CET (03.09.2026) – Dom Leandro Maria Alves Bispo da Diocese de Baucau no Secretário da CET quinta-feira loraik nee celebra missa ho presença Urna Monsenhor Martinho da Costa Lopes iha Paróquia Santo António Manatuto.
Celebração eucaristia nee nuudar celebraçõ histórico ida nebé nakonu ho emoção, fiar no memória ba povo no sarani Manatuto tanba Monsenhor nuudar Manatuto oan ida no sai figura importante iha povo no Cristão Timoroan sira nia história. Presença Urna Monsenhor Martinho da Costa Lopes nian nee nuudar mos momento reencontro ida. Nunee sai mos nuudar momento reflexão ida atu relembra fali hahalok, ação diak sira hotu no missão pastoral sira nebé mak sai legado Monsenhor Martinho da Costa Lopes nian
Monsenhor Martinho da Costa Lopes halao kna’ar nudar administrador apostólico Diocese Dili nian, Dom Leandro haktuir katak bainhira Monsenhor hanesan administrador apostólico nia halao nia knaar atu bali ninia povo, bali ninia bibi sira, cuidado ninia bibi sira, nia cuidado ninia bibi sira ho nia domin tomak, nia domin ba ninia bibi sira hatudu ninia domin ba Nai Maromak. Hanesan Nia bali Timoroan sira hotu durante moris iha terus no susar nia laran.
Secretário da CET nee hatutan tan iha nia homilia hateten katak Monsenhor nia presença iha ita nia leet lori esperança mai ita hotu basá hanesan iha São Paulo nia surat ba sarani sira iha Roma dehan esperança halo ita laran la nakraik, esperança la bosok ita. Nunee, Monsenhor mosu iha ita nia leet atu fo esperanca mai ita, fo esperanca ba Timor oan sira, esperanca ida nebe atu tau confianca iha Nai Maromak, Nia la lori esperança nebé sem Nai Maoromak maibe buka atu hatur metin iha Nai Maromak.
Sacrifício nebé Monsenhor halo boot ba Timoroan sira tanba Nia iha domin boot ba Nai Maromak no Jesus Cristo nebé sacrifica nia an tanba ita nia sala sira hotu. Ho nee, Nia concretiza Maromak nia domin iha nia moris tomak liu husi nia hahalok, ação no iha nia liafuansira hotu, hanesan Nia halo ba povo no Igreija Timor iha tempo susar nia laran.
Sacrificio barak mak Monsenhor halo ona ba povo Timor, nunee atu conclui homilia, Dom Leandro encoraja sarani sira katak agora ita iha liberdade ona, ita moris iha democracia nia laran maibe keta haluha ita nia fiar iha Nai Maromak, hametin nafatin ita nia fiar iha Nai Maromak hodi bele desenvolve ita nia nação nebé mak Monsenhor hadomi no ita mos hadomi.
Tuir plano Urna husi Monsenhor Martinho da Costa Lopes sei rai iha Manatuto kalan ida no iha dia 4 de setembro mak sei translada fali mai iha esplanada Tasi-Tolu, Dili.