BAUCAU, 21 de Julho de 2023 (Média CET) – Sexta-feira ne’e, Dom Leandro Maria Alves ordenado no simu posse nudár Bispo foun Diocese Baucau nian, nebé iha 26 de Abril de 2023 Papa Francisco anuncia oficialmente husi carta pontífice iha Vaticano-Roma, hodi troca Bispo primeiro Diocese Baucau nian, maktoban Dom Basílio do Nascimento nebé iha 30 de Outubro de 2021 fila ona ba Maromak Nia kadunan Santo hodi husik hela sarani Diocese Baucau no Igreja Timor tamba sofre moras cardíaco.
Cerimónia Ordenação Episcopal ba Dom Leandro Maria Alves nebe ho lema “Nia la’o lemorai hodi halo di’ak” (Act. 10. 38), realiza iha Catedral Baucau no ordena husi Dom Virgílio Cardeal do Carmo da Silva,SDB nebé acompanha mos husi Dom Norberto do Amaral (Bispo de Maliana), Dom Dominikus Saku (Bispo Atambua), Dom Charles Gauci no Dom Daniel Eugene Hurley (Bispos de Darwin, Austrália).
Bispo atual Diocese Baucau agradece ba Maromak liu husi confiança no graça nebé nia simu, nune’e nia pronto atu serví Maromak no sarani liu husi missão sagrada ne’e.
“Hau nia ksolok no gratidão ba maluk sira nebé ohin halibur iha catedral Baucau ne’e, ita boot sira hotu nia presença halo hau sente katak hodi Maromak Nia naran ita boot sira simu hau iha diocese ida ne’e, hau mos sente ida deit ona no hamutuk tebes ho ita boot sira hotu iha Diocese Baucau”, hateten Dom Leandro Maria Alves, durante iha ninia discursso iha missa ba Ordenação Episcopal ne’e.
Dom Leandro husu nafatin sarani sira nia harohan da’et atu ho Na’i Nia tulun nia bele esforsu aan nafatin hodi hala’o kna’ar nudár bibi-atan ida nebé laran di’ak, fó aan tomak, hasa’e aan nafatin ba Maromak ba clero sira, religioso, religiosa sira no mos ba sarani hotu.
“Hau sei haka’as aan atu halo duni ida ne’e ho Maromak Nia tulun no ho imi nia harohan da’et, buat nebé imi hein husi Bispo ida, mak ida nebé saran nia aan tomak ba Maromak Nia bibi sira katak labele ses aan atu fó nia vida ba Nia bibi sira nebé Maromak tau ona ba nia liman”, acressenta nia.
Participa iha misa Ordenação Episcopal no toma posse Bispo Diocese Baucau ne’e mak hanesan líder órgão soberania haat, membro governo, eis Primeiro Ministro VIII Governo Constitucional, autoridade municipal haat inclui sarani Diocese Baucau, Maliana no Dili.
CURRICULUM VITAE
Padre Leandro Maria Alves
Padre Leandro Maria Alves, moris iha Ermera iha loron 10 fulan Maio tinan 1974. Nu’udar oan hosi: senhora Maria Santina da Costa Tilman no senhor Graciano Alves. Padre Leandro Maria Alves nu’udar oan ba datolu hosi maun-alin hamutuk 14:
- Maria Alves (matebian)
- Pedro Alves (matebian)
- Padre Leandro Maria Alves
- Cidália Tilman Alves (kaben-na’in)
- Graciana Tilman Alves (kaben-na’in)
- Valentino Tilman Alves
- Bebé Alves (matebian)
- Noé Graciano Tilman Alves
- João Alves (matebian)
- Francisca Alves (matebian)
- Flora Santina Tilman Alves (kaben-na’in)
- Gregório Tilman Alves
- Mariana Beatriz Tilman Alves (kaben-na’in)
- Joana Paula Tilman Alves (kaben-na’in)
PERCURSO DE ESTUDOS
Iha tinan 1981-1987: Padre Leandro Maria Alves hahú nia estudo iha Sekolah Dasar Negeri 2 Gleno – Ermera.
