ENCONTRO ENTRE ARCEBISPO DE ÉVORA HO SECRETÁRIO EXECUTIVO DA CONFERÊNCIA EPISCOPAL TIMORENSE (CET)
Iha loron sexta-feira, 31 fulan Outubro tinan 2025, Dom Francisco José Villas-Boas Senra de Faria Coelho, arcebispo da arquidiocese de Évora, halo encontro ho Pe. Carlos Roben, Secretário Executivo da Coferência Episcopal Timorense, hodi koalia kona bá processo transladação restos mortais Dom José Joaquim Ribeiro, bispo de Timor, iha tinan 1967-1977 nia. Dom Joaquim, moris iha freguesia Degolados, concelho de Campo Maior nian distrito de Portalegre, iha loron 04 fulan Fevereiro tinan 1918 no mate iha loron 27 fulan Julho tinan 2002 iha Évora. Hala’o nia estudo iha Seminário de Évora no simu ordenação iha Capela de Carmelo, iha loron 25 fulan Agusto tinan 1940, husi Dom Manuel Mendes da Conceição Santos.
Bispo de Dili ne’e ninia caixão sei tranlada husi cemitério dos Remédios de Évora hodi bá halót hamutuk iha panteão dos archebispos Évora nian iha Igreja do Epírito Santo. No acto ida ne’e sei realiza ho celebração solene, Eucaristia, iha loron, 17 segunda-feira, fulan Novembro tinan 2025, tuku 18:00 horas Portugal nian. Husi encontro ida ne’e prelado eborense ne’e mos convoca, padres Arquediocese de Évora nian hotu nebé sei participa, padres timoroan hotu, senhora embaixadora, entidades, religiosos/as, seminaristas no timoroan hotu nebé namkari iha Portugal laran, atu mai participa iha serimónia de transladação ne’e, tan Dom José Joaquim Ribeiro ne’e Timor-Lorosa’e nian. Dom José Joaquim Ribeiro nia sucessores iha Diocese de Timor, sira mak hanesan Monsenhor Martinho Lopes, Dom Carlos Filipe Ximenes Belo SDB, Dom Alberto Ricardo da Silva no Dom Virgílio Cardeal do Carmo da Silva SDB. Arcebispo hatutan tan loron ida bispo de Dili hakarak, halo monumento bá bispos de Timor, bele mai lori Dom José nia restos mortais bá Dili, tan nia bispo Timor nian, ita halo levantamento tau iha urna ki’ik ida, bele tula iha avião hodi fila bá, atu nune’e tau iha catedral de Dili hamutuk ho nia sucessores sira seluk, no rai hela ruin pedaço ida iha panteão dos archebispos hanesan recordação.
Bispo Dom José Joaquim Ribeiro nia missão iha diocese de Dili, hanesan bibi-atan hahú iha tinan 1967 iha era colonial nian no acaba ninia missão hodi fila mai Portugal iha tinan 1977. Iha era da invasão, povo Timor terus no mate barak, Dom José Joaquim mós sofre hodi defende povo, to’o nia hetan basa husi militar indonésio, wainhia indonésio tama hodi ocupa Timor, nia la halai, governo geral português nian hatun ona bandeira nacional Portugal no militar indonésio sira haruka atu sunu tiha bandeira, no funcionário ida halo tiha kalu-baka (kohe) simples oan ida, hikar didi’ak tiha bandeira Portugal no tau iha kohe, hodi entrega bá Dom José, no bispo rasik hodi mai Portugal, wainhira nia fila hosi Timor. Ida ne’e mak última bandeira de Portugal iha Dili, no agora rai hanesan memória ho Dom José nia sapato, vestuário sira, iha Santuário Nossa Senhora da Conceição de Vila Viçosa.
Dom Joaquim defende povo Timor atu hetan independência, wainhira indonésio sira dehan FRETILIN ne’e comunista, bibi-atan povo Maromak nian ne’e hatán bá sira: imi dehan FRETIILIN comunista, maibé FRETILIN la oho to’ok padre ida, la oho padre ida nune’e ha’u labele dehan FRETILIN ne’e comunista. Iha ocupação ne’e Dom Joaquim haruka ke’e rai-kuak hodi hakoi mate sira nebé ema oho iha cidade laran, no wainhira ema hatene ona invasão besik ona ema barak halai bá foho, no Dom Joaquim la hatán atu halai, nia hela iha nia residência, nia dada tiha bandeira Vaticano nian, iha Paço Episcopal, no povo nebé halai, balu halai bá subar iha paço Episcopal no jardim, enquanto avião bombarde cidade Dili maibé paço Episcopal sira la book, tan bandeira de Santa Sé nian dada sa’e hela. Nia rasik la’o bá mai hodi tulun ema sira nebé kanek ho timoroan sira seluk, la’o iha cidade laran hodi lori ema sira nebé kanek bá hospital, hodi bá mos duni casa episcopal rasik, no militar indonésio sira hakarak oho nia.
