Iha loron dahaat Santo Padre Leão XIV nia visita iha Espanhol, Papa Leão XIV termina nia visita iha Madrid hasoru malu ho voluntário sira molok voo badak ba parte Nordeste Espanhol nian: Barcelona.
Atu conclui Nia visita iha Capital Espanhol nian, Papa Leão passa nia dadeer nee, hasoru malu ho voluntário sira nebé dedica sira nia tempo atu ajuda ema seluk durante Santo Padre nia visita no Santo Padre hatoo Nia sentido de gratidão ba sira.
Amu Papa mos destaca kona ba sira nia laran luak hodi hatan lalais ba ema sira nebé precisa assistencia. “Imi hotu fo saida mak imi bele, oferece imi nia fuan, imi nia liman, imi nia ideia, imi nia talento no imi nia hamnasa. Jesus recompensa imi hotu”.
Santo Padre Leão XIV exorta ba cristão hotu atu lori “fermento abnegação nian” ba ema hotu. “Abnegação nee hanesan fermento nebé hacresce dimensão humana, ética no espiritual sociedade ida nian.
Depois de hasoru malu ho voluntário sira iha Madrid, iha terça-feira meiudia Santo Padre too iha Barcelona hanesan Segundo viagem apostólica nian. Nunee, hahu kedas ho oração Meiudia nian iha Catedral Santa Cruz no Santa Eulalia iha Barcelona.
Nia uza nia domin no Nia conhecimento ba língua sira, Santo Padre hatoo nia homilia nebé mistura entre língua Catalan no Espanhol, no Santo Padre convida ema hotu atu reflete kona ba imagem noiva no isin nian. Nia destaca kona ba oinsa comunidade Católica Barcelona nian, rico iha diversidade de dons, carisma no história pessoal sira, nee hanesan exemplo imagem esposa nian.
Além de ida nee, ita hotu sai ida deit iha Cristo nia isin. Hanesan iha isin ida, “iha isin balun nebé forte no balun fraco”. Membro balun igreija nian visível iha sira nia serviço sira no balun naksubar”.
Perante ida nee, Nia desafia ema hotu halo unidade sai hanesan prioridade. “Ita forte tanba ita unidade, no ita unidade tanba ita animado husi espirito nebé hanesan”.
iha parte loraik iha Barcelona, Santo Padre Leão XIV hasoru foinsae sira iha Stadium Olympicos Lluis Companys no rona testemunha nain 3, nebé reflete tema hanesan conversão, saude mental, violencia no sofrimento. Depois Papa foti tempo balun hodi hatan ba sira nain tolu.
Ba Ferran, nebé koalia kona ba mamuk ka “emptiness” maske Nia alcança sucesso mundo nian, Santo Padre sublinha katak “ita nee cria ba infinito. Tanba nee mak cada horizonte finito sira, cada passo, cada Conquista, maske satisfaz ita maibe, nee mos dudu ita ba oin no convida ita atu continua buka”. Nia incentiva Ferran no foinsae sira hotu atu “haree ba sira nia an” no evita laran taridu ho ritmo moris nian nebé lalais.
Ba Carmina, relata kona ba Nia luta hasoru depressão. Papa destaca katak oinsa “ida nee hanesan sinal ida, katak iha buat ruma nebé mak sala ho noção progresso nebé certo, nebé halo sujeito ida moris iha depressão nia laran, expectação no tensão nebé compromete ba equilibrio mental”. Santo Padre encoraja nia atu haree ba Paixão Cristo nian iha tempo sira nebé mak hasoru situação depressão ka tempo sira nakukun nian.
Ikus liu, Santo Padre koalia ba Cecilia, nebé mak moris iha violencia doméstica, dependencia, no separação familia nia laran. Santo Padre aborda ba tema perdão nian. “ita tenke aprende atu considera perdão, nee hanesan remedio poderoso nebé bele kura buat aat sira no bele cura kanek interior sira, nee hanesan parte ida husi processo no jornada ida”.
Iha homilia depois de koalia tiha ho joven sira, Papa Analisa kona ba Espanhol iha tempo moderno nee, no Santo Padre exalta ema hotu atu reflete honestamente ba desafio iha sociedade ohin loron, inclui pobreza, divisão social no mudança cultural, husu sira atu hanoin kona ba tipo futuro ida oinsa mak sira hakarak cria hamutuk.
Santo Padre mos esplica “Nação ida nee bele sai hanesan espaço ida nebé acolhe ema hotu, iha nebé dignidade ema hotu nian hetan respeito no ema hotu hetan domin sem haree ba ema nian condição ruma”.