REFLEXÃO DOMINICAL
DOMINGO XIII TEMPO BAIBAIN
TINAN B
30 de Junho de 2024
I Leitura : Sab 1,13-15; 2,23-24
Salmo: 29 (30)
II Leitura: 2Cor 8,7.9.13-15
Evangelho: Mc 5,21-43
Iha ita nia moris, dala barak ita koko momento sira nebe todan liu nebe halo ita husu: moris nee iha nia sentido ka lae? Se Maromak mak Criador ba universo no ita ema, Maromak nee Aman domin na’in, tansa mak terus no mate tama iha mundo no ita ema hanesan laiha kbiit atu manán terus no mate?
Liturgia domingo ohin convida ita atu reflete kona ba temática: moris no mate iha perspectiva sabedoria bíblica nebe apresenta Maromak nudar Maromak nebe hadomi moris no nia criatura sira – “Deus da vida” (Nm 27,16).
Reflexão husi leitura dahuluk nian mosu iha contexto discussão ema “sábio Israelita” nian ho nia conterránio judeus diáspora sira iha rai Alexandria, Egipto nian kona ba destino ema loos (justo) no ema laran-aat (ímpio) sira. Livro Sabedoria nebe provável tebes hakerek iha primeira metade século I a.C. nian, mai husi autor judeu piedoso ida nebe, bolu nia conterránio diáspora sira nebe contaminado ona ho cultura helénica eh correntes filosóficas gregas, atu fila fali ba “sabedoria Israel” no “fiar tradicional Israel” nian nebe autor considera superior liu cultura grega nian. Iha leitura dahuluk ita rona posição no reflexão ema sábio Israelita nian kona ba Maromak nebe hadomi moris no nia criatura sira, enquanto nia conterrâneo sira haré moris nee hanesan “realidade ida passageira” no Maromak hanesan autor ba mate no sofrimento: “Sira dehan, iha imi nia hanoin nebe falso, ita nia moris nee badak hela, kona ba mate, ai-moruk laiha; la rona lia haklaken ruma husi ema nebe ida fila fali husi região ema mate sira nian” (Sab 2,1). Nune’e, raciocínio ema laran-aat (ímpio) nian mak nee: “Mai ita aproveita buat diak sira nebe iha! Mai ita goza kedas buat sira be iha wainhira ita sei foinsa’e” (Sab 2,6) tanba loron ida itasei mate no buat hotu,remata ona. Iha realidade ne’e, ema neon na’in eh sábio Israelita nee hatudu posição nebe la hanesan no hanorin ita katak, Maromak cria eh halo ita atu la’o ba “moris rohan-laek”. Loos duni katak criatura hotu tengki liu husi realidade “mate biológica”, maibé mate biológica la taka netik dalan ba fiar na’in sira atu hakat liu ba moris ida be la nahas (vida eterna). Reflexão, “ema neon na’in” Israelita nee hetan nia fundamento iha livro Génesis 1-3, nebe haktuir katak, Maromak halo buat hotu mesak “di’ak”, Maromak halo ita ema tuir Nia “ilas no tanesan” (para a eternidade – Sab 2,23); nune’e, buat aat, terus no mate tama iha mundo hodi estraga no harahun ema nia moris tanba diabo nia babeur no ema hakarak colabora ho diabo (Sab 2,24). Ho ida ne’e, “ema neon-na’in” Israel nian hanorin katak, sentido mate lolós mak wainhira ita ema lakon nia natureza nudar “ilas no tanesan” Maromak nian hodi “monu ba diabo nia babeur no sai diabo nia atan” iha sala oi-oin moris nian (egoísmo, autossuficiência, violência, crime, injustiça, corrupção, adultério, loko-an, materialista, etc.). Terus no mate lolós nia hún mak hahalok diabo nian. Nee katak, se mak hili dalan aat nian, nia duni mak ema nebe hakribi no la simu moris. Ho liafuan seluk, atu hetan moris nebe lolós, ita ema tengki hadók-an husi sala, katak labele monu ba diabo nia babeur hodi sai diabo nia atan; leitura dahuluk convida ita atu halo pergunta ida ba ita nia an nudar ema sarani: “se ita moris nuudar ema loos tuir ‘ilas no tanesan’ Maromak nian eh ita ‘monu ba diabo nia babeur hodi sai diabo nia atan’?
Tuir mai, iha roman Evangelho nian, São Mateus apresenta Jesus nudar “Senhor e doador da vida”, katak Ida nebe Na’in no garante moris lolós ba ita ema, maske ema ida tama no mout iha condição lakon daudaun esperança kona ba moris nee rasik. Ho roman Evangelho nian, ita reflete katak, missão principal Jesus Cristo nian mak atu restaura eh hatúr no haraik fali moris lolós ba hirak nebe lakon esperança iha moris no lakon perspectiva kona ba Maromak nudar Maromak nebe hadomi moris. Ita rona no reflete claro tebes iha Evangelho domingo nee nian, sinal no gesto concreto Jesus nian nebe hatudu katak Maromak hadomi moris. Jesus nia hahalok hodi tulun no fo moris fali ba feto ida nebe moras hemorragia tinan naruk no Jairo nia oan nebe iha mate laran, hatudu oinsa Jesus hakarak tebes duni hatudu Maromak nia domin no atenção ba ita ema nia moris. Maibe, atu ita ema bele hetan fali moris no sentido lolós moris nian, ita tengki brani buka no fiar iha Jesus Cristo nudar “dalan, lialós no moris” (cf. Jo 14,6).