Oficialmente Papa Leão XIV sei visita Angola iha loron 18 too 21 fulan Abril 2026. Durante Papa nia presença iha Angola, Santo Padre sei visita Capital Luanda, Santuário Nossa Senhora da Conceição da Múxima iha província do Icole no Bengo, no cidade Saurimo, Capital província Luanda Sul nian.
Tuir plano Santo Padre sei too iha Luanda iha loron 18 fulan Abril iha Aeroporto 4 de Fevereiro iha Luanda capital Angola nian. Depois de Nia too, Papa sei hasoru malu no encontro ho autoridade sira, ho Presidente da República João Lorenço no representante husi sociedade civil. No iha parte loraik, Papa Leão XIV sei halao encontro ho Bispo sira iha Nunciatura.
Iha loron 19 fulan Abril, Papa Leão XIV sei celebra missa iha centro Kilamba nian, tuku 9:30. No iha loraik, tuku 16:30 Santo Padre sei preside oração terço nian no hasoru malu ho peregrino sira iha Santuário Múxima nian, hanesan centro peregrinação nebé boot liu iha África Subariana.
Iha loron 20 fulan Abril, Papa sei desloca ba Saurimo, iha nebé nia sei celebra Eucaristia no visita centro ida nebé acumula ema idoso sira. Iha loron nebé hanesan, Papa sei fila fali ba Luanda hodi encontro ho Bispo, padre, religioso no catequista sira iha Paróquia Nossa Senhora de Fátima, tuku 16:30.
Iha loron 21 fulan Abril mak loron ikus ba visita Papa nian iha Angola no taka ho cerimónia despedida nian. No Papa fila fali ba Roma liu husi Aeroporto Internacional 4 de Fevereiro.
Visita ida nee significativa tebes ba nação Angola, liu husi visita ida nee atu reforça tan sira nia fiar, impulsiona evangelização no hametin comunhão entre povo cristão sira. Visitação ida nee mos sai hanesan momento importante tebes ba povo Angolana sira tanba nee hanesan intervalo ba tinan 17, depois de Papa Bento XVI visita sira iha 2009.
Santo Padre sira nebé visita ona Angola mak hanesan, Papa João Paulo II iha 1992, Papa Bento XVI iha 2009 no agora Papa Leão XIV nebé mak atu visita sira iha loron 18-21 fulan Abril tinan 2026.