CET (09.09.2026) – Igreja Católica iha Timor-Leste hamutuk ho governo Timor-Leste inaugura monumento ida dedicado ba memória prelado saudoso sira, nudar sinal respeito, gratidão no memória ba sira-nia serviço ba Igreja no povo Timor-Leste, liu-liu durante período difícil iha história Timor-Leste nian.
Iha cerimónia inaguração ne’e, Presidente Conferência Episcopal Timorense (CET), Sua Eminência Dom Virgílio Cardeal do Carmo da Silva, SDB, hato’o agradecimento boot ba IX Governo Constitucional, liu-liu ba Primeiro-Ministro Kay Rala Xanana Gusmão, ba iniciativa no apoio sira iha construção monumento ne’e.
Iha fatin hanesan, Dom Virgílio Cardeal esclaresse katak, monumento ne’e laós de’it estrutura Arquitetónica, maibé sai fatin atu povo, fiéis no visitante sira bele hanoin no comprende contribuição boot husi prelado sira no ema consagrado sira ba Igreja no sociedade Timor-Leste.
Monumento ne’e integra símbolo importante sira, inclui Cruz, mitra Episcopal no imagem/foto husi prelado saudoso sira, nebé representa sira-nia vocação episcopal, serviço pastoral no testemunho moris ba povo. Monumento ne’e mos integra elemento sira nebé recorda sira-nia legado pastoral, educativo, caritativo no contribuição ba vida social no política iha período importante sira iha história Timor-Leste.
Cardeal Virgílio mos hato’o apreciação ba autoridade governamental no equipamento técnico sira nebé envolve diretamente iha projeto no construção monumento. Nia destaca katak maioria trabalhador no técnico sira mak Timoroan, nebé serviço durante fulan hirak iha condição difícil atu garante katak obra bele remata ho diak.
Lider Igreja ne’e mos agradece ba empresa construtora no trabalhador sira, inclui equipa técnica nebé, hamutuk ho autoridade Igreja no Governo, hala’o processo dezenho no construção to’o monumento ne’e pronto atu inaugura.