CET, 10.09.2026: Sua Eminência Dom Virgílio Cardeal do Carmo da Silva afirma liafuan hirak ne’e iha ninia reflexão iha missa solene ação de graças ba doben Maktoban Prelado sira nia restos mortais, Dom Jaime Garcia Goulart, Dom José Joaquim Ribeiro, Mons. Martinho da Costa Lopes no Dom Alberto Ricardo da Silva iha Esplanada Tas-Tolu Dili.
Dom Virgílio hateten, Sarani doben sira, ho consciência “moris atu rai hela liman rohan espiritual nian” mak ita hasa’e missa solene ação de graças ida ne’e ba ita nia doben Maktoban Prelado sira nia restos mortais. Dom Jaime, Dom José, Mons. Martinho no Dom Alberto, wainhira sira sei moris, sira mos reconhece sira nia fragilidade, finitude no mortalidade. Sira hatene katak sira sei la moris ba nafatin, ho nune’e mak sira fo hotu sira nia forca, energia, matenek no moris ba missão Kreda nian. Ohin loron sira laiha tan ona, maibe sira husik hela mai ita, sira nia legado pastoral, social, educação no caridade nian, tenik Dom Virgílio Cardeal.
Dom Virgílio Cardeal aprofunda tan katak, Bibi atan sira ne’e, molok sira mate, sira mos temi iha sira nia fuan, liafuan São Paulo nian nebe ohin ita rona ona, dehan: “… tempo to’o ona atu ha’u husik rai ne’e. Ha’u halo tiha funu didi’ak to’o rohan; ha’u la’o maka’as to’o ona rohan, ha’u laran metin iha fiar.”
“Prelado sira nia missão la’os fácil, sira hakat liu dalan terus sira nebe nakonu ho incompreensão, ameaça, solidão no dificuldade oi-oin. Mesmo nune’e sira la tauk, la rende ba missão nobre nebe sira hala’o. Sira conserva ona sira nia fiar, sira hamrik metin la nakdoko, la hakfodak ho ameaça sira. Sira nia luta hamutuk ho povo ida ne’e, luta ida nebe soi duni ba Maromak nia matan, luta ba liberdade, ba autodeterminação, ba justiça no ba moris diak ema Timor nian. Sira hatudu katak iha tempo susar Igreja hamutuk ho povo, no Igreja continua hamutuk iha tempo ksolok ukun an nian, hodi luta ba desenvolvimento no moris diak ema barak nian”.
Dom Virgílio Cardeal haktuir mos katak, ohin ita sei translada prelado sira nia restos mortais hosi Tasi Tolu ba iha Catedral Imaculada Conceição Dili. Prelado nain tolu: Dom Jaime, Dom José no
Mons. Martinho, nebe mate no hakoi iha Portugal, oras ne’e, sira nia ruin no ahukdesan fila-fali mai Timor, tan Inan rai Timor hakarak sira fila mai iha nia hakuak. Sira mai hamutuk Dom Alberto nebe antes hakoi iha Cimiterio dos Padres Maloa, ohin ita sei lori sira nain haat ba hakoi hamutuk iha Catedral Dili nian, fatin nebe destinado atu hakoi Bispo ka Prelado sira nebe serbi ona Diocese ida ne’e. Sira nia sei sai fatin peregrinação ba sarani timor oan hotu.
Dom Virgílio Cardeal mos fo hanoin ba sarani sira katak, Wainhira ita visita sira nia rate, ita sei hanoin nafatin katak Timor hari iha sacrifício, fiar, esperança no perdão. Sira nia legado oras ne’e entrega iha ita nia liman. Ita idaidak, Bispo sira, Nailulik sira, governante sira no sarani tomak mak sei continua sira nia legado nebe sira husik hela. Ita hotu lori missão nobre atu construi sociedade ida nebe justa, fraterna no reconciliada.
Lia menon ikus husi Dom Virgílio Cardeal ba Doben Maktoban Prelado sira katak, oras ne’e imi descansa ona iha dame Nai nian, iha hakuak Inan rai Timor nian. Ami entrega imi ba Inan Imaculada Conceição, Padroeira Timor nian. Iha Lalehan harohan nafatin mai hotu.