Díli- Madres Filhas da Caridade Canossiana (FdCC) iha província S. José Timor-Leste, nakonu ho ksolok boot simu Madre Geral Me. Sandra Maggiolo, FdCC ho conselheira sira Me. Melissa Dwyer, FdCC, Me. Albertina Luiz dos Santos,FdCC no Me. Mariana Litmanovich, FdCC hahu husi loron 12 too 30 fulan Junho 2026. Visita canónica ida ne’e foin hala’o fila fali liu tiha tinan 10 tanba virus covid 19 nebe mak lao hela iha momento neba.
Iha loron 12 fulan Junho madre provincial Me. Dulce Magno dos Santos, Me. Maria de Carvalho Soares (conselheira) hamutuk ho Madre superiora sira comunidade Dili laran no mos ho madres balun ba simu Madre sira iha Aeroporto Internacional Nicolau Loubato iha tuku 14.00h. Simu ho tara tais nudar cultura Timor nian wainhira simu bainaka sira, hafoin liu kedas ba Becora uma províncialato nian. Wainhira madre Geral ho conselheira sira too iha Becora madre sira hamutuk ho família canossiana tomak : leigos canossiano, voica, meninas colégio Balide no Comoro ho estudante jardim Infantil Becora no mos inan aman balun simu ho ksolok no simu ho tebedai husi irmãs postulantes no noviças sira, hananu husi Irmãs Juniores sira, tara tais no entrega aifunan hodi fo Bem-vinda ba Madre sira.
Iha loron 13 fulan Junho hala’o kedas missa abertura visita canónica nian iha salão canossiana Becora. Missa ida ne’e preside husi Amu Nívio Lebre, FdCC no Amu Fermin Leoveras, FdCC nudar concelebrante. Iha homilia Amu hateten: “vizita ida ne’e la’ós deit eventu institusionál ida. Ida ne’e mak tempu atu hasoru malu, hametin comunhão, rona malu, no hadi’a-an fali. Ida ne’e mak tempu privilegiado ida nebe congregação para atu hatene fali katak Maromak nafatin hamriik besik, dirige, sustenta no fó benção ba família Canossiana iha mundu tomak.”
Dia 14 de Junho D. Virgília Cardeal do Carmo da Silva, SDB mak preside missa iha Capela madres canossiana nian iha Becora tuku 07.00 dader. Iha homilia hateten: “Maromak bolu Nia povu atu sai nasaun santo ida, povu ida nebe Nia haketak ba Nia-an rasik, no bolu sira atu sai povu ida ba misaun.” Tuir mai D. Virgílio hatutan tan: “Maromak bolu ita tanba Nia di’ak no tanba Maromak fiel ba ita.” Celebração Eucaristia remata madre Geral ho nia conselheira sira hasoru malu ho D. Virgílio Cardeal hodi hato’o agradese ba confiança nebe Igreja Timor fó ba madre Canossiana sira iha Timor hodi serbi povu Maromak nian liu husi Carisma no Espiritualidade Fundadora Santa Madalena de Canossa nian.
Iha ocasião ida-ne’e, D. Virgílio Cardeal mos hato’o nia agradecimento ba serviço no presença madre Canossiana sira nian iha diocese tolu iha Timor-Leste nebe durante tinan 147 dedica an ba missão atu haklaken Cristo ba ema hotu-hotu.
Iha loron 14 de Junho ida ne’e mos madre Geral ho nia conselheira sira hahu hala’o visita ba comunidade sanulu resin 19 mak hanesan: Comunidade Canossiana Ataúro, Ainaro, Balide, Baucau, Becora,Comoro – Manleuana, Ermera, Suai, Fohorem, Manatuto, Lospalos, Hauba, Maliana, Iliomar, Uatucarbau, Lecidere, Hato-Udo, Ossú, hamutuk ho comunidade provincialato no remata sira nia visita iha dia 28 de Junho no halao fila fali encontro entre Conselho Geral no ikus mai encontro entre Conselho Geral ho Conselho Provincial iha Becora hodi fahe sira nia esperiência rasik iha comunidade nebe mak sira ba visita no hare saida mak madres sira hala’o no moris iha comunidade ( iha parte espiritual, comunidade no missão).
Molok atu encerra visita canónica ida ne’e iha sorumutuk entre Conselho Geral ho Madres tomak província S. José Timor-Leste nian nune’e iha loron 30 fulan junho dader 8.30h madre sira hotu iha província S. José Timor-Leste hala’o encontro ho Conselho Geral iha salão Canossiana Becora. Iha reflexão hamutuk ida ne’e reflete hamutuk kona ba Santa Madalena de Canossa nia carta ba Domenica Faccioli nebe convida fila fali madre sira ida-idak atu renova fila fali sira nia fidelidade ba Maromak. Iha loraik tuku 17.30 encerra Visita Canónica ho missa nebe mak preside husi Mgr Marcel Smêjkal nudar Encarregado de Negócios de Santa Sé iha Timor-Leste . Iha homília Mgr Marcel, fo hanoin fila fali ba madre sira katak hanesan Jesus nebe hela metin iha ro laran hamutuk ho nia discípulos sira durante tempestade, nune’e mos ohin Jesus hakarak husu mai ita atu iha ita nia moris, buka atu presente nafatin iha sarani sira nia moris.
Iha missa encerramento ne’e hala’o mos lançamento ba Jubileu tinan 150 missão canossiana iha Timor-Leste nebe mak tuir programa sei hala’o preparação durante tinan 3, hahu husi tinan 2026 no sei celebra iha tinan 2029. Tuir programa nebe apresenta husi equipa, tinan ida ne’e hahu ona ho “ ahi caridade” no livro de gratidão nebe mak sei lao haleu comunidade 19 iha Timor laran. “Ahi” hodi hanoin nafatin ba zelo nebe mak madre missionária sira iha, hodi haklaken Cristo ba ema sira no “livro de gratidão” hodi hakerek sinal de gratidão ba madres Missionária sira nebe fo vida mai rai no povo timor, nune’e mos “oração” ba preparação tinan jubileu 150 no “lista madres matebian” sira nian atu bele reza ba madre sira iha sira nia loron mate nian.
Remata tiha celebracão eucarística continua ho Jantar no “noite cultural”. Iha noite cultura ida ne’e madres, aspirantes, postulantes no noviças sira hatudu cultura Timor nian liu husi dança, canta no dahur. Madre sira mos hatoo sira nia sentimento ksolok no agradece ba buat hotu nebe mak sira simu no koko iha Provícnia S. José Timor Leste.
Ikus liu hatoo Boa Viagem ba Madre superiora Geral Me. Sandre Maggiolo,FdCC, Me. Albertina Luiz dos Santos, FdCC, Me. Melissa Dywer, FdCC no Me. Mariana Litmanovich,FdCC nebe mak sei continua fila fali sira nia viagem ba continente Oceania hodi hala’o visita canónica iha rai refere.