Tinan-tinan MISSIO ou PONTIFÍCIA OBRAS MISSIONÁRIAS (POM) iha nivel continente nian sempre halao encontro durante semana ida hodi hare hamutuk serviço Missão Evangelização nian nebe halao hela iha continente rua ne’e.
Iha tinan 2026 ne’e encontro MISSIO continente rua ne’e nian halao iha Manila, Filipina hahu husi loron 2-6 fulan Março. Encontro ne’e realiza iha complexo Centro de Formação Pastoral Arquidiocese Manila nian iha cidade Makati.
Marca presença iha tinan ida ne’e diretores nacionais MISSIO nian nebe mai husi nação 15 inclusive Timor-Leste. Husi Timor-Leste mak Diretor Nacional MISSIO nian Pe. Bento Barros Pereira. Pe. Asif John Khokhar husi Pakistan no nia nudar decano ba diretores continente Asia nian; Husi Filipina be sai uma nain mak director nacional, Monsenhor Esteban Bong.Lo. LRMS; Pe. Peter Chanel Gomes husi Banglades; Pe. Fernando Padige Basil Rohan husi Sri Lanka; Pe. Alfonsus Widhiwiryawan husi Indonesia; Pe. Adrian Eugenio Loza husi Turquia; Dom Ambrose Pitchaimuthu husi India; Pe. Paul Chatsirey Roeung husi Cambodia e Laos; Pe. Michael Cheng Chai Pui husi Nova Zelandia no nudar decano ba diretores sira husi continente Oceania; Pe. Christian Sieland husi Papua Nova Guinea; Pe. Gabriel Chonsa Jocher husi Casaquistão; Pe. Victor Gnanaprakasam husi Malasia no Singapura; Pe. Peter Piyachart Makornkhanp husi Tailandia; no ikus liu mak Me.Mariana husi Fiji no ilhas pacíficas nian.
Tópico sira nebe sei descute iha reunião tinan ida ne’e nian mak hanesan: MISSIO iha Àsia no Oceania ninia missão nebe halao iha linha sinodalidade nian, hato’o husi Dom Socrates C.Mesiona MSP, D.D atual vigário apostólico ba diocese Puerto Princesa; Partilha no reflexão kona ba Jublieu boot Esperança nebe hato’o husi decano diretores sira continente Àsia nian Pe. Asif John; Respostas ba Congresso Missio continente Àsia nian, hato’o husi Dom Ambrose Pitchaimuthu husi India; Liafuan murak kona ba missão husi Arcebispo Manila nian Sua Eminência José Cardeal F. Advincula,D.D; Situação Missão nian iha tempo ohin loron, hato’o husi Pe. António Pernia SVD nudar director DWIMS; Visão Caminho Missionário husi 20230-2033 nebe sei hato’o husi Pe. Mark Demanuele MSSP, director Comissão Evangelização e Catequese Conferências Bispos Filipinas nian; Careira, familia no Missão nebe hato’o husi par kaben nain ba Cristo Filipina nian Sr/Sra. Arnel no Bing Santos; Importância atu haburas espírito união missionária nian nebe hato’o husi Secretário Geral Pontifícias União Missionária, Pe. An Nhue; no ikus liu mak partilha husi diferentes diretores nacionais sira ninia hodi bele enriquese serviços MISSIO nian iha continente Àsia no Oceania. Além de partilha missão nian iha encontro ne’e halo mos conversação spiritual kona ba tópico sira nebe descute hamutuk iha sesões sira.
Além de disscusão ba tópico importante sira menciona ona iha leten, diretores sira mos moris nafatin iha missão ninia essencia no kbiit nebe mak eucaristia. Loron sira encontro nian hakonu-an mos ho celebração eucaristia, laudes e vesperas loro-loron nian no atu hatene mos igreja local Filipina nian diretores MISSIO nian sira nebe presente iha encontro MISSIO continental ne’e halo mos visita ba capelas, igrejas Basílicas no santuário sira hanesan: Basílica Menor no Santuário Nacional Hesus Nazareno; capela Sagrado Coração de Jesus iha Power Plant Mall; capela Nossa Senhora da Esperança iha Land Mark Makati no capela Instituto São Lorenço.
Encontro annual nivel continental continente Àsia no Oceania nian nee sai mos hanesan oportunidade ida atu halo reflexão no enriquecimento ba ação missionária nian iha continente rua ne’e nebe sempre halao nafatin liu husi formação no animação missionária ho Fundo Universal de solidariedade nebe sarani sira hatudo ba igreja hodi garante evangelização lao nafatin iha mundo tomak, liu-liu iha rai missão nian sira.