Sua Eminência Dom Virgílio Cardeal do Carmo da Silva, SDB
(Arcebispo da Arquidiocese Metropolitana de Díli e Pro-Presidente da CET)
Discurso hato’o iha Dom Leandro Maria Alves nia primeira missa nudar Bispo Diocese Baucau nian.
Domingo, 23 de Julho de 2023
Saudações:
Excelentíssimo e Reverendíssimo Dom Leandro Maria Alves, Bispo da Diocese de Baucau
Reverendos Padres e reverendas Madres, Religiosos e Religiosas
Ilustres autoridades nacionais e locais
Distintos convidados
Caríssimos fiéis leigos e leigas.
“Ohin mak momento graça nian, ohin mak loron salvação nian!” (2Cor 6,2)
Uluk knanain ha’u hakarak hato’o parabéns ba Dom Leandro Maria Alves ba graça Ordenação Episcopal nebe ita boot simu, halo ita bo’ot soin duni ba knar santo Episcopado nian, hodi sai Bispo daruak Diocese Baucau nian. Ita boot nia ordenação sai duni momento graça no ksolok ba Kreda Timor particularmente ba Diocese Baucau nebe durante tempo naruk, hein hela Bispo foun ida atu tau matan ba Igreja particular ida ne’e. Wainhira maktoban Dom Basílio do Nacimento, Bispo dahuluk Diocese Baucau nian fila hikas ba Aman Maromak nia kadunan, Diocese Baucau nia oan sira husu no harohan ba Maromak, hein ho paciência no firmeza atu Maromak haraik ba sira Bispo ida no aman ida ba família boot Diocese ida ne’e. Maromak rona sira nia harohan hodi hatan liu husi Santo Padre Francisco nebe nomeia Dom Leandro Maria Alves nudar Bispo foun Diocese Baucau nian. Parabens ba Dom Leandro no Parabens ba Diocese Baucau oan hotu.
Caríssimo Dom Leandro Maria Alves. Ita boot nia processo tomak hahu husi eleição ba nomeação mai to’o iha Ordenação Episcopal, hola parte iha momento histórico ida iha Igreja Universal nia moris. Igreja hotu iha mundo rai klaran experimenta hela daudaun espírito moris sinodalidade nian. Sínodo Bispo sira nian mak momento kmanek ida Igreja Universal no local sira ho roman Espírito Santo nian, la’o hamutuk iha dalan nebe hanesan hodi hateke ba direção ida de’it iha missão Kreda nian. No wainhira ita liga espírito sínodo nian ho espírito lema episcopal nebe Dom Leandro hili ona: pertransivit benefaciendo (la’o lemorai hodi halo diak), lori ita hare hetan ponto do encontro ida nebe bele sai itinerário programático ba atividade pastoral no governação eclesial iha Dom Leandro nia knar nudar Bispo Diocese Baucau nian. Ita liga espírito rua ne’e sai ida deit katak Igreja la’o hamutuk iha dalan nebe hanesan no la’o hamutuk atu halo diak. Itinerário ne’e sei hatudu duni fisionomia lolos husi Igreja ida nebe hatene la’o hamutuk entre Bispo ho nia presbítero sira, hamutuk ho colaboração husi agente pastoral sira no sarani hotu, hotu-hotu la’o hamutuk hodi halo diak ba Kreda nia moris no nia santidade.
Itinerário no dalan ida ne’e Aman Maromak percorre ona iha história salvação nian, hafoin ho mistério incarnação Jesus Cristo rasik mai moris no la’o ho ita iha dalan ema nian, no liu tiha experiência pascoa nian, Jesus haruka nia escolante sira atu banati tuir modelo moris mestre nian no haruka sira atu la’o iha dalan discipulado nian hodi transmite ba Igreja paradigma missão nian katak la’o hamutuk nudar Kreda ida hodi halo diak wain ba humanidade. Ho nune’e, mensagem balun nebe ha’u sei partilha ba Dom Leandro iha nia ministério episcopal mak ne’e:
- La’o hamutuk ho Jesus Cristo.
Jesus Cristo mak sai wé matan husi espiritualidade Bispo nian. Liu husi consagração Bispo ida simu efusão ida nebe especial husi Espírito Santo nebe configura nia an tuir modelo moris Cristo nian, nudar Ulun no Bibi-atan Kreda nian. Ho nune’e, Bispo ida nia modelo inspirador iha knar Episcopado nian mak Jesus Cristo, o Bom e o Supremo Pastor. Iha Bispo nia pessoa, hamutuk ho nia Presbiteros sira, Jesus Cristo hola parte iha sira le’et nudar Pontífice eterno. Tan Cristo mak moris iha ministério Bispo nian, halo nia la kole atu haklaken Evangelho hodi fo ba sarani sira mistério fiar nian. Cristo nia presença iha munus paterno Bispo nian mak halo membro sira sai wa’in liu tan hodi hola parte iha Igreja nudar Cristo nia isin lolon. Ho Cristo nia presença mak hakonu Bispo ida iha nia sabedoria no prudência, hodi conduz ema hotu, iha viagem peregrinação rai ne’e nian, atu ba to’o iha felicidade eterna. Dom Leandro iha ita boot nia knar ida ne’e, la’o hamutuk ho Cristo iha knar pastor nian no iha dalan santidade nian, aprende husi apostolo sira nia zelo pastoral no missionário, hateke ba exemplo moris no fidelidade santo no santa sira nian, de modo especial aprende husi responsabilidade paterno São José nian no sensibilidade materna Na’in Feto nian wainhira tau matan ba Diocese ida ne’e.