Ho pressão sira ne’e, to’o militar indonésio sira hakarak oho Dom José, tan problema sira nebé nia hasoru iha ocupação, nia sofre maka’as no ikus mai hetan moras. Hahú husi ne’e Papa Paulo VI bolu nia, liu husi núncio apostólico Jakarta, Indonésia nian, hodi bá lalais visita Dom José iha Dili. Núncio to’o iha nia residência apresenta tiha nia-an, katak nia núncio apostólico husi Indonésia no dehan: “ha’u mai iha ne’e, atu Senhor bá Roma hodi koalia ho Papa acerca situação iha Timor ne’e”. Wainhira Dom José Joaquim mai Indonésia, atu sai ona mai Portugal núncio de Jacarta ne’e, acompanha nia to’o tama iha avião laran, to’o avião nia oda-matan taka ona no avião sai ona mai Portugal mak, núncio foin fila bá uma, atu nune’e ema ida keta oho Dom José. Bispo diocese de Dili ne’e bá Roma hodi koalia ho Santo Padre Paulo VI ikus mai Papa haruka Dom José hodi dehan bá nia: “Senhor vai a escolher alguém para governar a Diocese de Dili e vai para Portugal. Porque o senhor como português é uma bandeira que não interessa estar lá agora, é uma figura que não interessa”. Nune’e bispo Dom José Joaquim sai husi Roma mai Portugal hodi hili Monsenhor Martinho Lopez nu’udár nia sucessor, tan Monsenhor uluk hanesan vigário geral, no ikus mai nomeia monsenhor sai administrador apostólica bá diocese de Dili.
Ema nebé hanoin hetan situação sira ne’e hotu mak Dom José nia mãe rasik (analfabeta) tan iha altura nebá nia mãe sei moris. Wainhira nia mãe rona koalia katak Indonésia invade no ocupa ona Timor, nia sai husi uma bá lalais Lisboa iha nunciatura hodi husu núncio, informação kona bá nia oan Dom José nia condição iha Timor. No núncio de Lisboa nian telegrafa bá Roma, no secretário do estado do Vaticano telegrafa fali bá núncio iha Jakarta, no núncio Jakarta nian bá buka kedan nia iha Timor hodi lori nia bá Indonésia, bá hospital hodi halo tratamento bás nia etc molok mai Portugal. Dom José to’o iha Roma, no husi Roma mai iha Lisboa, wainhira to’o iha Lisboa la iha ema ida mak bá hein nia iha aeroporto, ema ida lahetene nem hanoin hetan kona bá nia, nune’e nia apanha taxi ida hodi bá direta nia uma. Nia iha rasik apartamento ki’ik oan ida iha Lisboa nebé nia rasik sosa, wainhira nia to’o iha uma, dere campanha (oda-matan) no nia feton mai hasoru nia, nia husu bá feton kona bá nia mãe. No nia mãe foin mate semana ida bá kotuk. Nia hela iha Lisboa hodi halo tratamento, bá nia saúde to’o di’ak tiha, fila fali bá Timor. Nia dehan bá povo Timor sira hotu katak: “as freiras para ir embora, saírem de lá porque muito complicado podiam ser violadas. E disse aos padres: quem não quiser ser mártir se vai embora!” tamba sei sai todan liu situação iha Timor.
Hili tiha Monsenhor Martinho Lopez no entrega bá diocese Timor no Dom Joaquim fila mai Portugal, bá daruak no moris iha Lisboa iha nia apartamento hanesan mos coadjutor iha paróquia ida, lori Comunhão bá ema moras iha uma no hospital sira. Ikus mai archebispo Évora nian hatene, bá foti nia no lori mai Évora, lori bá casa sacerdotal, arranja enfermeira ida hodi cuida nia, no nia hela iha uma ida ho facilidade completo, trata nia ho digno to’o moris acaba iha mundo ne’e. Iha Évora bispo emérito de Dili ne’e sei hala’o nia vida durante tinan 16 nia laran, hanesan bispo emérito. Iha loron 27 fulan Julho tinan 2002, liu tiha Timor restaura nia independência iha loron 20 fulan Maio 2002 no comunidade internacional reconhece ona Timor hanesan país ida, Dom José Joaquim Ribeiro hakotu nia iis hodi bá hamutuk ho Aman Maromak iha nia kadunan rohan-laek nian. Dom José nia isin mate bá hakoi iha campo simples ida iha cemitério dos Remédios de Évora.
Iha bispo emérito ne’e nia funeral hetan participação husi bispo na’in hat, arcebispo de Évora Dom José Alves mak preside, bispo auxiliar Lisboa nian, bispo da diocese de Beja, no bispo diocese do Algarve. Agora dau-daun bispo de Dili ne’e nia restos mortais sei translada bá iha panteão dos archebispo de Évora sira nian. Dom Francisco archebispo da Arquidiocese de Évora ne’e mos hatutan, karik loron ida bispo sira Timor nian iha hanoin hakarak lori, imi nia bispo nia restos mortais bá Timor, arquidiocese de Évora loke dalan, tan bispo Dom José ne’e Timor nian, maibé foti de’it ruin ki’ik ida, atu rai nafatin hanesan recordação.
Hafoin encontro archebispo de Évora nian ho Padre Carlos Roben nian ne’e termina tiha, secretátio privado do Cardeal Virgílio do Carmo SDB. nian ne’e mos halo mós encontro ho seminarista na’in (6), arquidiocese de Dili nian nebé oras halo fornação iha Seminário Maior Nossa de Purificação, Évora. Seminarista na’in (6) nebé hala’o estudo iha Évora ne’e mak hanesan: Carlos Andrade, chefe bá seminarista timoroan sira, António Nunes no Alexandrino do Rego, hanesan vice no conselheiro. Frater na’in tolu oras ne’e hala’o hela estudo quarto ano de Teologia, iha Instituto de Teologia Évora (ISTE), hela tinan rua termina estudo no prepara bá ordenação diaconal. No seminaristas tolu seluk: Francelino de Jesus Barbosa, Frangelino Manuel de Araújo no José Tozino Florentino Tavares de Araújo nebé foin primeiro ano iha escola hanesan. Iha mos seminarista Diocese de Baucau nian hanesan Alexandre Nilton Soares, António da Costa Oliveira no Edson Fonseca Sarmento, halo hela sira nia estudo propedêutico nian, iha Seminário Episcopal de São José, Faro, Algarve. (Hakerek: Fr. Francelino de Jesus Barbosa).