Iha tinan 1987-1990: continua nia estudo iha SMPK Imaculada Conceição, Ermera. Iha tinan nebá duni Padre Leandro Maria Alves hakarak hodi continua nia estudo iha Seminário, mehi ida ne’e concretiza duni.
Nune’e iha tinan 1990-1993: hahú tama iha Seminário Menor de Nossa Senhora do Rosário de Fátima (SENOFA), Lahane, no continua nia estudo iha SMAK St. Yosep Dili.
Iha tinan 1993-1994: Padre Leandro Maria Alves continua nia formação iha Seminário de Ano Propedêutico, Lahane.
Iha tinan 1994-1995: continua nia formação iha Seminário de Ano Espiritualidade de São João Maria Vianney – Dare.
Iha tinan 1995-1998: Padre Leandro Maria Alves continua nia estudo iha Universitas Katolik Widya Mandira – Kupang, iha Faculdade Filosofia no Teologia nian.
Iha tinan 1999-2001: hala’o nia Ano pastoral iha Seminário Menor de Nossa Senhora do Rosário de Fátima (SENOFA), Balide.
Iha tinan 2001-2004: Padre Leandro Maria Alves hala’o nia Estudo de Teologia iha Instituto Superior de São Tomás de Aquino Évora iha Faculdade de Teologia da Universidade Católica Portuguesa.
Iha tinan 2014-2017: continua nia estudo Licenza Teologia Dogmática nian iha Universidade Pontifício Urbaniana, Roma.
ORDEM SAGRADA
Iha tinan 2005: Padre Leandro Maria Alves simu Ordenação Diaconal iha Sé Catedral Díli, hosi Dom Alberto Ricardo da Silva
Iha loron 8 fulan Dezembro tinan 2006: simu Ordenação Sacerdotal iha Sé Catedral Díli, hosi Dom Alberto Ricardo da Silva.
SERVIÇOS
Iha tinan 2004-2005: Padre Leandro Maria Alves hala’o nia Ano Pastoral iha Paróquia de Nossa Senhora do Rosário de Fátima, Turiscai.
Iha tinan 2006-2007: hakna’ar-an nudar Vigário Paroquial iha Sé Catedral de Díli.
Iha tinan 2008-2011: Padre Leandro Maria Alves hakna’ar-an nu’udar Prefeito disciplina nian iha Seminário Maior de São Pedro e São Paulo, Fatumeta.
Iha tinan 2009-2014: nomeado nu’udar Diretor iha Fundação São Paulo Diocese Díli nian.
Iha tinan 2009-2014: Padre Leandro Maria Alves hakna’ar-an nu’udar Diretor Executivo ba Comissão Nacional da Educação Católica de Timor Leste (CONECTIL).
Iha tinan 2010-2012: nomeado nu’udar Secretário do Conselho Presbiteral da Diocese de Dili.
Iha tinan 2011-2014: Padre Leandro Maria Alves nomeado ba Reitor do Seminário Menor de Nossa Senhora do Rosário de Fátima (SENOFA), Balide.
Iha tinan 2011-2014: hakna’ar-an nu’udar Diretor da Escola Secundária Católica de Nossa Senhora do Rosário de Fátima, Balide.
Iha tinan 2017-2018: Padre Leandro Maria Alves hakna’ar-an nu’udar Vigário paroquial iha Sé Catedral de Dili.
Iha tinan 2018-2023: hakna’ar-an nu’udar Secretário Executivo da Conferência Episcopal Timorense (CET). No nu’udar Docente iha Instituto Superior de Filosofia e de Teologia D. Jaime Garcia Goulart, Fatumeta.
Iha tinan 2023: Padre Leandro Maria Alves simu provisão nu’udar Pároco iha Paróquia Maria Imaculada da Conceição, Catedral, Díli to’o ohin loron.
Iha loron 26 fulan Abril tinan 2023, Santo Padre Papa Francisco nomeia Padre Leandro Maria Alves nu’udar Bispo eleito ba Diocese de Baucau.