- La’o hamutuk ho Kreda Universal no Kreda Local.
Papa Paulo VI iha nia decreto Christus Dominus, nebe ko’alia kona ba Munus Pastoral Bispo sira nian iha Igreja, explica nune’e: “Bispo sira, participa iha solicitude ba Igreja, hala’o sira nia ministério, nebe sira simu liu husi sagração episcopal, iha união ho Sumo Pontífice nia autoridade iha hanorin magistério no governo episcopal nian: Santo Padre no Bispo sira hotu, hamutuk nudar colégio ida no sai isin lolon ida atu serbi Igreja Maromak nian (CD 3). Alem de Bispo husi Igreja particular ida-idak la’o hamutuk ho Santo Padre, nudar ulun Kreda Universal nian, Bispo mos sei la’o hamutuk ho Bispo sira seluk iha território ida hodi forma cooperação episcopal, hatudu liu husi participa iha reunião sira husi Bispo sira nebe hola parte iha província eclesiástica ida, iha região eclesiástica ida, no liu-liu iha conferencia episcopal território ida nian. Cooperação episcopal nia objetivo mak atu Bispo sira moris iha espírito apoio recíproco ka tulun malu iha knar episcopal no atu bele iha harmonização iniciativa pastoral husi Bibi atan ida-idak ba nia Diocese no mos ba comunidade sarani tomak iha território ida, bele nação ka continente ida. Ba Dom Leandro tulun boot ida ba ita boot mak Conferencia Episcopal Timorense nebe sei la’o hamutuk ho ita boot iha knar foun no sagrado ida ne’e.
- La’o hamutuk ho presbítero sira hotu nebe pertence ba Diocese ida ne’e.
Igreja bele moris, cresce no sai buras, wainhira iha duni relação nebe autêntica no sincera entre Bispo ho nia presbítero sira. Iha documento Lumen Gentium ko’alia kona ba relação entre Bispo ho Presbítero sira explica katak: “Enquanto Bispo hala’o nia knar nudar Apostolo sira nebe Cristo haruka atu bali nia bibi sira, Amululik sira fali hamutuk ho sira nia Bispo constitui presbitério ida deit”. Amululik hotu-hotu, diocesano ka religioso nebe hola parte iha Diocese ida, participa no hala’o sira nia knar hamutuk ho Bispo; no sira mak sai colaboradores providentes iha ordem episcopal (CD 28). Ho nune’e, iha união relacional, iha respeito recíproco, iha amor fraterno no iha obediência filial hatudu husi Amululik sira ba sira nia Bispo mak sei fo moris ba dinâmica pastoral no governativa Diocese nian. Atualmente Diocese Baucau iha nia Amululik Diocesano hamutuk 44 no Diácono 2, la sura ho religioso sira nebe hala’o missão iha Diocese ida ne’e. Amo Bispo foun sei colabora ho Amululik sira hotu (Diocesano no Religioso) atu bele hatán ba necessidade pastoral no assistência sacramento ba sarani sira. Unidade, fraternidade no colegialidade tenke sai duni estilo moris Diocese Baucau nian. Alem de Amululik sira nudar colaborador próximo Amo Bispo nian, iha mos religiosa sira, catequista sira, ministro extraordinário sira, leigo comprometido sira, sira sei hola parte ativamente nudar agentes pastorais nebe sei tulun Amo Bispo iha nia serviço pastoral nian.
- La’o hamutuk ho sarani sira.
Iha Bispo ida nia relação ho sarani sira, nia buka atu sai promotor unidade no comunhão iha Igreja particular, tuir sarani ida-idak nia vocação no missão, reconhece sira nia autonomia, rona sira nia lian no avalia ho atenção tomak pedido sira nebe sarani halo ba diak espiritual nebe sira necessita (AS 63). No Bispo ida sei la kolen promove ho meios hotu sarani sira nia moris santo no serviço maka’as atu Maromak nia povo moris no buras iha graça liu husi celebração sacramento sira (AS 34). La’o hamutuk ho sarani sira sei halo Bispo hamoris iha nia án virtude sira hanesan: caridade pastoral, prudência pastoral no discernimento pastoral. Papa Francisco iha nia sorumutu ida ho Congregação para os Bispos nia hateten nune’e: “Episcopado la’os ba Bispo ida nia án, maibe ba Kreda nia moris, ba bibi sira, ba ema seluk, liu-liu ba sira nebe mundo ohin loron despreza no marginaliza”.
No lia menon murak ba Diocese Baucau oan sira hotu, Bispo Diocesano ohin iha ona imi le’et, tamba imi, ba imi no ho imi. Tan ne’e, imi hotu buka ba atu la’o ho nia, hadomi no cuidado nia, colabora no tulun nia iha nia knar tau matan ba Diocese ida ne’e.
Hamutuk ho São José, Aman no Mahein Diocese Baucau nian, liu husi nia harohan da’et sei acompanha Dom Leandro iha nia knar nudar Bispo Diocese Baucau nian, hakonu nia ho fuan aman nian hodi tau matan ba Diocese Baucau, iha território ida nebe nakonu ho fatuk no rai mean maibe nia emar sira mesak fuan osan mean. Ne’e duni, Dom Leandro, la’o ba, hasoru sira, ko’alia ho sira, conhece sira, hadomi sira no halo diak ba sira.
Obrigado wa’in ba imi hotu nia atenção.