Tinan académico 2024, ISFIT hahú ho Celebração Eucarística, Aula Inaugural no assina Acta Memorandum of Understanding (MoU)
DILI- Instituto Superior de Filosofia e de Teologia D. Jaime Garcia Goulart Fatumeta, Dili, Timor-Leste (ISFIT), hahú tinan académico 2024 nian ho celebração eucarística (Misa) hamutuk. Celebração eucarística ne’e realiza iha Sé Catedral de Dili, loron Segunda-feira (22/01/2024). Misa abertura ne’e presidi husi Bispo da Diocese de Baucau e Secretário Geral da Conferência Episcopal Timorense (CET) Dom Leandro Maria Alves. Missa abertura ida ne’e hetan participação husi representante Santa Sé, Mons. Marco Sprizzi, Reitor no Administrador uma formação nian, Padres provinciais sira, senado académico, corpo dos docentes, funcionários no estudante sira hotu ISFIT nian nebé compostu husi faculdade rua mak hanesan filosofia no teologia.
Iha homilia, Dom Leandro Maria Alves hateten katak leitura sira ohin nian convida comunidade académica ISFIT atu unidade nafatin iha serviço, liafuan no hahalok sira. Katak, tem que serviço hamutuk hodi lori ISFIT ba futuru ida nebé nabilan hanesan lema ISFIT nian, Voz Estis Lux Mundi (Imi mak naroman mundu nian), no usa matenek nebé iha, atu hala’o serviço sira ne’e ho fuan. Atu nune’e matenek nebé ita iha ne’e, labele husi kakutak de’it maibé husi fuan mos.Atu remata Dom Leandro tenik, ISFIT labele sai ema nebé lori confusão ba iha sociedade maibé, sai ema ida nebé lori exemplo diak ba sociedade.
Iha sorin seluk, depois de celebração eucarística, ISFIT liu husi senado académico no senado estudantil realiza aula inaugural do ano letivo 2024. Aula Inaugural ne’e realiza iha salão do Seminário Maior Fatumeta (SPEPAL) iha loron nebé hanesan. Aula Inaugural ne’e lori husi Pe. Dr. António Camnahas SVD, Docente da História da Igreja Católica iha Institut Filsafat dan Tecnologi Kreatif Ledalero, Flores, Indonesia. Tema ba aula inaugural ne’e mak, “O Discurso Histórico do Princípio da Liberdade Religiosa, o Reconhecimento Internacional e a sua Implementação no País Timor-Leste”. Atividade ida ne’e hetan participação husi Bispo da Diocese de Baucau, representante da Santa Sé, Reitores, padres provinciais, representante da ANAA, presidente executivo da CONECTIL, docentes, convidados, funcionários no estudantes sira.
Antes de hahú aula inaugural, Magnífico Reitor ISFIT nian Pe. Justino Tanec, iha ninia Discurso nia hato’o agradecimento ba Bispo da Diocese Baucau, Representante do Papa, orador da aula inaugural, Magnífico Reitor da instituição no universidade sira nian, reitor no administrador da casa formação sira, padres provinciais sira, covidados sira, senados, funcionários, docentes no estudantes sira hotu ba participação ativa husi misa de abertura to’o iha aula inaugural nian. No hato’o mos Bemvindo ba docente foun ISFIT nian hanesan Pe. Waldimiro A. Viana Mes. Fil., Pe. Natalino Gusmão Mes. Bib. Sag., no Sr. Ligório Boromeu Mes. Fil.
Depois de discurso, Magnífico Reitor ISFIT nian Pe. Justino Tanec assina Acta Memorandum of Understanding (MoU) iha Bispo da Diocese de Baucau e Secretário da Conferência Episcopal Timorense (CET) Dom Leandro Maria Alves no representante Santa Sé, Mons. Marco Sprizzi nia oin. Acta Memorandum of Understanding ne’e assina entre ISFIT ho Institut Filsafat dan Teknologi Kreatif Ledalero, Flores, Indonesia nebé representa husi Pe. Dr. António Camnahas SVD. Ho assina acta (MoU) ida ne’e ISFIT halo parseiro no hametin relação forte ida iha parte académica nian ho Institut Filsafat dan Tecnologi Kreatif Ledalero, Flores, Indonesia.