Reflexão Dominical
Domingo XXXIV Tempo Baibain, Tinan A
“Solenidade Jesus Cristo Liurai Universo nian”
I Leitura : Ez 34,11-12-15-17
Sal. Resp. : Sal 22 (23), 1-2a-2b-3.5-6
II Leitura : 1Cor 15,20-26.28
Evangelho : Mt 25,31-46
Tinan-tinan, liturgia dedica domingo 34 tempo ordinário ba solenidade Jesus Cristo Liurai Universo nian. Ho festa boot ne’e, ciclo litúrgico ida remata, no ida seluk hahú (cf. Tinan A,B ou C). Iha Domingo ikus tinan A nian ne’e, Maromak nia futar Liafuan koalia kona ba Maromak nebé apresenta-An nu’udar Bibi-Atan lolós nebé convida nia escolante sira atu banati tuir Nia.
Atu bele cumprende lia-menon husi leitura dahuluk, ita uluk-nana’in tengki cumprende contexto histórico livro Ezequiel nian. Iha tinan 587 m.C. (molok Cristo), liurai Babilónia Nebucodonosor harahun templo Jerusalem, durante funu hasoru Egipto hodi bele conquista rai Síria. Acontecimento ne’e, halo Israelita oan barak husik hela Jerusalém, halai ba rai-fuik-maran (deserto), balu ema dadur no sai atan iha rai Egipto no Babilónia. Iha rai Jerusalem rasik, ema kiak sira de’it mak hela: to’os na’in sira, ema sira nebé halo tua no badaen sira. Ema hirak ne’e, ita bele compara hanesan classe social kraik eh baixo liu. Neineik-neineik, mosu classe social nebé aas liu oitoan nebé explora ema ki’ik, mukit no kbi’it laek sira. Hirak nebé hala’o knaar nudar liurai, ukun-na’in no bibi-atan, sai nu’udar explorador eh há’es ema kbi’it laek sira. Iha situação ida nune’e, mosu profeta Exequiel nebe haklaken interversão Maromak nian ba povo kbiit laek no mukit nebé sofre exploração ema kbiit-na’in eh potente sira nian. Livro profeta Ezequiel apresenta relação Maromak ho povo Israel iha imagem tuir mai ne’e: povo Israel nu’udar bibi no Maromak nu’udar Bibi-Atan lolós. Portanto, profeta Ezequiel haklaken liafuan condenação Maromak nian hasoru bibi-atan aat sira Israel nian no promete intervenção Maromak nian nu’udar Bibi-atan lolós ba povo Israel. Povo Maromak nian, Bibi Maromak nian. Nu’udar Bibi-atan lolós ba povo Israel, Maromak: buka, la’o tuir bibi ida-idak, halibur bibi sira, lori sira ba dalan lós, fó du’ut matak ba bibi sira, halo sira hakmatek eh descansa no fó isin di’ak ba bibi sira. Imagem nebé facilmente ita bele liga ho Jo 10 nebé apresente Jesus nu’udar Bibi-Atan di’ak (Bom Pastor) nebé saran nia moris rasik tan nia bibi sira. Ambiente eh experiência leitura dahuluk nian, actual nafatin to’o mai ita nia tempo. Dala barak, ema hirak nebé simu knaar atu sai bibi-atan, sai fali ameaça no desastre ba bibi sira. Sira la’os ta’u iha oin interesse bibi sira nian, maibé sira nia egoismo mak aas no boot liu tiha di’ak bibi sira nian. Iha contexto ne’e, Maromak apresenta-An nu’udar Bibi-Atan lolós nebé la’os de’it nu’udar Na’in lolós ba bibi sira, maibé mos iha kbiit atu tesi-lia eh julga bibi atan aat sira no iha kbi’it atu salva nia bibi sira husi liman foer no liman aat sira.
Leitura daruak, se ita lée capítulo 15 hotu, concentra iha mistério salvação ema hotu nian iha graça Jesus Cristo nia moris hi’as nian nebé garante participação iha Reino Maromak nian. Versículos escolhidos ba leitura ohin nian (vv. 20-26.28), São Paulo apresenta ponto aas liu husi Jesus Cristo nia manán eh vitória ba humanidade. História salvação nian, com certeza hetan desafio iha realidade pecado eh sala nian. São Paulo hanorin ita atu fiar metin katak, Jesus Cristo nia mate nu’udar mistério kbiit aas liu nebé manán kbiit aat tomak sala nian hahú husi Adão (hún eh abut sala nian) to’o kbiit mate nian. Nune’e, iha Jesus Cristo nia moris hi’as, laiha tan funu-baluk ida mundo nian nebé bele manan fiar na’in sira. Nune’e, fiar-na’in ida nebé simu Jesus Cristo nia moris-hi’as nu’udar kbi’it ba nia moris, sala, mate sei la manán nia, tanba Jesus Cristo mak Na’i ba buat hotu (v. 28).
Iha Evangelho, ita to’o ba ponto aas liu husi “discurso escatológico” Jesus nian (cf. Mt 24,45 – 25,46) nebé ko’alia hahú husi fidelidade, vigilância, capacidade atu gere talentos, to’o ba imagem juízo universal eh tesi-lia ba ema hotu-hotu nian. Evangelho apresenta Jesus Cristo ho expressão “Ema nia oan mane (o filho do homem)”, Liurai, nebé hi’it-An mai tesi lia ba humanidade hotu, hafahe bibi malae (ema di’ak) ho bibi timur (ema aat). Iha mentalidade religiosa Israelita nian, imagem Maromak nian nu’udar Bibi-Atan di’ak no lolós (cf. Sal 23). No, Ida nebé hi’it-An mai eh mosu hamutuk ho anjo sira, túr iha kadunan glória nian, refere de’it ba Maromak de’it. Nune’e, ita facilmente cumpreende katak, Jesus Cristo mak figura Maromak Bibi-Atan di’ak, nebé iha kbi’it tomak atu halo justiça eh tesi-lia ba humanidade. Iha diálogo naruk nebé Liurai kbiit-na’in halo ho bibi sira, acentua deit kona ba qualidade husi comportamento domin no misericórdiabibi sira nian. Entretanto, iha justiça final Jesus nian ne’e, critério aas no bo’ot liu mak domin, laran-sadi’a (misericórdia), compaixão, solidariedade ba maun-alin sira, liu-liu ba hirak nebé ki’ik liu (hamlaha, hamrook, la’o-rai, hena la’iha, moras no dadur). Critério hirak ne’e hotu atu dehan katak, oda-matan ba salvação eh manán Reino Lalehan nian mak, wainhira ita moris hodi la taka-an (egoísmo, individualismo, materialismo, indiferença) ba maun alin sira, wainhira ita hatene fahe ita nia moris ho ema seluk liu husi haburas sensibilidade ho ema kiak no mukit sira. Los tebes duni, lia fuan nebé São João da Cruz hateten: “No entardecer da vida seremos julgados pelo amor” (“Ikus mai, ita sei simu tesi-lia ho sasukat domin”): “Wainhira imi halo buat hirak ne’e ba ema ida de’it husi Há’u nia maun-alin sira ne’e ida nebé ki’ik liu, imi halo ona mai Há’u” (Mt 25,50).