CET (03.09.2026) – Governo Timor-Leste fo homenagem ikus ba Monsenhor Martinho da Costa Lopes iha Município Manatuto. Ceremónia homeagem ida nee realiza atu fo honra ba Monsenhor Martinho da Costa Lopes nia moris tomak nebé nia hatudu iha ninia contribuição no dedicação nebe boot tebes ba sociedade no povu Timor-Leste. Ceremonia de homenagem nee realiza iha ponte 
entrada ba Manatuto nian nebe uluk hanaran ponte de Manatuto no hori ohin ba oin sei hanaran fali naran Ponte Manatuto nudar “Ponte de Dom Martinho da Costa Lopes”. Entidade sira governo no igreja nian nebe marca presenca iha ceremónia de homenagem ne’e mak Representante Embaixada Portugal iha Timor-Leste, Bispo diocese Maliana ho Baucau nian sira hotu, Presidente autoridade husi município Sanolu resin tolu, Presidente da República, Membro do Governo, Membro parlamento, sarani no povo Municipio Manatuto tomak. Ceremonia de homenagem nee halao hakonu-an ho lia dadolin, dancas culturais no discursos importante sira nebe afirma legado Dom Martinho da Costa Lopes nian ba rai no povo Timor-Leste.
Monsenhor Martinho da Costa Lopes moris iha Laleia, concelho de Manatuto, Timor Leste, iha loron 11 fulan Novembro tinan 1918 no mate iha Lisboa Portugal 27 de Fevereiro 1991. Durante ninia moris nia halao knar nudar Nailulik, Deputado Timor nian ba Assembleia Nacional Portugal nian, no nudar Administrador Apostolico Diocese Dili nian. Iha duni ninia knar hirak nee, principalmente nudar Administrador Apostólico nee nia laos deit luta ba evangelização ema Timor nian maibe nia luta mos ba Timor ninia independencia hodi koalia makas tebes contra ocupacao Indonesia nian no contra violencias no injusticas nebe acontece iha Timor-Leste.
Atribuicao naran Monsenhor Martinho da Costa Lopes ba Ponte Manatuto hodi sai fali Ponte de Dom Martinho da Costa Lopes nee hanesan sinal de reconhecimento husi Governo no Estado Timor-Leste nian ba Monsenhor Martinho tamba ninia luta incansavel ba Timor-Leste nebe nia hatudu too nia hakotu is. Iha Timor-Leste Monsenhor Martinho da Costa Lopez considerado hanesan heroi nacional ida mos.
Ponte ida nee inaugurado husi Presidente da República Dr. José Ramos Horta no benzido husi Dom Leandro Maria Alves Bispo de Baucau e Secretario Geral da CET.
Iha ninia discurso Presidente da Republica hateten katak ohin “ Ita iha Manatuto, Monsenhor Martinho da Costa Lopes nia moris fatin, atu fó homenajem ba mane ida ne’ebé pertense ba história rai ida-ne’e nian, ba história Igreja Católica nian, ba história rezisténsia nian no ba história ita nia nacao nian. Presidente RDTL nee realca tan katak “Ida ne’e hanesan momento ida ne’ebé profundamente pessoal, tanba ha’u iha oportunidade atu conhece pessoalmente ho Monsenhor Martinho. Ami serbisu hamutuk iha Estadus Unidus Amérika no iha Europa”. Iha fatin hanesan, Presidente fo sasin katak mas que Monsenhor Martinho da Costa Lopes ema obriga nia hodi sai husi nia moris fatin maibe nia ho aten brani nafatin denuncia crime sira nebe halo ba povo Timor-Leste. Hodi fo sasin klean liu tan buat nebe Monsenhor Martinho da Costa Lopes rasik hateten Presidente da Republica haktuir “Ha’u lembra no rona nia ko’alia ho Fiar. Nia lian la hamosu ódio ka vinganca. Nia ko’alia kona ba povu Timor nia sofrimento ho tristeza ida ne’ebé ha’u sei la haluha. Maibé, bainhira nia ko’alia kona-ba Timor, nia matan hetan fali forsa. Tanba, maski ema hasai tiha nia hosi nia rai, nia nunka husik atu ema hasai tiha Timor hosi nia fuan”.
Presidente haklean liu tan hodi dehan iha biban kmook nee, Ponte Manatuto atribui ho naran Ponte Monsenhor Martinho da Costa Lopes. Uluk nanain tanba “Monsenhor Dom Martinho moris iha Laleia, nia Manatuto nia Oan. No razao nebé klean liu mak Ponte ida liga ninin rua ne’ebé uluk haketak malu. Ponte ne’e liga ema sira, comunidade sira, região sira no dalan sira. Ponte ne’ebé ohin lori Monsenhor Dom Martinho nia naran liga fisicamente território sira. Maibé, simbolicamente, ponte ne’e liga ema Timor-Leste tomak. Durante ocupação, Monsenhor Dom Martinho sai hanesan ponte ida: entre povo no Igreja, entre fiar no defesa ba dignidade humana no entre realidade Timor nian no comunidade internacional.
Ohin Ponte Monsenhor Martinho da Costa Lopes sai nuudar ponte esperança no conciencia ba mundo no liuliu povo Timor-Leste nian.