Sua Santidade Papa Leão XIV hafoin halao visita apostólico iha Algéria, nuar visita dahuluk ba ninia visita apostólica iha continente África, quarta-feira, 15 de abril ne’e continua ninia visita daruak nian ba rai Camarões, molok continua visita ba Angola no Guine Equatorial tuir plano visita apostólica dala ida ne’e nian, molok fila fali ba Roma iha quarta-feira, 23 de Abril mai ne’e.
Santo Padre Leão XIV too iha Aeroporto internacional Yaounde-Nsimalen, iha capital Camarões nian, iha tuku 14:57 tempo local nian iha loron nebe hanesan. Tuir plano Santo Padre sei hela iha Camarões to’o sabado dia 18 de abril 2026.
Papa Leão XIV too iha Camerron simu husi Primeiro Ministro, Dr. Joseph Dion Ngute hamutuk ho autoridades civis ho eclesiásticas no sarani sira nebe mak presente iha Aeroporto Internacional Yaounde-Nsimalen. Ceremónia boas vindas nian continua kedas ho kiik oan nain rua nebe hakat ho ksolok boot ba cumprimenta Santo Padre; hananu Híno Nacional Vaticano no Camarões nian hodi hatudu sentido de honra. Hafoin ne’e halo kedas apresentação autoridades sira nebe iha de delegação Papa nian no mos autoridade sira husi parte governo Camarões nian. Ceremónia Boas Vindas hotu tiha realiza kedas encontro ida entre Sua Santidade Papa Leão XIV ho Primeiro Ministro Camaões nian.
Santo Padre nia loron primeiro iha Camearões hahu ho visita cortesia ba Palácio Precidencial Presidente Camarões nian hodi hasoru malu privado ho Sua Excelência Paul Barthélemy Biya nudar Presidente da República Camarões. Iha palácio ne’e mos mak Santo Padre Leão XIV hasoru malu no halo discurso ba autoridade sira, sociedade civil no corpos diplomáticos nação nian. Iha ninia discurso Santo Padre Leão halo nafatin apelo kona ba paz, justiça no compromisso ba bem comum.
Tuir horári iha loron nebe hanesan Amo Papa Leão XIV sei visita mos orfanato Ngul Zamba, no iha loraik nia sei hasoru malu ho Bispo sira Camarões nian iha Conferência Episcopal Camarões ninia sede. Iha ninia visita ba orfanato Ngul Zamba iha Yaoundé, Santo Padre Leão XIV encoraja labarik sira nebe enfrenta dificuldade sira moris nian atu hare sira nia an hanesan parte ida husi família nebe nakonu ho domin. Santo Padre agradece ema sira nebe halo serviço tau matan orfão sira, tanba husi sira nia serviço haatudu concretamente domin, no sira ninia serviço ne’e reflete Maromak nia laran luak ba orfão sira.
Santo Padre salienta katak mundo nee nakonu ho indiferença, fatin sira hanesan orfanato sira fo hanoin fali ita katak ema hotu hetan bolu atu cuidado malu no cuidado ema sira nebé mak haleu ita. Tanba iha família Maromak nian la iha ema ida mak estranho no esquecido. Santo Padre ninia liafuan murak sira ba labarik sira ne’e conclui ho entrega no confia iha labarik orfão sira ho funcionário sira ba virgem Maria ninia mahan no tulun, liu-liu iha momento dificil sira.