Iha loron dahuluk fulan Junho nian, nebe sai nudar loron Dalima ba Assembleia Geral Annual Pontifícias Obras Missionárias/MISSIO nian diretores nacionais husi nação hamutuk atus ida resin iha mundo ne’e hamutuk ho Pro-Prefeito ba Evangelização nian Eminência Luis António Gokim Cardeal Tagle no funcionários ira tomak iha Dicastério Evangelização nian hasoru malu ho Sua Santidade Papa Leão XIV iha Vaticano iha horas tuku 11.15.
Audiência ho Santo Padre ne’e nudar programa ida nebe tinan-tinan realiza hodi rona liafuan murak Amo Papa nian kona ba ação missionária iha mundo tomak nebe dirigida husi Cardeal Tagle no iha cada nação coordena husi diretor nacional MISSIO rai refere nian. Participa mos iha audiência ne’e Pe. Bento Barros Pereira, Diretor Nacional MISSIO Timor-Leste nian.
Santo Padre iha ninia mensagem hahu ho ninia agradecemento ba hotu-hotu nebe presente iha audiência ne’e no ba sira ninia colaboradores sira no ema hotu nebe halao ona knar hodi promove ação missionária iha ida-idak ninia sircumstância eclesiáticas iha mundo tomak iha nafatin comunhão ho igreja inan. Santo padre fo hanoin fila fali mos tinan 100 MISSIO ninia existência ne’e importante tebes. Hodi refelete MISSIO ninia existência ne’e Amo Papa Leão XIV fo hanoin fali katak ohin loron iha mundo nebe mosu funu, fahe malu no conflito entre rai-rai no entre ita ema sira Obras hat MISSIO nian; Pontifícias Obras Propagação da Fé (POPF); Obras Pontifícias Infância e Adolecentes Missionária (OPIAM); Pontifícias Obras São Pedro Apóstolo (POSPA) no Pontifícias União Missionária (PUM), ida-idak buka atu liu husi ninia ação missionária halao diak liu tan igreja ninia missão atu haklaken Jesus Cristo Principe paz nian be iha ninia incarnação hatudu Maromak ninia domin boot nee ba ema hotu-hotu.
Santo Padre realsa tan katak tuir tema celebração loron mundial das missões ka domingo das missões tinan ida ne’e 2026 nian nebe sei celebra MISSIO ninia tinan 100 ho tema IDA DEIT IHA CRISTO UNIDOS IHA MISSÃO buka tulun atu sarani sira tomak bele moris iha unidade ho ita Nain Jesus Cristo sai klean liu tan no hamutuk totalmente iha Missão domin rohan laek Maromak Ninian.
Molok taka ninia mensagem Santo Padre Leão XIV haraik ninia bênção apostólica ba dirigentes sira Dicastério Evangelização nian no diretores nacionais sira hotu ho sira ninia colaboradores sira hotu iha ida-idak ninia fatin no dioceses sira nebe halao serviços vital ação missionária nian. Santo Padre tau mos hotu-hotu iha mahan Inan Virgem Maria Maromak ninia Inan, Liurai feto Missão nian ho Santos Missionários sira ninia harohan daet.