.
Sala Imprensa Santa Sé nian divulga programa kona Consistório Extraordinário Cardeal sira nian, nebé sei realiza iha 26 no 27 fulan junho. Santo Padre sei hasoru malu ho Cardeal sira, sei discute kona ba assunto sira hanesan conflito sira nebé mak afeta ba mundo no oinsa igreija bele comunica liu husi linguagem no atitude atu cria paz no reconciliação.
Ida nee sei sai hanesan Segundo Consistório iha Papa Leão nia pontificado, encontro primeiro halao iha Janeiro, nebé halibur cardeal eleitor sira no la eleitores sira hamutuk nain 170 husi mundo tomak. Iha momento neebá Santo Padre anuncia kona ba hasoru malu iha fulan Junho nee no Nia dehan katak “Hau sente no experiencia necessidade atu bele conta ho imi”.
Baseia ba programa nebé divulga husi Sala Imprensa Santa Sé nian, serviço sira hotu sei tuir método “Synodal” ho oração, silencio, reflexão pessoal, discussão grupo no sessão plenária.
Pedido ba Cardeal sira atu mantem “confendencialidade” kona buat hotu nebé mak acontece ka lao iha plenária nia laran, labele presta declaração imprensa durante consistório, ho forma atu preserva atmosfera troca fraternal nian.
Iha Sessão Haat ba Reflexão
Participante sira sei fahe ba grupo 20. Grupo 9 sei composto husi cardeal eleitor sira nebé mak ordinário, inclui Núncio Apostólico sira no Cardeal eleitor sira nebé completa ona sira nia serviço hanesan ordinário.
Grupo 11 seluk sei inclui Cardeal eleitor sira husi Cúria Romana no Cardeal non-eleitor sira. Cada grupo sei iha nia Presidente, nebé sei modera discusão no controla tempo, no sei iha mos Secretário ida, nebé sei halibur contribuição sira no relatório final grupo nian.
Consistório nee sei começa iha Sexta-Feira dia 26 de Junho ho missa iha Basílica São Padro, nebé sei preside husi Papa Leão XIV.
Hafoin nee, Cardeal sira sei muda ba Salão Paulo VI ba sessão abertura nian, nebé sei hahu ho cantico Veni Creator Spiritus, discurso husi Cardeal Giovanni Battista Re, Decano do Colégio Cardinalício no intervenção introdutória husi Papa.
Iha primeira sessão sei foco iha questão: “Tipo mundo ida oinsa mak ita hetan bolu atu proclama evangelho?” Cardeal Grzegorz Rys, Arcebispo Metropolitana de Krakow, sei oferece meditação bíblica, tui ho silencio, oração, partilha em grupo, no relatório iha sessão plenária.
Iha sexta-feira loraik, iha Segunda sessão sei aborda kona ba tema: “Cultura do poder no civilização do amor”. Cardeal Victor Manuel Fernandez, Prefeito Dicastério ba Doutrina Fiar nian, sei apresenta tema nebé baseia ba Capítulo V Magnfica Humanitas nian.
Cria Bem Comum
Iha sábado dader, depois de missa iha Basílica São Pedro nebé preside husi Cardeal Re, Cardeal sira sei resumo sira nia serviço iha Salão Paulo VI.
Iha terceira sessão, intitulada “construi bem comum: fatin serviço sira iha ita nia tempo,”sei introduz husi Cardeal Stephen Brislin, Arcebispo Metropolitana da Johannesburg no Presidente da Conferência Episcopal Católica da África do Sul.
Discussão nee sei foco ba fractura sira nebé dificulta atu cria bem comum, questão sira nebé mosu husi ema no comunidade, no suporta husi igreija local no igreija universal bele oferece.
Sessão dahaat ka sessão final sei halao iha sábado loraik iha Salão foun Sínodo nian no sei dedica ba “Dalan atu implementa Sínodo”. Cardeal Mario Grech, Scretário Geral do Sínodo, sei introduz tema, hahu husi Documento “Towards the Synodal Assemblies 2027-2028: Etapa sira, Criteria, no instrumento preparação nian. Sessão ida nee sei inclui questão clarificação nian, dialogo ho Papa Leão XIV no intervenção livre ho duração três minutos.
Discurso husi Papa mak sei encera Consistóro nee, no tuir mai sei hananu Te Deum no Jantar hamutuk ho Papa iha Salão Paulo VI. No iha Segunda-feira dia 29 de Junho Papa Leão sei preside missa iha Basílica São Pedro ba Solenidade Santo Apostulo São Pedro no São Paulo nian.
Nunee, iha sorin seluk Presidente Conferência Episcopal Timorense, Dom Virgílio Cardeal do Carmo da Silva, SDB mos desloca ona husi Timor iha loron quarta-feira dia 24 de Junho, atu ba tuir Consistório nee iha Vaticano.