Iha loron 29 Maio 2025, Secretariado CET realiza encontro avaliação ba execução osan subvenção pública 2024 nian.
Secretário Executivo da CET, Pe. Carlos M.P.Roben hamutuk ho Comissão Especializado-CTS hala’o primeiro encontro hamutuk ho Ecónomo no staff Comissão Técnico Diocesano (CD) housi Arquidiocese Dili, Diocese Baucau no Diocese Maliana. Iha encontro ne’e koalia kona-ba avaliação atividades no execução orçamento tinan 2024.
Iha parte loraik hosi encontro avaliação nian, convida mos housi Sr. Joaquim da Costa Freitas, Coordenador Gabinete Apoio Sociedade Civil no Equipa Técnico GASC nian hodi rona mos avaliação balun nebe GASC halo ona kona ba execução osan subvenção nian hosi CET no Diocese tolu.
Discurso de abertura hosi Secretario Executivo CET, Pe. Carlos M. P. Roben:
Bom dia ba ita boot sira hotu.
Bemvindo ba Economo sira hosi Diocese Tolu (Pe. Jose Mariano, Pe. Hipolito no Pe. Mouzinho) hamutuk ho ita boot sira nia staff CTD sira nebe marca mos presença iha ne’e.
Objetivo hosi encontro ida ne’e atu partilha informação ruma kona ba sistema de execução osan subvenção publica nian nebe governo aloca ona mai CET no ba Diocese sira. Iha tinan 2024, CET simu osan subvenção hosi governo liu hosi GASC ho montante: $ 15.000.000,00, no osan nee distribui ba CET Secretariado no Diocese tolu hodi implementa programa no atividade baseia ba plano acao anual 2024 nian nebe submete ona ba GASC molok termina ano fiscal 2023 nian. Iha atividade no programa lubuk ida iha CET no Diocese sira mak consegue realiza ho osan subvenção ne’e. Em geral execução osan subvenção iha tinan 2024 lao ho diak no ida ne’e comprova ho submissão relatório nebe CET Secretariado lori ba entrega iha Coordenador GASC, Sr. Joaquim Freitas. Atividade ida nebe hetan apoio makaas hosi osan subvenção nian ba tinan 2024 mak preparacao ba visita Santo Padre Papa Francisco nian nebe em geral lao diak tebes.
Maibe, reconhece katak precisa duni hadia no uniformiza sistema de execução no preparação relatorio ba iha CET Secretariado no mos ba iha Diocese sira mak ita mai tur hamutuk hodi bele partilha informacao no hatudu mos modelo ka draft relatório nian nebe bele adapta hodi prepara relatorio tuir ida nebe distribui mai hosi GASC.
Iha CET ita iha pessoa tecnico sira nebe hola parte iha equipa CE-CTS nian mak hanesan: Sr. Zeca Mestre, Sr. João Câncio no Sra. Jejuinha, Sr. Adolfo no iha mos ami Amululik balun nebe apoio mos iha equipa ida ne’e, depois de ami halo tiha verificacao ba relatorio narrativo no financeiro sira nebe hatama mai iha CTS atu verifica, no descobre katak precisa duni atu tur hamutuk hodi apresenta avaliacao ruma ba ita boot sira ida nebe diak sei hetan apreciacao no ida nebe seiduak diak ita sei hadia hamutuk ho tulun CTS nian. Ida ne’e mos mak sai responsabilidade no competencia CTS no CE-CTS nian tuir estatuto CTS nian hakerek ona.
Ita sira be ohin iha ne’e nudar pessoa tecnico sira nebe haknaar an iha CET (CTS) no Diocese sira (ECÓNOMO NO CTD) hodi tulun Amo Bispo sira, ho nune’e ita precisa atu tulun malu no fo hanoin ba malu no rona malu moris iha espirito de dialogo no sinodalidade nian ka lao hamutuk nian, hodi nune’e servico nebe ita halao bele lao ho diak no nakonu ho responsabilidade.
Agradece antecipadamente ba ita boot sira hotu nia presenca iha encontro ida ne’e.
Encontro ne’e hala’o iha sala reunião da CET, Bidau Mota-Klaran. Díli