CET DILI, (12 Agosto 2024): Governo liu hosi Ministro Administração Estatal, atual Coordenador Geral Interino Alto Nível visita Sua Santidade Papa Francisco mai Timor-Leste segunda lorokraik oficialmente entrega hikas Igreja Catedral Villa-Verde Dili ba parte Uma Creda hafoin de rehabilitação durante fulan ne’en nia laran.
Ministro Administração Estatal Sua Exeléncia Tomas do Rosário Cabral hamutuk ho Coordenadór Alto Ní
vel Parte Igreja nian Sua Eminência Dom Virgílio Cardeal do Carmo da Silva, SDB assina termo entrega obra rehabilitação Igreja Catedral no obra rehabilitação Uma Comunidade Alma.
Diretor Executivo AND IP senhor Rui Lourenço fó sai relatório badak kona ba rehabilitação ne’e katak Igreja Katedrál Nossa Senhora Imaculada Conceição Villa-Verde hetan rehabilitação hosi empresa Arquires Unipessoal LDA ho valor orçamento $ 533,000.82. No parte rehabilitação Uma Comunidade ALMA iha Praia dos Coqueiros hosi compania Hoven II Unipessoal LDA ho valor orçamento $285,746.68.
Ministro Administração Estatal atual Coordenador Geral Interino Alto Nível visita Sua Santidade Papa Francisco mai Timor-Leste Tomas do Rosário Cabral en nome governo acentua katak, “ohin ita entrega oficial sasan sira nebé Governo prepara hamutuk ho Igreja Católica atu simu visita Sua Santidade Papa Francisco nian. Pacote ba atividades ida ne’e hetan despacho hosi Primeiro Ministro ho resolução, katak processo ne’e sei remata antes equipa avansado husi Vaticano mai halo fiscalização ikus liu. No depois Amu Papa fila ita sei hato’o relatório geral ba despesas tomak iha Conselho Minsitro no sei publica ba público.
Governante ne’e apela ba parte media social no Sociedade atu contribui ba visita Santo Padre nian iha Timor-Leste;
“Ba média sira no sociedade, ita contribui para visita ne’e bele la’o ho di’ak, ita mesak sarani de’it, 90 ital % Católico, mai hamutuk ho Igreja no Governo fó liman para sucesso ba visita ne’e. Labele dehan katak responsabilidade iha Comissão de’it, maibe Comissão ne’e facilita para ita hotu envolve iha atividades sira ne’e”.
Iha fatin hanesan Arcebispo de Dili Sua Eminência Dom Virgílio Cardeal do Carmo da Silva SDB lori Creda timor no povo sarani nian agradece ba IX Governo Constitucional nebé ho sira nia generosidade, laran luak rehabilita hikas Igreja Inan Timor ninian Catedral nebé ohin ita hare oin seluk tebes.
Bibiatan ne’e esplica tan mos katak, ohin depois de entrega aban dader hafoin de bensa sei halao hikas atividade Espiritual nian hanesan baibain. No Arcebispo nee husu ba amo pároco no sarani sira atu cuida didiak Uma Creda nebe foin rehabilita atu furak nafatin too tempo nebe deit.
Atividade assina termo entrega obra rehabilitação Igreja Catedral no obra rehabilitação Uma Comunidade Alma entrega nee participa direta hosi Parte Igreja nian Arcebispo de Dili Dom Virgílio Cardeal inclui mos nailulik sira, no husi parte governo Ministro Administração Estatal atual Coordenador Alto nível ba visita Santo Padre nian, Sua Excelência Tomas do Rosário Cabral, Diretor Executivo ADN IP Rui Lourenço, Autoridades, inclui mos compania Arquiris ho nia trabalhador sira ho sarani sira.