Roma 28 de Setembro de 2025,
Jubileu da Esperança nebe santa creda celebra iha tinan 2025 nee sai tempo graça nian ba Maromak ninia povo tomak, husi ki’ik too boot, kiak no rico ho mos grupo categoriais sira hotu iha igreja ninia laran. Tinan tomak ida igreja oferece ba sarani sira hotu atu hakat tama liu husi Porta Santa-Odamatan Santa creda ninian hodi hetan graça no indulgência plenária ba celebração jubileu ida ne’e.
Iha loron 26-28 fulan Setembro liu ba halao ona peregrinação jubileu da Esperança ba catequistas sira hotu iha mundo tomak iha Roma, Italia. Catequista barak husi mundo tomak nee ba halibur-an hamutuk iha Roma hodi celebra festa boot ida ne’e. Husi Timor-Leste catequista sira representadu husi mestre Marçal Evaristo Soares ho mestre Adérito Ruben da Costa Freitas, lori catequista sira hotu iha Timor-Leste ninia naran.
Peregrinação jubileu da Esperança catequista mundo tomak ninian nee halao ho diak tebes durante loron tolu ninia laran ho atividade encontros, partilhas de experiências, oração no eucaristia ho mos simu missão atu continua lao ba haklaken Maromak ninia evangelho liu husi knar catequista nian. Iha loron dahuluk, loron 26 fulan Setembro 2025 tuku 9.00 dader catequista sira halo oração no reflexão hodi lori Cruz lao hahu husi praça de conciliação tuir dalan ba to’o Basílica São Pedro nian hodi hakat tama husi porta santa iha basílica ne’e. Tama tiha ba laran continua kedas ho sacramento de reconciliação. Iha loron tuir fali mai, 27 de Setembro dader tuku 10.00 catequista sira hotu halo audência ho Amo Papa Leão XIV iha praça São Pedro. Catequista sira nee hamutuk rihun rua resin mai husi nação atus ida resin. Audência ne’e halo hamutuk mos ho peregrinos sira nebe mai husi nação oi-oin iha mundo ne’e.
Atividade Jubileu ba catequista sira nian ne’e taka ho audência privada catequista sira nian ho santo padre iha Basílica de São Pedro no eucaristia santa iha praça de São Pedro nian iha loron 28 fulan Setembro presidida husi Santo Padre Leão XIV rasik hodi simu fali missão evangelização atu continua nafatin knar catequista sira nian. Iha audiencia privada nee mak mestre Marçal ho mestre Adérito mos cumprimenta Sua Santidade Papa Leão XIV hodi em nome de catequista no povo sarani Timor Leste hotu entrega lembrança domin no carinho tais ida tara ba Amo Papa Leão XIV. Santo Padre hafoin de simu tiha lembrança ne’e hateten dehan “obrigado ba imi nia domin mai ha’u no ha’u nia bênção apostólica ba imi hotu”.
Hafoin de audiencia privada ho catequista sira continua kedas ho eucaristia santa no iha ne’e mak halo mos juramento instituído ba catequista 39 nebé eleito. Entre sira ne’e inclui mos catequista nain rua husi Timor-Leste nian mak mestre Marçal Evaristo Soares no mestre Adérito Ruben da Costa Freitas be representa catequistas sira hotu iha Timor-Leste hodi simu diretamente husi Amo Papa Leão XIV Cruz missão catequista sira ninian. Le hotu tiha evangelho bolu catequista instituido sira no sira mos hatan dehan ‘Ha’u mak ne’e’ nudar sinal sira ninia prontidão ba missão catequista ninian ne’e. Hafoin de homilia tiha mak Santo Padre entrega fali tan Cruz Missão nian liu husi oração ida no liafuan be dehan:
“Ricevete questo segno della nostra fede, cattedra della verità e della carità di Cristo. Annunciate il Signore con la vita, con le azioni e con la parola”. Simu sinal ita nia fiar nian ne’e, trono lia-loos no caridade Cristo nian. Haklaken Na’i ho imi nia moris, imi nia hahalok no imi nia liafuan”.
Iha opportunidade peregrinação jubileu da Esperança ba catequista sira ne’e, catequista sira além de simu Cruz Missão Catequista nian husi Santo Padre Leão XIV sira simu mos certificado husi Dicastério litúrgico nian.
Peregrinação ida ne’e sai momento emocionante ida no lori tebes ksolok ba catequista sira be halibur-an iha praça São Pedro nian, liu-liu mestre Marçal ho mestre Adérito nebe hetan opportunidade ida nee hodi mos hasoru diretamente Santo Padre no maun alin catequista sira husi mundo tomak hamutuk koko Maromak ninia graça sira nudar creda no nudar missionário Cristo ninian liu husi knar catequista nian.
Iha Basílica de São Pedro mestre Marçal no mestre Adérito reza mos ba catequistas sira hotu iha Timor-Leste ho sira ninia familia no sira ninia missão catequista nian, no mos ba creda Timor atu nune’e iha missão nebe halao bele hametin liu tan sarani sira ninia fiar no haburas no haboot liu tan Maromak ninia reino iha Timor-Leste. Media CET
