Iha Segunda-feira nee, dia 20 de abril Papa Leão XIV halao visita ba cidade Saurimo, parte nordeste Angola nian.
Santo padre Leão XIV halao visita ba fatin halibur ema idoso sira iha cidade Angolana Saurimo nian, no bolu fila fali ema nia atenção katak qualidade nação ida nian haree husi oinsa nação ida cuidado ba ema sira nebé vulnerável liu.
Santo padre halao nia visita apostólica iha Angola iha dia 18 de abril, nunee iha segunda dader nee Papa Leão XIV halao visita ba cidade Saurimo parte Nordeste Angola nian. depoisde desembarque, Papa visita ba fatin ema idoso sira nian nebé tau matan husi governo Angola nian. Neste momento, fatin nee halibur ema idoso sira hamutuk 62, mane nain 26 no feto 36.
Iha conversa entre Papa Leão ho idoso sira, Santo Padre manifesta nia ksolok husi “acolhimento nebé nakonu ho fiar ka faith-filled welcome” katak liu husi fiar ita simu ema hotu iha Maromak nia domin. Papa mos partilha nia Esperança atu idoso sira nee hotu bele moris iha ambiente familiar nebé digno.
Husi cuidado ba ema vulnerável sira, Santo Padre bolu ita ba domin Jesus nian, iha nebé Jesus visita nia maluk sira nia uma, visita Pedro nia familia no visita ba Maria, Marta no Lazaro iha Cafarnão. Iha Jesus nia visita sira sempre lori Esperança no domin ba ema hotu.
Iha fatin hanesan, Papa Leão fo Esperança idoso sira katak Jesus sempre presente nafatin ho ita, especialmente bainhira ita perdua malu no buka reconciliação. Iha fatin hanesan Santo Padre mos fo agradeçe ba autoridade Angolana sira nebé apoio makaas tebes ba fatin cuidado ema idoso sira nee.
Papa Leão hatutan tan katak “cuidado ba ema frágil sira nee hanesan sinal ida nebé importante iha qualidade vida social nação ida nian. keta haluha katak idoso sira la precisa deit atu halo assistenica no cuidado sira, maibe, precisa mos atu rona sira tanba sira preserva sabedoria povo ida nian”.
Papa conclui nia visita ba fatin ema idoso sira, ho oração ida ba sira no reza ba virgem Maria atu cuidado no protege sira nafatin.
Iha loron nebé hanesan, Segunda-feira nee Santo Padre Leão mos halo missa hamutuk ho sarani sira Saurimo nian. Durante missa Santo Padre exorta ba sarani sira atu tuir Cristo ressucitado, nebé sempre guia no santifica ita no bolu ita atu “keta buka ai han nebé mohu maibe ai han nebé permanece ba vida eterna”.
Iha Santo Padre nia homilia, Nia husu igreija atu moris hanesan povo nebé lao hanesan Jesus discípulo, ita nia irmão no redentor. Mensagem evangelho guia ita nia dalan sira. Santo Padre mos convida ita atu rona ho fuan nebé nakloke ba liafuan salvação nian, ida nee ajuda ita atu reflete kona ba motivo no propósito ita tuir Jesus nia dalan”.
Santo Padre mos foca kona ba fiar mak salva ita nia moris. Liu husi Cristo Ressucitado transforma no loke ita nia moris husi kbiit espirito nian nebé halakon fim husi história ema nian, nee mak mate. Cristo nee moris! Nia ita nia redentor. Ida nee mak evangelho nebé ita partilha, nebé halo ita sai mau alin. Ida nee mak proclamação nebé transforma sala ba iha perdão. Ida nee fiar nebé salva ita nia vida. Santo Padre salienta tan katak ita la mai iha mundo atu mate. Ita moris laos atu sai atan ba corrupção isin no klamar nian. Forma sira hanesan opressão, violência, exploração no desonestidade acto sira nee nega Cristo nia ressureição, nebé hanesan dom supremo ba ita nia Liberdade.