Iha loron dahruak ba Papa nia visita iha Barcelona, iha quarta feira dader nee Santo Padre halao visita ba Centro Prisional Brains 1, nee hanesan momento nebé intenso no nakonu ho significado humano no espiritual. Centro Prisional nee localiza iha região metropolitana Barcelona.
Durante Santo Padre nia visita, Santo Padre fo hanoin ba prisoneiro sira katak sala nebé ita comete iha ita nia moris la define ita nia identidade, Maromak sei la para atu hatudu nia domin mai ita, nebé boot liu buat diak no aat nebé mak ita halo.
Santo Padre dehan ba sira hotu katak “Maromak hadomi imi hotu sem haree ba imi nia condição, maibe Maromak iha mehi atu imi bele sai diak liu! Maromak permite ita atu recomeça, atu sai humano e sai cristão la significa katak nunca halo sala, maibe tenke cresce iha capacidade de converte, arrependimento, hadia sala sira no liliu atu reconcilia no perdua.
Papa mos enfatiza sira atu la bele husik ansiedade no tristeza halo imi monu. Maibe husik Maromak nia domin guia ita. Nebé continua convida ita tau esperança iha nia.
Depois de visita tiha centro prisional, Santo Padre continua kedas halao nia visita ba Abadia de Nossa Senhora de Montserrat, nee fatin espiritualidade nebé emblemático liu iha Espanha, iha nebé Santo Padre preside Rosário. Abadia nee Situado entre foho Montserrat, ho nia altitude cerca de 700 metros.
Santo Padre convida fiar nain sira atu simu Virgem Maria nia convite nebé sempre hateke ba Cristo, hatudu mai ita laran sadia, reconciliação, lialos no mansidão “expõe violencia nebé subar iha ita nia liafuan no atitude sira”. Santo Padre enfatiza tan katak Virgem Maria hamoris sentimento nebé nobre liu iha ema no “muda ita ba conversão nebé profundo”, nebé acontece ho Santo Inácio de Loyola, nebé passa nia tempo kalan ida ho oração iha Abadia de Montserrat, ikusmai nia deside atu husik nia arma”. Bainhira Maria dehan mai ita “halo buat nebé Nia Haruka”, ida nee convida ita atu reconcilia ita nia fuan ba hanorin evangelho nian.
Iha parte loraik, Santo Padre hasoru malu ho Organização Dioceseana da Caridade no Assistencia iha Barcelona. Iha nebé Santo Padre Leão XIV hatan ba foinsae sira nia pergunta sira kona ba sofrimento, perdão no sentido moris nian, Nia fo hanoin ba cristão sira katak caridade nebé autentico começa ho reconhecimento Cristo iha ema hotu.
Visita ba Organização Dioceseana da Caridade no Assistencia iha igreija Santo Agustinho nee, Santo Padre rona testemunha sira nebé serviço ba ema kiak sira, idoso sira, imigrante sira no marginalizado sira.
Ba Cristão sira, Santo Padre esplica katak sofrimento nee laos fim. “Mesmo que iha sofrimento, Maromak nunca abandona ninia oan sira”. Encoraja sira atu confia iha Cristo nebé acompanha sira iha tentação hotu no prepara ksolok eterno.
Amu Papa mos fo nia atenção ba missão organização Caridade nian nebé halibur iha Santo Agustí, no Santo Padre agradece ba sira nia serviço, no nia recorreu ba espiritualidade Santo Agostinho nian, fo hanoin sira katak vida cristã começa laos ho esforço humano maibe graça. “Sai Cristão nee, as liu buat hotu, dom ida, graça ida”.
Depois de encontro ida nee, Santo Padre Leão XIV inagura Torre de Jesus Cristo da Basílca da Sagrada Família, ponto nebé as liu iha templo nee hatudu símbolo fiar cristão no identidade Catalã nian.
Papa Leão XIV começa nia visita ba Sagrada Familia hodi reza iha santíssimo Sacramento no visita Antoni Gaudí, nebé ho nia visão forma Basílica sai monumento expressão fiar nain cristão sira liu husi arquitetura, naroman, cor no simbolismo. Celebra missa centenário Gaudi nia mate no fo benção ba templo Jesus Cristo nian, Santo Padre reflete iha evangelho nia bolu ba fiar no enfatiza fiar autentico iha Cristo nee imcompatível ho violencia, indeferença no neglegencia ho sira nebé terus.