CET, (01.09.2026) – Restos Mortais bispo Nain tolu Dom Jaime Garcia Goular (1941-1945), Dom José Joaquim Ribeiro (1965-1967) ho Mons. Martinho da Costa Lopes (1978-1983) Terça-Feira (1/09) toó ona Timor-Leste iha oras tuku 1.43 otl ho avião aero Díli. Iha aeroporto internacional Nicolau Lobato, urnas prelados nain tolu simu ho parada militar husi Falintil FDTL continua ho procissão ba iha sala VIP hodi assina termo de entrega husi governo ba Parte Igreja nian.
Dom Virgilio Cardeal do Carmo da Silva representa parte igreja hodi hatudu nia sentido ksolok no gratidão ba governo liu husi serviço hamutuk hodi lori hikas restos mortais Bispo nain tolu nian mai iha Timor-Leste. “Conferência Episcopal Timorense simu ho fuan nakonu ho ksolok, gratidão no emoção espiritual ba ato solene entrega oficial ata transladação restos mortais maktoban prelados sira Dom Jaime Garcia Goulart, Dom Joaquim José Ribeiro no Monsenhor Martinho da Costa Lopes, tenik Dom Virgílio Cardeal.
Liu tan neé, Dom Virgílio Cardeal aprofunda tan katak, Wainhira igreja simu husi governo parte Timor-Leste nian documentos histórico ida nee, ida nee laos deit acto formal instituicional ho protocolar ida, maibe sai mos nuudaar sinal concreto, serviço hamutuk no colaboração nebé diak entre igreja no governo no mos sai nuudar momento espiritual ida, iha nebé ita halo iha Maromak futar oin no ba história rai ida nee nian, hodi reafirma identidade religiosa no nacional Timor nian no hatudo comunhão entre igreja ho Estado timorense”. 
Presidente da CET neé mos hatutan tan katak, Bibi atan sira nebe ohin ita simu solenemente sira nia ruin laos pertence deit ba igreja, maibe sira pertence mos ba rai no povo doben Timor nian. Iha momento sira nakukun iha ita nia história luta nian, sira sai ona nuudar lian husi lian laek sira, sira hamriik metin nuudar tur ain sira ba ema sira nebé moris iha terus no susar funu nian, sira sai ona nuudar fortaleza esperança nian no defensor no luta ba dignidade ema nian no ba autodeterminação rai ida nee ninian.
Presidente da CET ne’e mos hodi Bispo, padre, madre, sarani sira hotu nia naran hatoo sentido agradecimento nebé klean ba IX governo
constituicional nebé liderado husi Senhor Kay Rala Xanana Gusmão, ba colaboração husi Presidencia República nebé serviço makaas comissão externa nian hamutuk ho Embaixada Timor-Leste nian iha Portugal, ba comunidade Salesiana iha Évora, ba Bispo sira husi Diocese Angueran, Patriarcal Lisboa, ba Arquidiocese Évora nian nebé ho colaboração makaas tebes ba transladação husi Portugal mai Timor no Bispo Diocese Denpasar nian nebé acolha ona restos mortais iha Bali Indonesia.
Ikus liu nia mos convida sarani Timoroan hotu atu lori ho domin saudoso prelado sira ba fatin nebé prepara ona iha Tasi-Tolu, ba presta homenagem, reza no missa hamutuk ho sira too loron nebé ita sei lori sira ba haloot iha Sé Catedral Dili nian. Ita lao hamutuk nuudar kreda no nação hodi hatudu ita nia reconhecimento gratidão ba sira nia contribuição ba rai no povo Timor, sira nia naran hakerek ona iha ita nia história no sira nia memória continua moris iha ita nia neon no sira nia legado husik hela ba geração ohin no aban bain rua.