Díli, 12 Abril 2024
COMUNICADO OFICIAL
Arcebispo Metropolita de Dili, Pró-Presidente da Conferência Episcopal Timorense no Coordenador Geral husi equipa Igreja nian ba Santo Padre nia Visita mai Timor-Leste, Sua Eminência Dom Virgílio Card. do Carmo da Silva, hamutuk ho Representante Sua Santidade nian iha Timor-Leste, Revmo. Monsenhor Marco Sprizzi, ami nakonu ho fuan ksolok no honra bo’ot hakarak fó sai oficialmente data husi Sua Santidade nia Visita Apostólica mai iha Timor-Leste, nebé Santa Sé hato’o mai ita liu husi Nunciatura Apostólica:
Santo Padre nia Visita Apostólica iha Timor sei hala’o iha loron 9 to’o 11 Setembro 2024.
Papa nia Visita Apostólica ida ne’e sei sai evento histórico ida ba povo Timor, nebé hein kleur ona presença Santo Padre Francisco nian iha rai doben Timor, rai ida nebé nia povo simples sira hatene moris sira nia originalidade fiar nian iha Cristo Jesus. Visita oficial ne’e, planeia antes ona iha tinan 2020, maibe tamba causa husi Pandemia Covid-19 nian, mak visita ne’e la consegue realiza. No ohin, ita hotu nakonu ho sentimento ksolok nian, agradece ba Sua Santidade nia confirmação atu mai Timor. No atu hatudu sinal gratidão no domin ita nian ba Santo Padre mak equipa preparação husi parte Igreja nian serviço maka’as hela, hamutuk ho Nunciatura Apostólica, atu processo preparação tomak hodi simu Sucessor São Pedro no Pastor Universal Kreda nian bele la’o ho diak.
Ita agradece mos ba Estado Timor nian, ba Sr. Presidente da República, ba Sr. Primeiro Ministro, no ba Equipa tomak husi parte Governo nian ba preparação Santo Padre nia visita, liu husi colaboração nebé diak tebes no esforço hotu iha preparação organizativa no logística, atu facilita sarani tomak bele participa no mai hamutuk ho Santo Padre, tan ba sira mak Santo Padre mai, atu hametin liu tan sira nia fiar no domin ba Cristo nia Kreda iha Timor-Leste.
Lori Conferência Episcopal Timorense no Nunciatura Apostólica nia naran, ami hakarak apela ba maun-alin no bin-feton timoroan hotu, atu colabora no serviço hamutuk iha tempo preparação nian ida ne’e. No liu-liu, ita buka atu prepara ita nia an ho oração hodi simu Santo Padre, atu nune’e liu husi Visita ida ne’e sei sai momento ida nebé haburas liu tan ita nia participação ba construção comunidade Kreda no nação nian, hodi hamoris ita nia fiar no purifica ita nia cultura.
Dom Virgílio Cardeal do Carmo da Silva, SDB Monsenhor Marco Sprizzi
Arcebispo Metropolita de Díli Representante do Santo Padre
Pro-Presidente da CET em Timor-Leste
Coordenador Geral da equipa da Igreja
para a Visita do Santo Padre