Peregrinação ba Porta Santa Catedral Dili no Papa Leao XIV nia mensagem ba Loron Mundial ba Ema Kiak sira
Ohin loron 15 fulan Novembro tinan 2025, Conferência Episcopal Timorense (CET) realiza atividade peregrinação ba porta Santa Catedral Dili nian, ho intenção atu manán indulgencia plenária no hodi reza mos ba ema kiak sira, hodi hanoin celebração Mundial ba Ema Kiak sira nebe monu iha loron 16 fulan Novembro 2025. Tinan Santo Jubileu Esperança nian hahu loke hosi Maktoban Papa Francisco iha loron 24 de Dezembro tinan 2024 no sei termina iha loron 6 fulan Janeiro tinan 2026 iha Roma. No atu hamoris virtude esperança nian iha sarani sira liu liu iha sira nebe serviço iha Conferência Episcopal Timorense, mak CET realiza atividade espiritual peregrinação ida ne’e atu bolu hotu-hotu bele lao hamutuk no sai testemunho credível esperança nian. Iha peregrinação ne’e hetan participação máximo hosi Funcionários sira CET nian hamutuk ho Padre no Madre sira nebe hola parte mos iha serviço sira CET nian. Durante peregrinação sarani sira balun mos ho laran kman lao hamutuk iha peregrinação ne’e. Peregrinação hahu hosi Capela Bidau Mota-Klaran no termina iha Catedral Dili. Ema hotu nebe hola parte iha atividade espiritual ne’e lao hamutuk nakonu ho fiar hodi reza no hananu hahi Maromak, no liu-liu reza hamutuk ema kiak sira. CET inspira hosi mensagem sira Papa Leao XIV nian ba Ema kiak sira mak hola iniciativa atu peregrinação esperanca ida ne’e dedica especial hodi reza ba ema kiak sira iha mundo tomak liu liu ba ema kiak sira iha ita mia rain Timor-Leste.
Papa Leão XIV nia mensagem ba Loron Mundial ba ema Kiak sira (16 Novembro 2025)
“Ema kiak sira bele sai testemunho ba esperança ida nebe forte no confiável, tanba sira hatudu iha sira nia moris condição moris nebe mukit, kuran buat oi-oin, frágil no marginalizado. Ema kiak tan laiha kbiit no kuran sasan oi-oin, dala barak sira sofre no sai vitima ba ema kbiit nain no ema riku sira. Ema kiak nia esperança bele hetan deit iha fatin seluk. Wainhira ita reconhece katak Maromak deit mak ita nia esperança ida uluk liu, ita mos bele halo passagem hosi esperança loron balun nian ba esperança ida nebe dura ba nafatin. Iha ita nia hakarak buka Maromak atu sai nudar companheiro viagem nian, rikusoin sira hotu hetan sentido foun, tan ita descobre katak rikusoin lolos mai hosi Maromak deit. Hosi ne’e mak ita bele comprende Jesus nia liafuan nebe dehan ba nia discípulo sira: “Imi keta halibur ba imi an rikusoin sira rai nian, nebé ular no meak sira bele estraga, no na’okten sira tama hodi na’ok. Maibé halibur mak rikusoin lalehan nian, rikusoin nebe ular no meak sira la estraga, no na’okten sira la tama hodi na’ok.” (Mt 6,19-20).”
“Moris kiak ida nebe todan liu mak la hatene Maromak. Ida ne’e mak Papa Francisco hakerek iha Evangelii Gaudium: «discriminação a’at liu nebe ema kiak sira sofre mak falta atenção espiritual. Ema kiak barak iha sira nia an nakloke ba fiar; sira buka dadaun hela Maromak, no ita buka atu lori ba sira Maromak nia amizade, bênção, Maromak nia Liafuan moris, celebração sacramento sira no proposta ba dalan ida atu habo’ot no hametin sira nia fiar» (n. 200). Existe consciência fundamental no totalmente original ida konaba hasoru malu ho Maromak nebe sai nudar rikusoin lolos nian. Sao João Apostolo insiste iha nia carta hodi dehan: «Se ema ruma dehan: “Hau hadomi Maromak” no nia rai kunan hasoru nia maun alin, nia ema bosokten. Ema nebe la hadomi nia maun alin nebe nia hare ho matan, oinsa nia bele hadomi Maromak nebe la hare ho matan”. (1Jo 4,20)
Regra fiar nian no segredo esperança nian mak: rikusoin hotu rai nian, sasan sira hotu, prazer sira mundo nian, bem estar económico, mesmo que importante, maibe la to’o atu bele halo ema nia fuan haksolok. Rikusoin sira dala barak habosok ema no lori ema ba situação dramática sira nebe lori ba moris susar nian, uluk knanain tan ema hanoin katak nia la precisa tan Maromak no hanoin atu lori nia moris ne’e mesak deit.”
“Convite bíblico ba esperança lori mai ita dever atu assume responsabilidade urgente iha história, hodi la hein kleur tan. Caridade, mak «representa mandamento social nebe boot liu» (Catequismo da Igreja Católica, 1889). Moris kiak iha causa estrutural sira nebe ita tenke hasoru no hasai tiha hosi sociedade. Atu ida ne’e bele acontece, ita hotu simu lia bolu atu cria sinal foun sira esperança nian nebe testemunha caridade cristã nian, hahu husi familia, escola ba too iha sociedade.
Ema kiak sira la’os todan ida ba Igreja, maibe sira mak maun alin no bin feton sira atu ita hadomi liu, tan sira ida-idak, ho sira ina existência e ho sira nia liafuan no sabedoria nebe sira iha, desafia ita atu kaer ho ita nia liman rasik lialos Evangelho nian. Tan ne’e, iha loron Mundial ema kiak sira nian fo hanoin mai ita nia comunidade sira katak ema kiak sira iha centro hosi atividade pastoral hotu. La’os deit liu hosi halao atividade caritativa deit maibe mos sira iha wainhira Igreja mia fuan iha celebração no anuncio sira. Maromak horik iha ema kiak sira ne’e atu halo ita sai riku liu hosi sira nia lian, sira nia historia, no sira nia ilas. Forma oi-oin hosi moris kiak nian iha mundo, sai nudar lia bolu ida atu halo ita pratica moris Evangelho nian no oferece mai ita sinal sira lolos esperança nian.” (Papa Leao XIV nia mensagem balun ba Loron Mundial kiak sira nian, nn, 2,3,5).