CET (02-09-2026) – Urna Dom Jaime nian translada husi esplanada Tasi-Tolu ho carro funerário MACLN no to’o iha portão entrada ISFIT nian iha oras tuku 9.45 otl simu ho serigala, tebedai no look bua malus husi estudantes ISFIT.
Reitor ISFIT Pe. Justino Tanec hateten razão hili Dom Jaime Garcia Goulart nudar patrono ISFIT tamba figura nebé tau matan ba nia bibi sira no hanesan mos promotor ba educação nebé ita bele categoria ba nível tolu iha promoção ba educação.
“Primeiro Dom Jaime hanoin katak atu Timoroan sira moris digno nudar Maromak oan precisa educação nebé fo importância primeiro liu ba Nailulik timoroan sira, tamba bispo precisa ninia colaboradores mais próximos. Segundo educação ba catequistas sira, Dom jaime Garcia Goulart reconhece katak, padres sira labele
responde ba nececidades hotu nebé sarani sira precisa quando leigo sira lahetan formação ida nebé adequada, tamba ne’e mak Dom Jaime hari escola ba catequitas sira. Terceiro educação ba kbiit laek sira, tamba educação iha carater exclusiva, educação católica nebé iha conta mos ho povo kbiit laek ninia educação, igreja nia papel liu husi educação destina mos ba povo kbiit laek ninia oan sira, liu husi educação bele hadia ema nia moris, liu husi educação bele hari timor ida ba ema hotu. Tamba ne’e mak desde existência ISFIT hili kedas Dom Jaime hanesan patrono.
Iha discurso Reitor ISFIT Pe. Justino Tanec dehan katak, mehi Dom Jaime nian liu husi educação bele hatutan maske iha contexto la hanesan, maibe bele alcança mehi ne’e liu husi educação nebe diak. Pe. Justino continua mos tan katak, presença Urna Dom Jaime Garcia Gaulart nian nudar prova ida ba ISFIT katak, iha fatin mos ba ema kbiit laek sira, ema sira nebé economicamente laiha, liu husi programa igreja nian no doador sira mos bele tulun sira hodi bele hetan educação iha ISFIT.
Liu tiha oras balun nia laran continua kedas ho Santa Missa nebé preside husi Reitor ISFIT Pe. Justino Tanec. Pe. António Quenser nebé hetan confiança hodi halo reflexão hateten, Dom Jaime Garcia Goulart mak sai patrono ba Instituto Filosófico no Teológico ne’e. Tanba hare ba nia contribuição no dedicação ba educação timoroan sira nian nebé makaas tebes. No Dom Jaime mos sai Nailulik no Bispo desde 1932 too 1967 iha Terra de Santa Cruz e Terra de Santa Maria Timor Oriental.
Além de ne’e Padre António Quencer foca makas mos ba lema Episcopal Dom Jaime Garcia Goulart nian nebé dehan “Vence o mal com o bem”. Ninia vida episcopal lao tuir duni lema ne’e.
“Vence o mal primeiro mak mal nebé existe iha poder opressão durante funu Japones iha Segunda Guerra Mundial, nia sente povo nia sofrimento ho nia sofrimento rasik. Hamrik hanesan profeta iha tempo nebá hodi fo esperança ba povo. No Mal nebé existe iha ignorância no analfabetismo nia koko atu luta vence o mal ho educação Católica ba Timoroan sira, inspira hodi forma Timoroan sira tanto iha vida casal no vida sacerdotal hodi harii colégio no seminário, formação catequista no sira seluk tan. Ida nee marca tebes história educação católica iha Timor Lorosae” tenik Pe. António Quenser.
Padre ne’e reforça mos tan katak buka atu continua nafatin história Dom Jaime Garcia Goulart nian, sai vencedores ba buat aat nian, libertadores no sai protagonista iha formação ba justiça, fraternidade, solidariedade no paz nian.
Atu remata ninia homilia, Padre António Quencer encoraja ISFIT atu sai nafatin LUX MUNDI ka naroman mundo nian. No nia mos husu ba Maromak ho intercessão Nai Feto Virgem Maria nian hamutuk ho mahein Dom Jaime Garcia Goulart, ba instituição ida nee no ba futuro instituição ne’e, atu sai protagonista ba rai Timor.
Santa missa nee Preide husi Reitor ISFIT Pe. Justino Tanec no marca presença husi Nai lulik sira, estudante sira, cenado académico no staff sira instituto de Filosofia no Teologia Dom Jaime Garcia Goulart Fatumeta nian.