Arcebispo Gilbert Garcera nudar Presidente Conferências Episcopais Filipinas nian declara iha abertura 131° Assembleia CBCP nian iha Manila katak nudar ukun nain iha instituição eclessial nian ida nee ninia prioridade dahuluk liu mak tau matan ba ninia saseluk bispo sira no mos ba nailulik sira. Ida nee sei sai ninia agenda principal be precisa tau atenção tebes durante ninia mandato nudar presidente nebé nia sei halao iha tinan rua nia laran. Arcebispo Gilbert Garcera eleito nudar Presidente Conferências Episcopais Filipinas nian iha fulan Julho 2025.
Nia salienta katak “antes ita tau matan ba sarani sira, ita tenke cuida uluk bibi atan sira”. Ne’e tamba hare ba realidade ohin loron nian exige mos atu bispo no nailulik sira halo nafatin formação continua nune’e iha halao sira ninia ministério sira bele hatan diak ba desafio sira vida nai lulik no igreja nian, liu-liu ralidade hanesan inteligencia artificial. Hodi participa nafatin iha formação continua bispos no nailulik sira bele mos a nivel pessoal cuida sira ninia-an no a nivel social cuida sira ninia knar hodi bele servi lolos Maromak ninia povo no defende nafatin dignidade ema sira nian.
Tuir Presidente CBCP ne’e bispos no nailulik sira ohin loron nian pecisa halo coordenação nebe diak no eficiente iha serviço sira CBCP nian nune iha exercísio ida-idak ninia funsão serviço sira bele lao diak no ótimamente. Além de ne’e ohin loron sira mos percisa instrumentos sira nebé bele tulun sira iha sira ninia knar. Uluk liu mak orgão ka departamento sira nebe hetan iha CBCP nia laran. Órgão sira nee iha atu ajuda bispo sira serviço hamutuk diak liu tan. Ohin loron agentes eclessiais sira nian “labele halo buat ruma indepedentemente”, necessita tebes comunicação no colaboração nebé mak diak “iha espirito sinodal nian, buka comunicação ida nebé mak los, fahe direção sira no colaboração diak, nunee programa sira hotu bele hatan ba necessidade pastoral nian iha diocese sira rai Filipinas nian”.
Assembleia CBCP ba dala 131° nee participa husi bispo sira hamutuk nain 97. Ba bispos sira ne’e ho participantes sira hotu Arcebispo Garcera husu atu halao didiak sira ninia knar hodi hamutuk nudar igreja exerce diak liu tan knar “vigilância pastoral no clareza moral” nudar sasin concreto ba ema no mundo ohin loron nian. Ba ida nee nia dehan katak nudar Presidente CBCP nian nee laos kona ba ema ida ou laos atu lao mesak-mesak deit maibe ne’e kona ba lao hamutuk iha missão ida deit.
Por: João Pereira
Copyright Radio Veritas Asia