Reflexão Dominical – Domingo IX Tempo Baibain – Ano B

Iha religião oi-oin mundo ne’e nian, sempre iha visão kona ba saída mak “sagrado”: fatin sagrado, loron sagrado, ema sagrado no instrumentos eh objectos sagrado sira culto nian. Iha liturgia domingo ohin focaliza kona ba “loron sagrado” ema Judeu sira nian, ne’e mak šābbāt eh loron sábado. Sábado nudar loron descansa ema judeu sira nian. Durante tempo descanso nee, ema Judeu sira hanoin tuir fali história criação nian. Na’i Maromak rasik serbisu, maibé iha loron dahitu, Maromak descansa (Gn 2,2-3). Iha loron descanso ne’e, Judeu sira la’o deit atu contempla obra criação Maromak nian, maibé liu-liu atu hasoru malu ho Maromak. Maibe, ba ita ema fiar na’in cristão Católica, sentido hotu-hotu “sagrado” nianhetan nia plenitude iha Jesus Cristo. Tanba Cristo mak Ida nebé tun mai husi Lalehan, hola parte iha comunidade Santíssima Trindade nian, hanesan ita reflete ona iha domingo kotuk, no ita reflete mos iha festa Corpus Christi (cf. Jo 1,1-3.14; Mt 1,23; Col 2,9-10). Nune’e, buat-hotu iha mundo ne’e, inclui loron Sábado, sai “sagrado” wainhira Jesus Cristo sai centro loron Sábado ne’e. Ne’e katak, la’os loron Sábado mak “hasanto” ita ema, maibé ita ema, nu’udar “ilas no tanesan” Maromak nian (cf. Gn 1,26-27) mak “hasanto” loron Sábado tanba Jesus Cristo fó sentido foun ba loron ne’e. Nune’e, mos ba fatin no sasan “sagrado” sira, hetan nia sentido wainhira “ita ema” dedica ba Maromak.
Iha domingo ba dala sia tempo baibain ne’e, ita sei husu: sentido foun ida nebe mak Jesus Cristo fó ba loron Sábado? Sábado lolós, eh ba ita fiar na’in Católica sira nebe hetan sentido šābbāt nian iha mistério Moris-hi’as Cristo nian, katak Domingo da Ressurreição eh loron santo Maromak nian, katak Domingo, mak oinsa los? Loron santo eh sagrado ida oinsa loos mak monu ba Maromak nia futar laran?

Iha leitura dahuluk husi livro Deuteronómio (início da 2a parte do livro/discurso Moisés nian kona ba Decálogo), apresenta Maromak nian ukun fuan ho carácter legislativo, maibé mos ho maneira didática katak atu hanorin no forma consciência povo Maromak nian nebe la’o daudaun ba Terra Prometida nudar povo livre. Foco principal husi texto Dt 5,12-15 nian mak kona ba “ukun-fuan datoluk nian”: “Guarda o dia do Sábado, para o santificares como te mandou o Senhor, teu Deus”. Ukun-fuan kona ba Sábado nee repete dala tolu, hodi acentua importância husi ukun fuan ne’e. Iha nia conteúdo principal, Sábado mak loron nebe Maromak hakarak atu povo Israel expressa-an hanesan ema livre, livre tanba domin boot Maromak nian. Nune’e, israelita oan ida sei sai mos mensageiro da liberdade. Iha duni loron nee, Maromak hakarak, Israelita oan hotu hatene katak: “Sira Maromak nian”. Katak, sira bele halo buat,hotu-hotu durante loron knaar neen nia laran, maibé labele haluhan katak Israelita ida-idak, inclui sira nia atan no buat hotu nebe sira iha, “Maromak nian”. Livro Deuteronómio liga ukun-fuan eh obrigação descasa iha Sábado ho evento libertação povo Israel nian husi fatin terus-atan Egipto nian (cf. Dt 5,15). Portanto, livro Deuteronómio insiste ba Israel oan sira atu utiliza loron descansa nee (Sábado) ba memória libertação be Maromak halo ona ba sira (Dt 4,23; 7,19; 11,2; 26,8). Hanesan ita hatene, “identidade” povo Israel nian harí eh forma husi “memória da libertação” eh “evento Êxodo” nian, nune’e. Loron Sábado, importante tebes ba povo Israel, atu labele haluhan sira nia “identidade” ne’e: Identidade katak Maromak mak Autor ba libertação, Maromak mak na’in no Autor moris nian. Uma vez, povo Israel la tau importância kona ba loron descanso ne’e, mosu risco atu povo ne’e haluhan sira nia identidade no haluhan Maromak nudar “Único Autor da libertação e da vida”. Tan ne’e duni mak, Sábado exige povo Israel atu para lai husi sira nia preocupação sira loro-loron nian hodi hanoin deit kona ba sira nia história da libertação eh iha liafuan seluk ita hanaran “evento da Páscoa”. Nee katak, celebração “Dia do Senhor” nebe ita celebra cada Domingo, folin boot tebes ba ita atu bele recupera nafatin ita nia “identidade cristã”, liu husi “rona Maromak nia futar Lia-fuan no simu Jesus Cristo nia futar Isin no Rán”. Domingo sai duni ba ita sarani sira atu hetan fali “kbiit” husi Maromak rasik no reconhece fali “Maromak nudar na’in ba moris”.

