Coronavirus nudár moras foun ida nebé perigo ba vida da’et ba mundo tomak (Epidemia Mundial) no sasán lubuk ida mak halo ona prevenção ba moras ida nebé passa liu husi contacto isin nian, biar iha Timor-Leste ita seidauk hetan caso confirmado, ne’eduni husu ba povo tomak atu calma nafatin, maibé di’ak liu ita halo prevenção atu evita moras ida ne’e bele kona ita. Tan ida ne’e, Igreja Timor hamutuk ho Amu Papa nebé halo mos nia prevenção ba moras ne’e, convida ita atu halo tuir recomendação Organizacão Saúde Mundial no pessoal saúde ita nian, atu;
- Fase liman bei-beik
- Quidado fatin halo moos
- Fani no Me’ar tem que taka ibun
- Evita atu contacto ho ema seluk
- Evita atu labele contacto ho animal fuik
- Membro família sira nebé foin fila husi rai li’ur mai, evita atu halo kedan contacto físico (kaer liman, rei-malu no hakuak-malu).
Tamba uma Kreda iha nia celebração sira halibur ema barak no Kreda sai fatin nebé ema barak bá.
Bainhira, moras ida ne’e seidauk hada’et, kreda Timor aconcelha ho prevenção balun durante ita nia celebração sira.
- Liman labele kona água benta, fatin nebé iha uma Kreda nia odamatan
- Evita re’i estátua sira nebé iha uma Kreda laran
- Labele kaer liman wainhira fó paz ba malu
- Simu deit comunhão ho liman
- Evita hola bênção; re’i liman
- Igreja fó concelho ba ema sira nebé mak moras, isin fraco, atu lalika mai missa, reza iha uma deit.
Biar Mundo tomak no ita mos liu hela prova ida ne’e, ita hatene katak Na’i Maromak sei la taka-matan no tilun ba ita nia harohan.
Ne’eduni husu atu ita hotu reza, hanesan salmista dehan: “Rahun di’ak ba sira nebé tau fiar iha Maromak” (Sal. 4,5).
Dili, 13 de Março de 2020
Assinatura Oficial
- Dom Basílio do Nascimento Bispo de Baucau e Secretário Geral da CET
- Dom Virgílio do Carmo da Silva Arcebispo de Dili e Pro-Presidente da CET
- Dom Norberto do Amaral Bispo de Maliana- Presidente da CET