REFLEXÃO II DOMINGO TEMPO PÁSCOA Tinan B
7 de abril de 2024
I Leitura: Act 4,32-35
Salmo: 117 (118)
II Leitura: 1Jo 5,1-6
Evangelho: Jo 20,29-31
Liturgia domingo daruak tempo Páscoa nian koalia kona ba comunidade foun eh escolante foun sira nebe simu moris moris foun husi acontecimento Jesus Cristo nia Cruz no Moris-Hi’as nian. Iha leitura dahuluk haktuir kona ba comunidade cristã post-Pascal nebe libur malu hamutuk iha Jerusalém. Comunidade nebe hanaran mos cominidada cristã dahuluk eh primitiva nebe, Kreda haré husi tempo ba tempo nudar comunidade ideal, katak modelo comunidade fiar na’in nian nebe kmanek no murak liu atu banati tuir. Comunidade cristã ideal nee harí husi ema ho raça oi-oin, ante descendência eh background oi-oin, maibe sira neon ida laran ida iha fiar, sira fuan no klamar ida deit. Comunidade cristã dahuluk nee hatudu sira nia fiar iha domin lolós maun-alin nian (amor fraterno) iha gestos eh hahalok sira be concreto liu husi fahe ba malu (partilha): buat be sira iha, iha espírito fraterno, caridade no solidariedade. Hahalok partilha ne’e nia fundamento mak Jesus Cristo nia mistério Terus, Mate no Moris-hias rasik. Jesus nebé fo Nia An tomak ba humanidade, sai nudar exemplo no lalenok ba hahalok escolante sira Jesus nian.
Ba ita, comunidade fiar na’in sira nebe moris iha século rihun rua resin ona evento histórico Jesus Cristo nian, livro Haktuir Apóstolo sira nia Hahalok (Actos dos Apóstolos), fundamental no importante tebes atu cumpreende no reflete oinsa “Kreda moris”. Livro Actos dos Apóstolos fahe ba parte boot rua: primeito (cf. Act 1-12), haktuir kona ba Lia-foun Di’ak nebé ho evento Pentecostal, dudu Apóstolo sira, liu-liu Pedro no escolante Sanulu resin ida seluk, sai ba haklaken to’o fronteira sira Palestina nian; tuir mai, iha parte daruak (cf. 13-28) apresenta expansão Lia-Foun Di’ak nian iha fatin sira fora de Palestina to’o ba rai Roma, liu husi apóstolo Paulo. Testo nebe ohin ita rona, pertence ba parte dahuluk, nebe descreve kona ba hahalok moris comunidade cristã dahuluk Jerusalém nian, nebe acentua partilha dos bens (cf. Act 4,32-25). Hahalok cristão dahuluk nee hatudu “entusiasmo inicial”, kona ba oinsa, fiar iha Jesus Cristo nia Moris-Hi’as transforma ema husi EGOISTA, MATERIALISTA, INDIVIDUALISTA, AUTO-SUFICIÊNCIA, INDIFERENTE, DIVISIONISMO hodi sai EMA FOUN NEBE MORIS IHA DOMIN, PARTILHA, UNIDADE-COMUNHÃO, CARIDADE, SOLIDARIEDADE NO FRATERNIDADE. Hahalok comunidade cristã primitiva nian actual nafatin ba ita sarani sira iha tempo ohin loron no convida ita iha tempo ohin loron atu fila fali ba “ENTUSIASMO INICIAL” nebe hatudu “rosto verdadeiro” Kreda nian. Maibé, keta haluhan, buat kmanek no murak hirak ne’e hotu moris husi KBIIT ESPÍRITO SANTO NIAN. Nune’e, ita bele dehan, Kreda eh comunidade cristã ida nebe moris, hala’o nia missão la ho Espírito Santo nia presença no kbiit…, Kreda no comunidade cristã nee sei namlaik, laiha energia no dinamismo espiritual.
Evangelho nebé loke ho expressão “loron uluk semana nian”, acentua tempo foun (kairos), “nova criação” nebe Jesus Cristo rasik mak harí ho nia mistério Domin Pascal. Comunidade foun nebe Jesus Cristo funda ne’e halibur malu iha cenáculo Jerusalém nian iha tauk nia laran, tanba sira seidauk iha certeza kona ba Lia-Foun Di’ak Cristo nia Moris-hi’as nian. João evangelista apresenta mai ita iha
episódio ohin catequese ida kona ba Jesus Cristo Moris-Hi’as nia presença. Ponto principal nebe evangelista hakarak haklaken mak: “Jesus Cristo nebe terus no mate, oras nee Moris-Hias. Mate la ukun Nia. Jesus nia futar Lia-fuan ba Tomé nebe la fiar, hato’o mos ba ita iha tempo ohin loron: “Rahun-diak ba sira nebe fiar maske la haré”. Figura Tomé nian, com certeza, representa mos ita nia atitude iha tempo ohin loron. Ita sira nebe dala barak husu sinal atu bele fiar. Maibe, se ita liga ho relato leitura dahuluk nian katak, fiar halo ita sai nu’udar maun ho alin, feton ho nán, ita fuan-laran ida de’it, ne’e katak atu bele hasoru malu ho Jesus Cristo Moris-Hiás, ita mos tengki brani hatama liman hodi koko, kanek no terus sira ita nia maun-alin sira tempo ohin loron nian. Hirak nebe kanek tanba injustiça, kuran domin, kuran perdão, kuran aihan, hatais, hela fatin, etc. Ema hirak ne’e mak “rosto verdadeiro” Cristo Moris- Hi’as nian (Cf. Mt 25,31-46).