Evangelho, hola hikas temática nebe ita foin reflete iha leitura dahuluk nian, hodi afirma katak Jesus Cristo mak Na’in ba šābbāt eh Sábado. Sábado lolós liberta ema husi mentalidade atan eh escravidão nian: atan ba mundo, atan ba serbisu, atan ba lei, atan ba autossuficiência, atan ba autorreferencial, etc. Iha mentalidade ida nebe lakon ona perspectiva lolós kona sentido lolós Sábado nian, Jesus haklaken fali ba fariseu sira kona ba sentido lolós Sábado nian. Hanesan ita hatene, fariseus sira mak movimento social no religioso Judeu sira nian nebe matenek tebes iha Lei (Torah). Sira nia hanorin sai nudar sasukat no mata dalan liturgia no ritual oi-oin judaísmo-rabínico nian. Maibé, dala barak Jesus critica sira tanba, sira hamatan liu ba buat “liur/exterior – katak, atu ema haré”, do que, buat “laran nian – katak, Maromak mak haré no hatene”.

Iha Evangelho domingo nee nian, Jesus afirma: “O Sábado foi feito para o homem e não o homem para o sábado. Por isso, o Filho do homem é também Senhor do sábado” (Mc 2,27.28). Ba ida ne’e, Jesus hatúr fali “Sábado – loron santo” iha nia sentido lolós: ne’e mak celebração da Vida. Maromak celebra vida liu husi “obra criação” durante loron neen: “Deus viu que tudo era bom” (cf. Gn 1,1-31). Iha duni contexto “bondade” ne’e mak Jesus hanorin ita atu fo sentido lolós ba loron santo – Sábado. Jesus nuudar “Senhor do Sábado”, la precisa to’o loron Sábado ka reserva loron Sábado atu halo diak. Ba Jesus loro- loron tengki sai “loron Sábado”, katak, “loron atu halo buat di’ak”. Escolante Jesus nian, labele hein to’o loron Sábado mak foin hanoin kona ba Maromak, maibe, loron loron tengki halo Maromak hola parte iha nia moris. Loro-loron tengki sai “o Dia do Senhor” – “celebração da vida – celebração da bondade”. Maske nune’e, ba ita ema kbiit laek, nebe “iha tempo ba buat hotu, maibe laiha tempo ba Maromak”, ita precisa tau importância ba loron Domingo atu bele “rona Maromak nia futar Lia-fuan hodi renova fali ita nia identidade nu’udar ilas no tanesan Maromak nian”.