Encontro iha nível CET, entre Dom Virgílio Cardeal do Carmo da Silva ho Equipa Formadora husi Seminário haat
DARE– Dom Virgilio Cardeal do Carmo da Silva, nudar responsável máximo ba Seminário sira iha nível CET nian, convoca encontro ida ho equipa formadora sira husi Seminário haat iha Timor, mak hanesan: Seminário Menor Nossa Senhora de Fátima Balide, Seminário Menor do Sagrado Coração de Jesus Maliana, Seminário Propedêutico de São João Maria Vianey Maloa, no Seminário Maior Interdiocesano de São Pedro e de São Paulo Fatumeta. Encontro ne’e realiza iha uma retiro Dare iha loron domingo, (21/01/2024), no hahu ho Missa hamutuk, preside husi Sua Eminência Dom Virgilio Cardeal.
Encontro entre Arcebispo Metropolitana ho Equipa formadora husi seminário haat ne’e nudar encontro dahuluk nebé hala’o iha nível CET, atu Bispo nebé tutela ba formação seminarista sira nian bele tur hamutuk ho reitor sira no membro equipa formadora sira atu rona sira nia hanoin, oinsá atu melhora formação seminarística nian iha Timor. Dom Virgílio iha nia liafuan introdutória fo enfaze kona ba atu cria mecanismo ida nebé diak, halo comunicação, linha de coordenação no iha continuidade de acompanhamento husi Seminário Menor ba to’o iha Seminário Maior. Sua Eminencia halo referência ba documento sira Igreja nian nebé koalia kona ba formação seminarista nian (Pastores Dabo vobis no Optatam Totius).
Wainhira Sua Eminencia hato’o tiha liafaun ruma, hafoin fó oportunidade ba uluk reitores no administradores husi Seminário sira atu ko’alia liafuan ruma iha relação ho sira mia knar iha Seminário sira, no apresenta problemas no desafios sira nebé sira hasoru iha Seminário nudar responsável cada Seminário. Reitor no Administrador sira ko’alia hotu tiha, Sua Eminencia fó mos tempo ba membro equipa formadora ida-idak nebé marca presença iha encontro ne’e atu hato’o mos liafuan ruma kona ba saida mak sira haré, no fó mos contribuição ideia ruma atu bele hadia sistema de acompanhamento iha Seminário.
Antes termina encontro ne’e, Sua Eminencia mos rona sugestão no recomendação lubuk ida husi participante sira nebé tuir encontro. Sugestão ida nebé sei tau mos iha consideração iha encontro ordinário Bispo sira nian mak atu hari comissão nacional do Seminário iha nível CET nian atu bele coordena diak liu tan programa no encontro sira entre Bispo nebé tutela ba formação ho equipa formadora husi Seminário sira hotu.
Participante sira iha encontro ne’e, mak hanesan:
Pe. Miguel Arcanjo: Administrador do Seminário Maior Interdiocesano, Fatumeta
Pe. Pedro Noronha: Administrador do Seminário Propedêutico
Pe. Natalino da Costa: Reitor do Seminário Menor Balide
Pe. David Alves: Reitor do Seminário Menor de Maliana
Pe. Adriano Ximenes: Padre Espiritual do Seminário Propedêutico
Pe. Henrique de Deus: Padre Espiritual do Seminário Menor
Pe. Armindo Brito: Padre Espiritual do Seminário Maior
Pe. Augusto de Sá: Membro da equipa formadora do Seminário Maior
Pe. Francisco da Costa: Membro da equipa formadora do Seminário Maior
Pe. Waldimiro Afonso Viana: Membro da equipa formadora do Seminário Maior
Pe. Joao Guterres: membro da equipa formadora do Seminário Maior
Pe. Adérito Sequeira: Membro da Equipa formadora Seminário Menor
Pe. Tadeu da Silva: Membro da Equipa formadora Seminário Menor
Dc. Alberico da Costa: Membro da equipa formadora do Seminário Propedêutico
Fr. Bonaventura Magno: Ecónomo do Seminário Maior.
Fr. Joanico Adelaide: Membro da equipa formadora do Seminário Menor
(Report: Media CET)
