UCT, (8 de setembro 2024)-Universidade Católica Timorense, São João Paulo II define ona data oficial de Inscrição ba estudante foun sira ba ano letivo 2025, sei hahu iha loron 18 de Novembro 2024 to’o 30 de Janeiro 2025.
Pró-Reitor de Ensino e Assuntos Académicos Prof. Dr. Agapito da Costa Jeronimo informa data oficial de inscrição ba candidatos estudante foun ba Universidade Católica Timorense ba tinan acadêmico 2025 nian sei hahu iha loron 18 fulan novembro tinan ne’e.
“Kona ba data de incrição ba estudante foun sira, Universidade define ona sei hahu iha loron 18 de Novembro de 2024 to’o 30 de Janeiro de 2025, no sei halo etapa ida deit. Iha loron 31 de Janeiro, sei halo teste admição ba sira nebé mak registo ona”. Agapito informa ba Jornalista, iha Campus UCT-Balide, Dili iha loron 27 fulan Setembro tinan ne’e.
Pró-Reitor de Ensino e Assuntos Académicos explica critério principal sira nebé mak candidato foun sira precisa lori ba inscrição iha Universidade Católica Timorense.
“Critério sira nebé precisa ba estudantes foun sira wainhira sira mai halo inscrição mak hanesan tuir mai ne’e: Diploma Legalizado, Certidão RDTL no notas media nian. Ba sira nebé mak seidauk iha diploma sira tem que halo carta declaração de estudo hosi sira nia diretor da escola nian”.
Nia salienta mós política académico universidade Católica Timorense kona-ba regras candidato foun sira nebé halo ona inscrição sei processa tuir teste ba lingua no areas cientificas nian.
“Iha parte teste nian sei halo iha loron ida tomak; Iha parte dader nian fo teste ba lingua, hanesan Lingua Portuguêsa no Lingua Inglesa. No parte lorokraik kona ba areas Cientificas nian no sei fo sai resultado teste nian iha loron 07 de Fevereiro, no sira nebé mak liu sei halo reinscrição iha loron 10-14 de Fevereiro”.
Kona-ba política de administração iha tinan ne’e la-iha mudança ba estudante foun sira nebé atu halo inscrição. Universidade mantein nafatin hanesan tinan hirak liu ba, katak montante osan inscrição ka registo hamutuk $ 15.00, cada ema ida. Maibé ne’e iha fase de inscrição nian no depois ita sei hare fila-fali ba resultado teste nian, karik ida nebé mak liu sei halo fali reinscrição; Tenik Dr. Agapito da Costa Jeronimo.
Universidade Católica Timorense, São João Paulo II; hanesan Universidade privada ida nebé foin exíste iha tinan 2021; maibé iha condições nebé mak diak tebes atu bele fo ensino de aprendizagem nebé ho qualidade ba estudante sira, tanba iha professor sira nebé ho qualificação di’ak no iha mos facilidades completo hanesan laboratório sira ba estudante sira hodi bele hala’o praticas durante processo aprendizagem nian. Leo S’maus