CET, 2.9.2026: Sarani Paróquia Laleia quarta neé (2/09) simu Urna Mons. Martinho da Costa Lopes ho cultura Laleia nian no acompanha ho moradores no dadolin husi lianain sira. Depois de processo hirak neé hotu, sarani Laleia acompanha Urna Mons. Martinho da Costa Lopes visita família durante oras ida nia laran. Iha biban neé família sira mos halo acto monu ain ba Mons. Martinho hodi husu perdão ba hahalok ruma nebé durante nia sei moris iha rai neé família halo hasoru nia. Família no sarani sira hamonu matawen wainhira halo acto refere. Hafoin de visita família sira, Urna Mons. Martinho da Costa Lopes translada hikas mai iha Paróquia Laleia hodi preparação ba Santa missa.
Liu tiha oras balun nia laran continua kedas ho Santa Missa nebe preside husi Dom Leandro Maria Alves Secretario da CET, Bispo Diocese de
Baucau ho presença Urna Mons. Martinho nia iha Paróquia Laleia.
Iha homilia Dom Leandro Maria Alves hateten, Monsenhor Martinho da Costa Lopes nudar Laleia oan ida. “ exemplo no hahalok nebé mak Monsenhor Martinho halo, hahu kedas iha igreja nia hakuak ninia oan sira ho domin, hakuak nai lulik sira hakarak atu nai lulik sira moris hamutuk, no oinsa mak nia hakas-an atu bele ba visita sarani sira no hakbesik-an ba sarani sira hodi moris hamutuk ho sarani sira, no buka tuir sarani sira nebe mak terus ho povu timor nebe mak terus, ema ida nebe mak fo ninia aan ba mate nee mak monsenhor Martinho ema ida nebe mak entregas ninia an no fo ninia an ba domin ba nai maromak”.
Liu tan ne’e Dom Leandro haktuir, Monsenhor Martinho da Costa ita hatene katak, nia hetan terus mesak tan dok husi nia bibi sira, husi nia rain, dok husi ema nebé nia hadomi mesmo que ita nia fiar hanorin nafatin ita katak, terus nebé mak ema los sira koko tan sira buka lialos sei la saugati, Maromak sei rona duni sira, no ema kiak sira nia terus, halerik Maromak sei se tilun, monsenhor Martinho nia terus ba igreja no rai doben Timor-Leste ne’e hanesan los osan mean nebé ema koko iha ahi-klak nune’e mak Maromak koko Monsenhor no haraik ba nia buat nebé mak nia husu ho nia harohan iha vida ba igreja no ba povo Timor Lorosa’e
Iha Monsenhor nia moris nia ho aten brani hodi koalia hasoru injustiça sira. Nune’e Dom Leandro fo sasin katak “Nia aten brani koalia makas hasoru injustiça ne’e laos tanba nia ema político ida, maibe convicção ida nee hatudu lolos ba ninia identidade ka ninia an nuudar Maromak ninnia profeta Maromak ninia emar hatudu nia an moris tuir evangelho, nia hahalok sira ne’e concretiza moris evangelho nian”.
Atu termina homilia, Secretário da CET ne’e fo hanoin ba sarani sira hotu katak, “Monsenhor nia restos mortais fila ona mai ita nia rain laos deit lori sentido atu haloot fali iha ita nia rain, maibe lori ita ba atu haboot liutan ita nia fiar ba Maromak, hanesan sarani labele lakon ita nia fiar no halo ita hadomi liu tan ita nia rai ida nee, haboot liutan nacionalismo. Hadomi liutan ita nia igreija no nação. Nia fo sasin mai ita hotu katak sai Cristo ninia sasin ba ema significa brani atu defende fiar, direitos humanos no nação nia dignidade. Hamutuk liu husi Monsenhor nia harohan daet Timoroan sira hotu bele moris hakmatek”.
Iha Eucaristia ida ne’e marca presença husi nailulik sira, madre sira, policia militares sira, autoridades posto Manatuto no laleia, sarani laleia sira ho família husi Urna Monsenhor Martinho da Costa Lopes.