Greccio, knua kik ida , iha foho leten sira rai Itália nian, iha nebe, ba dala uluk iha historia, S Francisco husi Assisi (1182-1226), celebra festa Natal kalan, ho objecto sira: Balada, Balada han fatin, duut maran.
Haktuir Thomas Celano iha biografia Francisco Assisi nian, iha tinan 1223, hateten: semana rua molok tama festa Natal Francisco hakarak realiza ninia mehi boot, atu celebra Natal iha Greccio. Nia hakarak los atu sente hikas ambiente Belem nian, kalan Santa wainhira Jesus mai moris iha mundu.
Francisco rasik visita ona Terra Santa iha tinan sira 1219, iha fatin nebe Jesus moris ba. Experiência peregrinação ne’e nian, hetók halo nia hadomi no admira liu tan Jesus ninia humildade nebe hatudu ba mundu.
Fila tiha husi Terra Santa, nia hakarak los atu sente no koko, Mistério Maromak Nia Futar Liafuan halo’An ba ema (Encarnação) nudar kosok oan, toba iha balada han fatin, ho oin hamnasa nakonu ho domin, simu criatura tomak nebe ba adora Nia.
Celano descreve katak Francisco hakarak celebra cena Natal nian ida ho saudades, nebe mai husi fuan nia klean :…, ‘Hau hakarak hare ho hau nia matan rasik, situação moruk no todan nebe Nia (Jesus) koko nudar kosok oan ida, oin sa latan’An iha balada han fatin, iha duut maran no balada sira mak hein’
Iha Greccio, Francisco husu ba João, belun nebe Francisco hadomi tebes no ema importante iha rai Greccio, atu prepara hela festa Natal nian. João prepara balada han fatin no du’ut maran, lori mos balada sira ba fatin celebração nian. Povo sira halibur malu, lori ho ahi knulu no lilin. Fitun sira iha lalehan haroman kalan ne’e, laiha imperessão comercial. Ema sente duni ho lolos ambiente Belem nian.
Descreve katak Natal iha Greccio, lao nakonu ho ksolok. Frei sira (Sira nebe tuir Francisco), no povo iha fatin neba mos, hananu ho haksolok. Greccio sai tiha nudar Belem foun ida. Francisco lê Sagrada Escritura hodi halo homilia. Francisco hanesan lolos hare hela kosok oan ida, toba iha balada han fatin, no nia lao ba atu hafanun.
Iha kalan ne’e, knua Greccio sai tiha nudar Belem foun ida. Povo feto no mane, mai husi fati fatin, lori ahi knulu no lilin tuir sira kbit, ema hotu haksolok. Balada han fatin halo ona, duut maran, balada sira lori la o ba fatin celebração nian. Iha ne’e mak simplicidade hetan respeito, pobreza hetan gloria, criatura tomak expressa kolok Natal nian.
Francisco nia fuan laran haksolok, tanba hare kosok oan Jesus iha balada han fatin. Maromak Nia haraik A’an, fo ksolok ba nia fuan. Visão ida ne’e, husik hela mensagem nebe klean . Francisco hanesan lolos hafanun hela kosok oan Jesus nebe toba kleur iha ema nia fuan laran, atu sira bele sente ksolok iha esperança lolos, nebe Maromak hatudu iha Kosok Oan Jesus.
Thomas celano descreve katak iha ninin no rohan husi kalan Natal nian, ema hotu fila fali ba uma ho ksolok. Fo sentido ba Natal nudar expressão husi Maromak Nia humildade; ida ne’e, mak Francisco Assisi hamoris iha knua Greccia. Hahu husi celebração nebe Francisco halo iha Greccio, mak tradição halo presépio, hahu iha Igreja.
Iha fatin Natal ida ne’e, ikus mai hari Altar ida nudar, liman rohan mensagem dame, simplicidade divino iha loron Natal. To’o ohin loron iha fatin besik comunidade franciscana iha Greccio ne’e, peregrinos no visitante sira bele hare poresépios ho versão oi oin no husi nação nebe la hanesan coloca iha neba.
