CET- (Maloa, 31 Agostu 2026) Presidente Conferência Episcopal Timorense Dom Virgílio Cardeal do Carmo da Silva,SDB, Pro Presidente da CET Dom Norberto do Amaral e Secretário da CET Dom Leandro Maria Alves hamutuk ho nailulik sira, religiosos e religiosas, Autoridade governo no Estado, sarani sira segunda-feira ne’e halo transladação ba Restos Mortais Maktoban Dom Alberto Ricardo da Silva nian iha capela cemitério dos Padres Maloa, Ailok Laran Dili ba Esplanada Tasi-Tolu.
Molok translada Maktoban Dom Alberto Ricardo da Silva nia restos Mortais ba Esplanada Tasi-Tolu, inicia ho celebração Santa Missa Eucaristia nebé preside husi Presidente da CET Dom Virgílio Cardeal do Carmo da Silva iha Capela Cemitério dos Padres Maloa, Ailok Laran Dili.
Iha biban homilia nian Dom virgílio Cardeal hateten, Celebração Eucaristia ne’e nudar momento agredecimento nian ba Maromak basá ho domin Maromak nian mak halibur hamutuk ita iha fatin ne’e liu Husi Dom Alberto Ricardo.
“Agradece ba Maromak hanesan segunda leitura dehan; tamba Maromak nia domin nebe boot hodi ita sai Maromak oan, domin boot ida ne’e mak lori ita hamutuk no kesi ita iha Dom Ricardo ninia moris tomak, ne’e mak sai hanesan ninia motor nebe lori nia atu halo buat oi-oin durante nia sei moris iha mundo nee”.
Iha sorin seluk Dom Virgílio mos reflete kona ba bem aventuranças Maromak nian. Nunee, Bispo celebrante nee hateten katak “ oras nee daudaun Dom Alberto goza ona ksolok ida nee, ksolok ida ne’e maka kontinua inspira ita lao iha rai ida ne’e, hahu husi ksolok serviço atu hari dame, nunee hanoin fila fali missão tomak Amo Ricardo ninian nudar Bispo knaar ida nebe nia halo iha tempo 2006 mai oin, knaar boot ida ne’ebé halo mak reconciliação”.
Iha fatin hanesan, Dom Virgílio mos fo sasin katak durante iha Dom Alberto nia ukun nia buka atu harii domin, paz no damen. “Iha situação nebé dificil maibe nia missa hamutuk ho amu sira, seminarista sira no grupos oioin oinsa mak atu continua hadia dame no domin no liu-liu reconciliação ho grupo hirak nebé halao barulho iha tempo dificil nia laran”, Dom Virgílio dehan.
Dom Alberto mos husik erança ida nebé ita Timoroan tenke contínua mak dame, domin no paz no liuliu atu buka respeita ema nia vida humana nebé Dom Alberto halo ona no ita buka atu continua nafatin missão hirak nee.
Bispo celebrante ne’e salienta tan katak “Durante loron hirak ne’e nia laran laos momento histórico deit, maibe profundamente nia sentido nebé klean liu mai ita sarani. La too deit konta buat nebé sira halo ona, maibe oinsa ita atu continua haburas liutan ho sira nain haat nia maneira nebé hakiak ona iha rai doben ida nee. Nunee momento ida nee laos deit renovação, maibe momento de converção iha ita nia maneira pastoral no apostulado iha ita ida-idak nia missão”.
Presente iha Eucaristia nee Dom Norberto do Amaral Bispo da Diocese da Maliana no Pro Presidente da CET, Dom Leandro Maria Alves Secretário Geral da CET no Bispo Diocese de Baucau, Nailulik sira, Diáconos, Seminaristas, Religiosas, autoridade no sarani sira hotu.
Depois de missa Bispo sira, Nailulik sira no hamutuk ho sarani sira hotu translada Restos Mortais Maktoban Dom Alberto Ricardo da Silva ba esplanada Tasi- Tolu, Dili.