Segundo dia husi viagem apostólica Papa Leão XIV nian iha Guine Equatorial, Santo Padre celebra missa iha Mongomo, dia 22 de abril no Papa exorta ba cristão sira atu proclama evangelho no construi futuro ida nebé nakonu ho esperança no reconciliação.
Papa Leão XIV preside missa iha Basílica Imaculada da Conceição iha cidade Mongomo, parte Leste Guine Equatorial nian, cidade nee cerca de 7000 de habitants.
Iha homilia, Papa Leão XIV relembra fali missionário sira nebé começa evangeliza iha Guine Equatorial iha tinan 170 liubá, no cita fila fali Papa Paulo VI nia liafuan iha 1969 nebé dehan “Afrcano sira, agora ba oin, imi sai missionário ba imi nia an rasik”.
Iha fatin hanesan Santo Padre mos agradece ba missionário sira, padre sira, religioso sira, no leigo sira nebé sai sinal domin Maromak nian. husi imi nia ezemplo sira moris nian no husi imi nia papel sira iha construção Maromak nia reino, la tauk ba sofrimento sira liu husi imi nia fidelidade ba Cristo.
Santo Padre mos encoraja ema Guine Equatorial sira atu assume compromisso pessoal atu tuir Cristo no realiza obra caridade nian ba bem estar ema hotu nian. compromisso precisa perseverança, precisa esforço no sacrificio, ida nee hanesan sinal lolos creda Cristo nian. Maske enfrenta perseguição ka situação familia nian nebé dificil, Cristão sira tenke confia Na’I nebé hacresce fini Maromak nia reino, no demonstra nafatin domin Maromak nian ba ema sira nebé haleu ita. Santo Padre mos halo refleção kona ba hamlaha povo Guine Equatorial nian no buat hotu nebé povo sente iha sira nia moris loroloron nian, mak esperança. Santo Padre dehan katak ida nee hamlaha ba futuro ida nebé nakonu ho esperança ida, nebé bele hamosu sentido foun justiça nian no produz fruto paz no fraternidade nian. Nia mos convida Guine Equatorial sira atu contribui ba futuro nação nian liu husi salvaguarda ba moris no dignidade da pessoa ida nian.
Iha conclusão, Papa Leão XIV exalta Cristão sira husi Guine Equatorial atu haree ba sira nia nação nia destino, proclama evangelho no construi futuro nação nian nebé nakonu ho esperança.
Iha sorin seluk Santo Padre Leão XIV mos halao inaguração ba Escola Tecnologia do Papa Francisco iha Mongomo, Guine Equatorial, nebé serviço atu ajuda no desenvolve jovem sira nia competencia no abilidade iha parte tecnologia.
Escola Tecnologia do Papa Francisco nee hanesan instituição educacional ida nebé atu promove formação tecnologia no vocacional, especialmente ba foinsae sira.
Iha kuarta feira loraik nee, Santo Padre visita Prisão iha Bata, Papa enfatiza prisoneiro sira katak laiha ema ida mak hetan exclui iha Maromak nia domin, bolu ba justiça ida nebé restaura dignidade no apoio rehabilitação, nunee encoraja detido sira atu fiar iha possibilidade ba mudança.
Iha prisão Bata Santo Padre dehan tan katak administração justiça nian tenke investe iha dignidade no iha potencialidade ema nian. justiça lolos laos deit castigo maibe ajuda reconstrui vítima, culpado no comunidade nebé mak sofre nee nia moris. Santo Padre mos encoraja Prisoneiro sira katak imi la mesak. Imi nia familia sira hadomi no hein imi nia presença no sira barak mak reza ba imi. Maromak nunca baandona no igreija sempre iha imi niam sorin.
Iha final do encontro, molok simu cruz nebé halo husi prisoneiro sira hanesan presente ida, Santo Padre convida ema hotu atu foti momento ida ba refleção no oração, husu atu paz Jesus nian bele hela iha ema hotu nia fuan no misericordia Na’I nian sempre loke dalan foun sira.