(Média CET) – Ba imi jovem peregrino sira, sai foin sa’e nebé buras tenki hateke ba cruz nudár buat nebé kmanek liu, tamba iha cuz mak imi haré hetan vitória, salvação no moris, kaer didi’ak imi nia fiar ida ne’e. Hateke ba cruz hodi moris tuir, hateke ba cruz ho esperança ba ida nebé sempre hamutuk ho imi iha terus, problema no dificuldade nia laran.
Dom Norberto do Amaral hateten lia hirak ne’e, durante iha nia discursso iha missa enceramento ba Jornada Nacional Juventude (Cruz Jovem), iha Paróquia Nossa Senhora do Carmo Letefoho, Quarta-Feira (13/09) ne’e.
Presidente da Conferência Episcopal Timorense (CET) e Bispo de Maliana, encoraja tan foin-sa’e sira katak, moris iha mundo ohin loron sempre hasoru problema oioin no atu ultrapassa problema sira ne’e ema ida-idak precisa hateke nafatin ba cruz, hateke ba vitória, salvação no moris ita ema nian, tamba Jesus hasa’e Nia aan ba mate tan Nia domin ba ema hodi dada ema hosi mate ba moris, hosi sala ba perdão, hodi halibur ema hamutuk iha uma-kain ida deit uma kreda Católica.
Dom Norberto hatutan, “Jovem feto balu nebé putus cinta karik, mane sira keta sakit hati hela karik, labele hateke ba aan deit maibé foti imi nia oin ne’e hodi haré no koalia ka curhat imi nia problema sira ne’e ho Cristo iha Cruz.”
Iha oportunidade hanesan, presidente CET ne’e hato’o mos ninia agradecimento ba Pároco Letefoho, Padre Élio Fernandes ho comissão Organizadora, arte-marciais no grupo categoriais hotu paróquia Letefoho nian nebé serviço hamutuk ona hodi lori Cruz Jovem ba vizita bairo sira durante tinan ida nia laran to’o ohin loron.
“Ba imi hotu nia contribuição, prontidão no laran-luak; hau hato’o agradece no obrigado barak tebes,” dehan Dom Norberto, hafoin entrega Cruz Jovem oficialmente husi Paróquia Letefoho ba Paróquia Laleia .
Tuir programa, Cruz Joven sei hala’o vizita durante tinan ida, hahú 13 de Setembro 2023 to’o Setembro tinan oin iha Paróquia Laleia (Diocese Baucau) no Setembro 2024 -2025 sei ba vizita fali iha área Diocese Maliana nian mak iha Paróquia Bobonaro.